Read Zou SIEMPU LAIBU 14 Bible Online

SIEMPU LAIBU 14 - Zou bible

SIEMPU LAIBU 14

²Tam pen a kisiensuo ni-in miphah[11] pa zui ding ngaina hi ding hi: Siempu pa kungah ama kipeipi ding a,

³giephuol pulamah siempu pa pei-in velcienna khat bawl ding hi. Tua phah natna veipa a natna a dam leh,

⁴siempu pa in a kisiensuo pa dingin vata hinglai a sieng ni, taamtah sing, a ausan puon le hyssop la dingin amate a sawl ding hi.

⁵Siempu pa in leibeel sung khat a kikoi tuisieng tungah vata khat tha dingin thupie ding hi.

⁶Ama in tua vata hinglai pen taamtah sing le a ausan puon le hyssop-te tawh lahtha-in, tuisieng tunga kithat vata si’ sungah tuate le vata hinglai pen die ding hi.

⁷Ama in phah natna pana kisiengsah ding pa tungah sagi vei the ding hi; tua ciengin ama sieng hi, ci-in phuongzahin tua vata hinglai pen gamlahah hla ding hi.

⁸A kisiensuo ding pa in a puonsilte sawpsiengin a sam heu ding a, tui sungah kisilin ama a sieng hi ding hi. Tua zaw ciengin giephuol ah ama pei ding a, ahi vangin puonbuh pulamah ni sagi sung om ding hi.

⁹A ni sagi ni-in a mul zosie heu sieng ding hi: A lu, a khamul, a mitkhu mul le a mul zosie heu ding hi; tua ciengin a puonsilte sawpin tui sungah kisil ding a, ama a sieng hi ding hi.

¹⁰A ni giet ni-in ama in genbaang lo tuuno apa ni, le genbaang lo kum khat a pha tuuno khat, le an tawh biehna sathau kisawsa annel ephah[12] khat’ sesawm-suo- sethum le sathau log[13] khat la ding hi.

¹¹Ama a siensuo siempu pa in a kisiensuo ding pa pen tam teng tawh, kikhopna buh lutna TOPA mai-ah koi ding hi.

¹²Siempu pa in tuuno apa khat la-in sathau log khat tawh khielna zieha biehna-in pie ding a, TOPA mai-ah a kivei biehna-in tuate lamto ding hi.

¹³Ama in mawna zieha biehna le meihal biehna gan kigawna mun siengtho-ah tua tuuno go ding hi; azieh pen mawna zieha biehna bangin khielna zieha biehna pen siempu pa-a’ ahi hi; tua khu a siengtho pen ahi hi.

¹⁴Siempu pa in khielna zieha biehna si themkhat la ding a, a kisuonsuo ding pa’ a zietlam biltep tung, a zietlam khutpi tung, le a zietlam kepi tungah tua si nu ding hi.

¹⁵Siempu pa in sathau log khat panin themkhat la-in a veilam khut phangah sung ding a,

¹⁶a veilam khut sunga om sathau sungah a zietlam khutme die-in a khutme tawh sathau themkhat TOPA mai-ah sagi vei the ding hi.

¹⁷Siempu pa in a khut sunga a omlai sathau themkhat, a kisiensuo ding pa’ a zietlam biltep, a zietlam khutpi, le a zietlam kepi nu-in khielna zieha gansi tungah koi ding hi.

¹⁸Siempu pa’ khut sunga sathau omlai teng pen a kisiensuo ding pa’ lu tungah nupieh ding hi. Tua ciengin siempu pa in TOPA mai-ah ama adingin thoidamna bawlpieh ding hi.

¹⁹A sien lona panin a kisiensuo ding pa ading thoidamna bawl nadingin siempu pa in mawna zieha biehna pie ding hi. Tua ciengin ama in meihal biehna go ding hi;

²⁰tuale siempu pa in maitam tungah meihal biehna le an tawh biehna te koi ding hi. Tua bangin ama adingin siempu pa in thoidamna bawlin ama a sieng hi ding hi.

²¹Hinanle ama a zawn ziehin tampi a pieh zawh sih leh ama ading thoidamna bawl nadingin ama in a kivei ding, khielna zieha biehna dingin tuuno khat, an tawh biehna dingin sathau kisaw annel ephah’ sesawm-suo- sekhat le sathau log khat pie ding hi;

²²vakhu ni ahi sihle paalva ni zong a pieh zawh bangbangin pie ding a, khat pen mawna zieha biehna hi ding a, a khat pen meihal biehna hi ding hi.

²³A ni giet ni-in ama in TOPA mai, kikhopna puonbuh lutna, siempu pa kungah ama’ kisiensuo nadingin tuate tawi ding hi;

²⁴tuale siempu pa in khielna zieha biehna tuuno le sathau log khat la ding a, a TOPA mai-ah a kivei biehna-in tuate lamto ding hi.

²⁵Siempu pa in khielna zieha biehna tuuno go ding a, tua khielna zieha biehna sasi themkhat la-in a kisiensuo pa’ a zietlam biltep, a zietlam khutpi, le a zietlam kepi nu ding hi.

