Read Zou SIEMPU LAIBU 11 Bible Online

SIEMPU LAIBU 11 - Zou bible

SIEMPU LAIBU 11

¹TOPA in Moses le Aaron hopi-in tam bangin gen hi:

²Israel mite hopi-in tam bangin gen un: Tam teng pen leitunga om ganhingte lahah na neh thei ding uh ganhingte ahi hi.

³A kecin a kaa, ehnel a hlai ganhing poma- tua bangte na ne thei ding uhi.

⁴Ahi vangin ehnel-hlaite lah pan hitale kecin-kaate lah pan hitale tamte na ne sih ding uhi: Kalaoh in ehnel a hlai vangin a kecin kaa lo hi; tua khu note dingin sieng lo hi.

⁵Sakih ganhing in ehnel a hlai vangin a kecin kaa lo hi; tua khu note dingin sieng lo hi.

⁶Bilpi in annel a hlai vangin, a kecin kaa lo hi; tua khu note dingin sieng lo hi.

⁷Voh a kecin a kaa vangin, ehnel hlai lo hi; tua khu note dingin sieng lo hi.

⁸Tam bang sate ne loin a sisate zong na tham sih ding uhi; tuate pen note dingin sieng lo hi.

⁹Tui sunga om zosiete lah panin tam teng na ne thei ding uhi. Tuipi sung hitale lui sung hitale, hla le lip a neite zosie na ne thei ding uhi.

¹⁰Ahi vangin tuipi ahi sihle lui sunga om hla le lip a nei lo, tui sunga a hontat ganhingte le tui sunga om adang hinna a nei ganhing zosiete lahah khat popo pen

¹¹note dingin a kidahhuoi hi den ding hi. Tuate’ sa na ne sih ding vua, a sisate zong a kidahhuoi-in na ngaisun ding uhi.

¹²Tui sunga om hla le lip nei lo zosie note dingin a kidahhuoi ahi hi.

¹³Vate lah panin tam teng pen a kidahhuoi-in na ngaisun ding uhi. Tuate kine lo ding hi; tua a kidahhuoite: muvanlai, langta, luimu,

¹⁴mumeikaa, mukhau namcin;

¹⁵va-ah namcin;

¹⁶ostrich vapi, pengpeleuh, vatawt, musi namcin;

¹⁷keising, tuimu, simbu,

¹⁸gam vatawt, tui vatawt[7], musane,

¹⁹gun vapi, tuiva kengsau namcin, le huitun le bahte ahi hi.[8]

²⁰Kengli tawh lam a pei, hla a nei ganhing zosie note dingin a kidahhuoi ahi hi.

²¹Ahi vangin hla a nei, kengli tawh a pei ganhingte lahah a kitom nadinga a kepheng tungah a kizom keng tampi a neite na ne thei ding uhi.

²²Tuate lah panin na neh thei dingte uh: kauphe kitom nam zosie, kauphe zol nam zosie, khuomkhit nam zosie, le khuombai nam zosie ahi hi.

²³Ahi vangin keng li nei-in hla a nei ganhing dangte zosie note dingin a kidahhuoi ahi hi.

²⁴Tam teng ziehin a sieng lo na hi ding uhi; a sisa ganhing a tham poma nitah masang a sieng lo na hi ding vua,

²⁵tua gan sisa khat popo lahah a sa themkhat a puo poma in a puonte sawp sieng ding a, nitah masang a sieng lo hi ding hi.

²⁶A kecin kaa nanle ehnel a hlai lo ganhing zosie note dingin a sieng lo ahi hi; tuate khatpo a tham khate a sieng lo hi ding hi.

²⁷Kengli tawh lam a pei ganhingte lah panin a kephang tawh lam a pei zosie note dingin a sieng lo ahi hi; tuate lahah a si khatpo a thamkhate nitah masang a sieng lo hi ding a,

²⁸gan sisa a puo pa in a puonte sawp siengin nitah masang a sieng lo hi ding hi; tua teng pen note dingin a sieng lo ahi hi.

