Read Zou SIEMPU LAIBU 13 Bible Online

SIEMPU LAIBU 13 - Zou bible

SIEMPU LAIBU 13

¹TOPA in Moses le Aaron kungah tam bangci hi:

²Mi khat in ama’ tahsa vun tungah a cibaw khat hitale, hima khat hitale cikang khat hitale a nei a, a tahsa vun tungah phah natna[9] suoh thei ding dan a a op leh, siempu Aaron ahi sihle ama’ tapa siempute khat popo kungah kipeipi ding hi.

³Siempu pa in a ci tunga hima vel ding a, a hima munah a multe kangin a hima zong a ci tunga a vun sangin a thuh tum zaw-a a kimu leh, tua pen phah natna ahi hi; siempu pa in a vel zaw ciengin ama a sieng loin kise hi, ci-in a phuongzah ding hi.

⁴Ahi vangin ama’ ci tunga a vun sungah a hima kang napi a vun sangin a thuh tum lo zaw-in a kimu a, tua sunga a multe a kan sih leh siempu pa in ama ni sagi sung zia a tangsah ding hi.

⁵Siempu pa in a ni sagi ni-in vel ding a, a hima a ngaingai a na hi a, a ci tunga a kizel sih leh siempu pa in ni sagi sung ma zia tangsahkia lai ding hi.

⁶Siempu pa in a ni sagi ni-in velkia ding a, a hima khipin a kizel nawn sih leh ama sieng hi, ci-in siempu pa in a phuongzah ding hi; tua pen hima maimai ahi bo hi; tuale ama in a puonte sawp sieng ding a, tua ciengin a sieng hi ding hi.

⁷Ahi vangin ama in a sientho nadingin siempu pa kungah a kilaa zaw ciengin a hima pen a vun sung tenga a kizelmang tah leh siempu pa kungah ama kilahkia ding hi.

⁸Siempu pa in cienvel ding a, a vun sung tengah a hima a kizelmang zo tah leh siempu pa in ama sieng lo hi, ci-in phuongzah ding hi; tua khu phah natna ahi hi.

⁹Mi khat in phah natna[10] a vei leh siempu pa kungah kipeipi ding hi.

¹⁰Siempu pa in velcien ding a, a vun sungah a mul a kangsah cibaw a kang a op a, tua a cibaw sungah a tel sosuong a op leh,

¹¹tua khu a cilah vun sunga a om a dam thei nawn lo phah natna ahi hi. Siempu pa in ama sieng lo hi, ci-in phuongzah ding hi; ama a sieng lo ahi ziehin zia kitang sah lo ding hi.

¹²Ahi vangin siempu pa muna danah tua natna in a vun a phuhkhe a, a lutang panin a kephang dongin a tuommang zo tah leh,

¹³siempu pa in cienvel ding a, a natna in a ci tung zosie a tuommang tah leh, tua natna tawh kisai-in ama sieng hi, ci-in a phuongzah ding hi; a ci tung zosie a kansah zo tah ziehin ama a sieng ahi hi.

¹⁴Ahi vangin a ci tungah a matha ang opkia leh ama a sieng lo hi ding hi;

¹⁵siempu pa in a ma tha pen cienvelin ama sieng lo hi, ci-in phuongzah ding hi. Tua khu phah natna ahi ziehin tua a ma tha pen a sieng lo ahi hi.

¹⁶Ahi vangin a ma tha ang kankia leh siempupa kungah ama pei ding hi;

¹⁷siempu pa in ama velin, a natna a kang a suo zo tah leh siempu pa in natna veipa pen sieng hi, ci-in phuongzah ding hi. Ama pen a sieng ahi hi.

¹⁸Mi khat’ tahsa vun tungah a damsa uilut khat a op a,

¹⁹tua uilut munah cibaw a kang khat ahi sihle a san kang khat a op leh tua pen siempu pa kungah kilah ding hi.

²⁰Siempu pa in velcienna nei ding a, a vun sangin a thuh zaw-in a multe a kang a suo leh siempu pa in ama sieng lo hi, ci-in a phuongzah ding hi; tua khu phah natna ahi a, uilut pana ang phuhkhe ahi hi.

