Read Zou SIEMPU LAIBU 15 Bible Online

SIEMPU LAIBU 15 - Zou bible

SIEMPU LAIBU 15

¹TOPA in Moses le Aaron hopi-in tam bangin ci hi:

²Israel mite kungah tam bangin gen in: Pasal khatpo a pumpi[15] panin a neitah tui a pei ciengin tua tui in ama a niehsah hi.

³A neitah tui zieha a sienlona tambang ahi hi: A pumpi panin a neitah tui a pei a, a pumpi panin a neitah tui pei a khawl zongin ama adingin sienlona ma hi veve hi.

⁴A neitah tui pei pa’ lupna zosie a sieng lo hi ding hi; tuale ama’ tona sil zosie a sieng lo hi ding hi.

⁵Ama’ lupna a thamkha poma in a puonte sawp siengin tui sungah kisil ding a, nitah dongin a sieng lo hi ding hi.

⁶A neitah tui pei pa khat’ tona tunga a to kha zosie in a puonsilte uh a sawp sieng ding vua, amate zong tui sungah kisilin nitah dong a sieng lo hi ding uhi.

⁷Tua a neitah tui a pei pa a thamkha mi poma in a puonsilte sawp sieng ding a, tui sungah kisilin nitah dongin a sieng lo hi ding hi.

⁸A neitah tui pei pa in a sieng mite tungah cil a siet leh amate in a puonsilte uh sawp siengin tui sungah a kisil ding vua, tuaci’n nitah dongin a sieng lo ahi ding uhi.

⁹A neitah tui pei pa’ tuonna sakolphaw khatpo zong a sieng lo hi ding hi.

¹⁰Ama’ nei-a a om na khat popo a thamkha mi zosie pen nitah dongin a sieng lo hi ding a, tua bang nate a puo kha zosie in a puonsilte sawp sieng ding a, tui sungah kisilin nitah dongin a sieng lo hi ding uhi.

¹¹A neitah tui pei pa in tui sungah a khut sil lopi-in a thamkhah mi zosie in a puonsilte uh a sawp sieng ding vua, tui sungah kisilin nitah dongin a sieng lo hi ding uhi.

¹²A neitah tui pei pa in a thamkhah lei tawh a kibawl vanzah poma kitawkeh ding hi; sing tawh a kibawl vanzahte tui sungah kisawp ding hi.

¹³A neitah tui pei pa khat a neitah tui luonna a sien ciengin, a sien nadingin ni sagi dong simto ding hi; ama in a puonte sawp ding a, tuisieng sungah kisilin ama a sieng hi ding hi.

¹⁴A ni giet ni-in ama in vakhu ahi sihle paalva ni la-in kikhopna puonbuh lutna TOPA mai-ah pei-in siempu pa kungah tuate pie ding hi.

¹⁵Siempu pa in tuate, khat mawna biehna ding le adang khat meihal biehna-in pie ding hi; tuale siempu pa in a neitah peina ziehin TOPA mai-ah thoidamna bawlpieh ding hi.

¹⁶Mi khatpo in bawtui a te leh tui sungah kisil ding a, nitah dongin ama a sieng lo hi ding hi.

¹⁷Tua bawtui tuhna puon ahi sihle savun zosie tui tawh kisawp ding a, nitah dongin a sieng lo hi ding hi.

¹⁸Pasal khat numei khat tawh lumtonin a bawtui a te leh a ni gelin tui sungah a kisil ding vua, nitah dongin a sieng lo hi ding uhi.

¹⁹Numei khat in a pum tung pana a hun mana a nei a nin a pei ciengin, ni sagi sung a niehin om ding a, ama a thamkha popo nitah dongin a sieng lo hi ding hi.

²⁰A nin nei sungin a lupna na zosie a sieng lo hi ding hi; ama’ tona sil zosie zong a sieng lo hi ding hi.

²¹Ama’ lupna a thamkha poma in a puonte sawp sieng ding a, tui sungah kisilin nitah dongin a sieng lo hi ding hi.

²²Ama’ tona a thamkha poma in a puonte sawp sieng ding a, tui sungah kisilin nitah dongin a sieng lo hi ding hi;

²³mi khatpo in ama’ lupna ahi sihle a tona na khatpo a thamkhah leh nitah dongin a sieng lo hi ding hi.

²⁴Pasal khatpo tua nu tawh lumtonin ama’ sienlona ama tunga a tun leh ni sagi sung ama a sieng lo hi ding hi; tuale ama’ lup khahna lupna zosie a sieng lo hi ding hi.

²⁵Numei khat in a nin nei hun sung hi lopi-in ni tampi sung a si pei ahi a, a nin pei hun valin nin a nei leh a nin nei ni hun sung teng ama a sieng lo hi ding hi; a nin pei hun sung bang ma-in ama a sieng lo hi ding hi.

²⁶A nin nei hun sung tungtawna a lupna zosie a nin nei sunga a lupna tawh kibangin kingaisun ding hi; a nin nei sungin a sieng lo ahi ma bangin a tona zosie zong a sieng lo hi ding hi.

²⁷Tam nate a tham kha poma a sieng lo hi ding a, a puonte sawpin tui sungah kisil ding a, nitah dongin a sieng lo hi ding hi.

²⁸A nin neina panin a sien leh ni sagi dong simto ding a, tua zaw ciengin ama a sieng hi ding hi.

²⁹A ni giet ni-in tua nu in gam vakhu ni ahi sihle paalva ni la-in, kikhopna puonbuh lutna siempu pa kungah peipi ding hi.

³⁰Siempu pa in khat pen mawna biehna dingin pie ding a, a khat pen meihal biehna dingin pie ding hi; a nin neina hang tawh a sien lona ziehin siempu pa in TOPA mai-ah tua nu adingin thoidamna bawlpieh ding hi.

³¹Tua bangin a laizang vua a om ka biehbuh a buasah ziehun, a sien lona uh sungah a si lo nadingun a sien lona panun Israel mite na tuomkoi ding uhi.

³²Tami khu a neitah tui peite dinga bawldan ngaina ahi hi: Bawtui a te zieha a sieng lo a suoh mipa ading,

³³tua nu a nin nei huna thazawm hun sung ading, a neitah tui a luong numei le pasal a koimapo ading, le a sieng lo numei tawh a lumton mipa ading ahi hi.