²⁹Leitunga a bawhva ganhingte lahah tam teng pen note dingin a sieng lo ahi hi: bui, zusa, tangpi namcin,

³⁰taldep, tang, thangkhit, senel thangkhit, talmam te ahi hi.

³¹A hontat ganhing zosie lah panin note dingin tam teng pen a sieng lo hi ding hi; tuate khatpo a si ciengin a tham poma nitah masang a sieng lo hi ding hi.

³²Tuate a si ciengin a tuhna nate, sing vanzah, puon, savun, la-ip le na khatpo-a kizang vanzah khatpo hitale a sieng lo hi ding hi; tua teng pen tui sungah kidie ding a, nitah masang a sieng lo hi dinghi; tua zaw ciengin a sieng hi ding hi.

³³Leibeel sungah tuate khatpo a kieh leh, tua sunga om zosie a sieng lo hi ding a, tua leibeel na tawkeh ding uhi.

³⁴Tua beel sunga a om a kine thei an khatpo tungah tua bang tui khatpo a tuh leh a sieng lo hi ding hi; tua bang beel sunga om a kidawn thei tui poma a sieng lo hi ding hi.

³⁵Tua ganhing sisa themkhat a tuhna poma a sieng lo hi ding hi; meibung lungthu hitale, tap tung hitale kitawkeh ding hi; tua teng pen a sieng lo hi a, note dingin a sieng loin a om suoh ding hi.

³⁶Ahi vangin tuinah ahi sihle tuibem sunga omte a sieng hi ding a, tua ganhing tawh a kithukha na khatpo pen a sieng lo hi ding hi.

³⁷Tua dinga a kituomkoi khaici tungah tua gan sisa themkhat a tuh leh, tua khaici pen a sieng ahi hi;

³⁸ahi vangin tui sungah khaici kidie-in tua a sisate themkhat tua tunga a tuh leh, tua pen note dingin a sieng lo ahi hi.

³⁹Na neh thei ding uh ganhing khat a si leh tua gan sisa a tham poma pen nitah masang a sieng lo hi ding hi.

⁴⁰Tua ganhing sa a ne poma in a puonte sawp ding a, nitah masang a sieng lo hi ding hi; tuale ganhing sisa a luonghawm a puote in a puon a sawp ding vua, nitah masang a sieng lo hi ding uhi.

⁴¹Leitunga a hontat ganhing poma a kidahhuoi ahi hi; tuate kine lo ding hi.

⁴²A awm-a kithol poma, le kengli-a vah poma, ahi sihle keng hau, leitunga hontat ganhing zosie na ne sih ding uhi; azieh pen tuate a kidahhuoi ahi hi.

⁴³A hontat ganhing khatpo tawh noma le noma a kidahhuoi-in na om sih ding uhi; tuate tawh noma le noma na kiniehsah sih ding vua, na kiniehsah uleh a sieng lo na suoh ding uhi.

⁴⁴Azieh pen keima TOPA na Pasien uh ka hi hi; tua ahi ziehin kei a siengtho ka hi ziehin noma le noma kisiengsah un. Leitunga a bawhva ganhing khatpo tawh noma le noma kiniehsah sih un.

⁴⁵Bangzieh ahei cile note’ Pasien ahi dingin Egypt gam pana nohaw ang peitopi TOPA ka hi hi; kei a siengtho ka hi ma bangin no zong na siengtho ding uhi.

⁴⁶Tam teng pen vasate, tui sunga gamta hinna a nei ganhing zosie le leitunga a bawhva hinna a nei ganhing zosie tawh kisai ngainate ahi a,

⁴⁷tuaci’n hinna a nei ganhingte, a sieng le a sieng lo, a sa neh thei ding le a sa neh thei lo dingte na khen ding uhi.