²¹Hizongle siempu pa in cienvelin tua tunga a multe a kan sih a, a vun sangin thuh tumzaw loin a dup leh siempu pa in ni sagi sung ama zia tangsah ding hi.

²²A vun sunga a kizel tah leh siempu pa in ama sieng lo hi, ci-in a phuongzah ding hi; tua khu phah natna ahi hi.

²³Ahi vangin tua a cikang pen mun khatah om denin a kizel sih leh tua khu uilut hima pawn ahi bo hi; siempu pa in ama sieng hi, ci-in a phuongzah ding hi.

²⁴Ahi sihle tahsa in a vun tungah meikahma khat a nei a, tua meikahma a tha mun pen a san kang ahi sihle a kang ang suo leh,

²⁵tua pen siempu pa in a cienvel ding hi. Tua cikang tunga a om a multe kangin a vun sangin a thuhzawh leh tua khu phah natna ahi hi; tua pen meikahna pana ang phuhkhe ahi a, siempu pa in ama sieng lo hi, ci-in phuongzah ding hi. Tua khu phah natna ahi hi.

²⁶Ahi vangin siempu pa in velin cikang tunga om a mul a kan sih a, a vun sangin thuh tumzaw loin a dup leh, siempu pa in ama ni sagi sung zia tangsah ding hi.

²⁷A ni sagi ni-in siempu pa in ama velcien ding hi; a vun sunga a kizel leh siempu pa in ama sieng lo hi, ci-in phuongzah ding hi. Tami khu phah natna ahi hi.

²⁸Ahi vangin mun khatah tua cikang om denin a vun sungah kizel loin a dup leh, tua khu meikahna pana cibaw ahi bo a, siempu pa in ama sieng hi, ci-in phuongzah ding hi. Azieh pen tua khu meikahna pana hima pawn ahi hi.

²⁹Pasal ahi sihle numei in a lutang tung ahi sihle a kha-ah natna khatpo a nei ciengin,

³⁰siempu pa in tua natna cienvel ding hi. Tua natna pen a vun sanga a thuhzaw-in a kimu a, tua sunga om a multe engdangin a ngat zitzet leh siempu pa in ama sieng lo hi, ci-in a phuongzah ding hi; tua khu cithah ahi a, luphah ahi sihle khaphah natna ahi hi.

³¹Siempu pa in tua cithah natna velin a vun sangin a thuhzaw lo bangin kimu-in tua sungah mulvom a op sih leh siempu pa in ni sagi sung cithah natna tawh tua pa khumcipin zia tangsah ding hi.

³²A ni sagi ni-in siempu pa in cithah natna vel ding hi; tua cithah a kilaw sih a, a sungah a mul engdang loin, a vun sangin a cithah a thuh lo zaw banga a kimu leh,

³³ama in a sam heukieu ding a, hizongle a cithah mun teng heu lo ding hi. Siempu pa in a cithah natna tawh ama ni sagi khumbe lai-in zia tangsah ding hi.

³⁴A ni sagi ni-in siempu pa in tua cithah vel ding hi; a cithah in a vun sung law loin a vun sangin a thuh lozaw-a a kimu leh, siempu pa in ama sieng hi, ci-in a phuongzah ding hi.

³⁵Ahi vangin ama sieng hi, ci-in a kiphuongzah zaw ciengin a cithah in a vun sung a zel leh,

³⁶siempu pa in ama vel ding hi. A vun sungah a cithah a kizel zo tah leh siempu pa in mul eng sui kul nawn lo hi; ama a sieng lo ahi hi.

³⁷Ahi vangin a mittang sungah cithah a noptuom zo tah a, a sungah a mulvom po-in a cithah a dam zo tah leh ama a sieng ahi hi; siempu pa in ama sieng hi, ci-in a phuongzah ding hi.

³⁸Pasal ahi sihle numei in a tahsa vun tungah cikangte a nei leh

³⁹siempu pa in velin a kandang leh tua khu a vun a phukeh hima ahi hi; ama a sieng ahi hi.