²⁶Siempu pa in a veilam khutkuoh sungah sathau themkhat sung ding a,

²⁷a veilam khut sunga om sathau themkhat, TOPA mai-ah a zietlam khutme tawh sagi vei the ding hi.

²⁸Siempu pa in a khut sunga om sathau themkhat, a kisiensuo ding pa’ a biltep, a zietlam khutpi, le a zietlam kepite tungah khielna zieha biehna gan si kikoina munah nu ding hi.

²⁹A khut sunga sathau omlai teng pen siempu pa in a kisiensuo ding mipa adingin TOPA mai-ah thoidamna bawl nadingin a lu tungah nupieh ding hi.

³⁰Ama in vakhu ahi sihle paalva a piehzo zawzaw pie-in,

³¹khat[14] pen mawna zieha biehna ding, a khat pen meihal biehna dingin an tawh biehnate tawh piehtha ding hi; tuale siempu pa in a kisiensuo pa dingin TOPA mai-ah thoidamna bawlpieh ding hi.

³²Tami khu phah natna a vei, siensuo nading biehna a lui zo lo mipa dinga ngaina ahi hi.

³³TOPA in Moses le Aaron hopi-in tam bangin gen hi:

³⁴Keima in na luo ding vua kang pieh Canaan gamah nang pei uh ciengin na tenna mun inn khatah phah natna kang tunsah leh,

³⁵inn nei pa pei-in siempu pa kungah, “Ka inn sungah natna nam khat a om tawh kibang sa ing,” ci-in gen ding hi.

³⁶Siempu pa in tua inn sunga om van zosie a sieng lo a kici lo nadingin, tua natna kan dingin siempu pa a pei masangin tua inn a hawma a op nadingin thupie ding hi; tua zaw ciengin inn van dingin siempu pa pei ding hi.

³⁷Ama in a natna vel ding hi; inn kawm tung tengah natna omin, a engsim le a sansim ahi a, tua pen kawm maitang sangin a thuh zawh tuoh leh,

³⁸inn sung panin inn mai kotah siempu pa pusuohin ni sagi sung kot khahcip ding hi.

³⁹A ni sagi ni-in siempu pa peikia-in cienvel ding hi; kawm tung tengah tua natna a kizel leh,

⁴⁰siempu pa in tua natna banna suongte khawhdawhin khuo pulam nin buohna mun khat a pai dawh dingin thupie ding hi.

⁴¹Ama in inn sunglam kizutna zosie hiet siengsahin, a khawdawh uh a kizutna themneng zosie khuo pulam nin buohna mun khatah buo ding uhi.

⁴²Amate in suong dangte la-in tua suongte munah a koi ding vua, a zutna dang khat la-in tua inn zut ding uhi.

⁴³Ama in suongte ladawhin a inn hiet siengin a zut sieng zaw ciengin tua inn sungah natna a tunkia leh,

⁴⁴siempu pa pei-in cienvel ding hi; inn sung tengah tua natna a kizel zo tah leh, tua khu inn sunga om a zauhuoi phah natna ahi hi; tua pen a sieng lo ahi hi.

⁴⁵Ama in tua inn a suong a sing le a kizutna zosie phelsah ding a, khuo pulam nin buohna mun khatah a puosah ding hi.

⁴⁶Tua inn a kikha hun sunga a lut mi zosie nitah dongin a sieng lo hi ding hi;

⁴⁷tua inn sunga a lum mi zosie in a puonte a sawp sieng ding uhi; tua inn sunga anne zosie in zong a puonte a sawp sieng ding uhi.

⁴⁸Siempu pa pei-in a cienvel a, tua inn a kizut zaw ciengin natna a kizel nawn sih leh siempu pa in tua inn sieng hi, ci-in phuongzah ding hi; tua natna dam zo hi.

⁴⁹Tua inn siensuo nadingin ama in vata ni, taamtah sing le a ausan khau le hyssop na tawh lahtha-in,

⁵⁰vatate lahah khat pen tua tuisieng tunga leibeel sungah that ding a,

⁵¹tua vata hinglai tawh taamtah sing, hyssop sing le a ausan khaute lahtha-in, tua tenga kigo vata’ si tawh tuisieng sungah die-in tua inn sagi vei the ding hi.

⁵²Tua bangin ama in vata’ si tawh, tuisieng tawh, vata hinglai tawh, taamtah sing, hyssop sing le a ausan puon tawh a inn siengthosah ding hi;

⁵³tuale ama in khuopi pulam gamlahah tua vata hinglai hla ding hi; tuaci’n ama in tua inn adingin thoidamna bawlpieh ding a, tua inn a sieng hi ding hi.

⁵⁴Tami khu phah natna khatpo tawh kisai sep ding ngaina ahi hi: Cithah ading,

⁵⁵puonte le inn sunga om phah natnate ading,

⁵⁶cibaw ahi sihle hima ahi sihle cikhangte ading,

⁵⁷bang hun ciengin sieng lo a, bang hun ciengin sieng ahei ci-in khinkhai thei nading ahi hi. Tami khu phah natna tawh kisai bawldan ngaina ahi hi.