⁴⁰Mi khatpo a lu tunga a sam pulin a lu a tol vangin ama a sieng ahi hi.

⁴¹A talpang le a ankhawibaw’ sam a pul a, a pang a tawl vangin ama a sieng ahi bo hi.

⁴²Ahi vangin a lutol tungah ahi sihle a pangtawl tungah a san kang hima a op leh, tua khu a lutol tung ahi sihle a pangtawl tunga a pusuoh phah natna ahi hi.

⁴³Siempu pa in ama velcien ding hi; tua ahima baw pen a lutol tungah hitale a pangtawl tungah hitale, tahsa vun tunga phah natna op dan banga a kangsan ahile,

⁴⁴ama phah natna vei ahi a, ama a sieng lo ahi hi. Siempu pa in ama sieng lo hi, ci-in a phuongzah ding hi; a lutang tungah a natna a om hi.

⁴⁵Phah natna vei pa in puonsiete sil ding a, a lu tunga a samte bawhkaisah lo ding hi; ama in a nephu humin, ‘Sienglo, Sienglo,” ci-in kiko ding hi.

⁴⁶Natna a nei laisie ama a sienglo hi ding hi; ama a sienglo ahi hi. Ama guoh teng ding hi; ama’ tenna pen giephuol pulam hi ding hi.

⁴⁷Puonsil tawh kisai tam bang ahi hi: Tua puon tungah phah natna a op ciengin samul puon hitale saihadiel puon hitale,

⁴⁸adung le avai-a kigan saihadiel puon, samul puon, savun, le savun tawh kibawl na khat popo tungah a tuh ciengin,

⁴⁹puon tungah tua hima a engin hitale a sanin hitale adung le avai-a kigan puon, savun, le savun tawh kibawl na khat popo tungah a tuh leh, tua khu phah natna ahi a, siempu pa kungah kilah ding hi.

⁵⁰Siempu pa in tua natna vel ding a, natna baang vante ni sagi sung tuomkoi ding hi.

⁵¹Ama in a ni sagi ni-in a natna vel ding hi. Tua natna pen adung le avai-a kigan puon, savun, le bang khat popo-a kizang savun tunga a kizel zo tah leh, tami khu mi a law thei phah natna ahi hi; tua khu a sieng lo ahi hi.

⁵²Tua natna pen adung le avai-a kigan puon, samul, saihadiel, savun khat popo tunga a tuh leh ama in tua puonte mei tawh hal ding hi, azieh pen tua khu mi a law thei phah natna ahi hi; tua khu mei sungah kihal ding hi.

⁵³Siempu pa in velin, tua natna pen adung le avai-a kigan puon tung le savun khat popo tunga a kizel sih leh,

⁵⁴siempu pa in natna a banna tuami van sawp dingin amate thupie ding a, ama in adang ni sagi sung ma tua van a tuomkoi ding hi.

⁵⁵Natna a banna van a kisawp zaw ciengin siempu pa in vel ding hi. Tua natna a kilaw sih nanle a natna mun a mel a kikhel sih leh, tua khu a sieng lo ahi hi; a sung lamah ahi sihle a pu lamah tua phah natna cikang a op leh, tua khu mei-ah na hal ding hi.

⁵⁶Siempu pa in a natna a kisawp zaw ciengin velin tua natna a dup leh, ama in adung le avai-a kigan puon tung pan hitale savun khat popo tung pan hitale tua cikang opna mun teng ehbal ding hi.

⁵⁷Tua natna adung le avai-a kigan puon tung hitale savun tawh kibawl van khatpo tungah hitale ang opkia leh, tua khu a kilaw thei ahi hi; tua natna banna teng mei tawh na hal ding hi.

⁵⁸Hizongle adung le avai-a kigan puon, le savun khatpo a kisawp sieng zaw ciengin natna a ven leh a ni veina kisawp ding a, tua puon a sieng hi ding hi.

⁵⁹Tam khu samul puon ahi a, saihadiel puon le adung le avai-a kigan puon, le savun van khat popo tungah ahi zongin a baang phah natna tawh kisai a sieng le a sieng lo khinkhai thei nading ngaina ahi hi.