Read Zou SIEMPU LAIBU 16 Bible Online

SIEMPU LAIBU 16 - Zou bible

SIEMPU LAIBU 16

¹Aaron’ tapa nite in TOPA mai nehin a silaw zaw cieng gelin TOPA in Moses hopi hi.

²TOPA in Moses kungah gen hi: Thuciemna singkuong tunga hepina topha[16] mai, dalna puon sunglam siengtho munah a nop hunhuna ang mawh pei lo nadingin na sanggampa Aaron kungah gen in. Ang mawh pei leh a si ding hi; azieh pen tua hepina topha tunga meiilum lahah keima ka kilaa hi.

³Mun siengtho sungah Aaron ang lut dan ding tam bang ahi hi: Mawna zieha biehna dingin bawngtangno khat le meihal biehna dingin tuutang khat tawh ang lut ding hi.

⁴Ama in a siengtho saihadiel puontungsil sil ding a, a pumpi tungah saihadiel bawngbi tengin saihadiel kawngga tawh kigah ding a, saihadiel dielpi khim ding hi. Tam teng pen a siengtho puonte ahi hi. Tui sungah ama kipumsil ding a, tua ciengin tua puonte sil ding hi.

⁵Ama in Israel mihonte kung panin mawna zieha biehna dingin keeltang ni le meihal biehna dingin tuutang ni la ding hi.

⁶Aaron in amama adingin mawna zieha biehna-in bawngtang khat pie-in, ama le a innkuonpite adingin thoidamna bawl ding hi.

⁷Ama in keel ni la-in kikhopna puonbuh lutna-ah koi ding hi;

⁸Aaron in tua keel tegel tungah ai sanin, khat pen TOPA ading, adang khat pen Azazel[17] ading ahi hi.

⁹TOPA ading aai a tuhna keel pen Aaron in peipi-in mawna zieha biehna-in pie ding hi;

¹⁰ahi vangin Azazel dinga ai a tuhna keel pen gamlahah Azazel kungah sawl dawhin thoidamna a kibawl thei nadingin TOPA mai-ah a hingin kipeipi ding hi.

¹¹Aaron in amama adingin mawna zieha biehna-in bawngtang khat pie-in, ama le a innkuonpite adingin thoidamna bawlpieh ding hi; amama adingin zong mawna zieha biehna-in bawngtang go ding hi.

¹²Ama in TOPA mai maitam panin meikam a dim meiluona kuong khat le, a kigawtvui gimnamtui khutdim ni la-in dalna puon sungah peipi ding a,

¹³gimnamtui khu in thuciemna singkuong[18] tunga om hepina topha[19] a tuom thei nadingin TOPA mai-a mei tungah tua gimnamtui koi ding hi. Tua banga a bawl sih leh ama si ding hi.

¹⁴Ama in bawngtang si kimkhat la-in, a khutme tawh hepina topha a mailam tungah the ding a, hepina topha mai-ah a khutme tawh sagi vei the ding hi.

¹⁵Ama in mite adingin mawna zieha biehna keel go-in dalna puon sungah a si peipi ding a, bawngsi a the ma bangin a si the-in hepina topha tung le hepina topha mai-ah the ding hi.

¹⁶Ama in tua bangin Israel mite’ sienlona, amau’ thupalsatna, le amau’ mawna teng zosie ziehin mun siengtho adingin thoidamna bawl ding a, amau’ sienlona laizanga amate tawh a om den kikhopna puonbuh adingin tam bang ma-in bawl ding hi.

¹⁷Mun siengtho sungah thoidamna bawl dingin a lut huna kipanin ama ading, a innkuonpite ading, le a kikhawm Israel mihon zosie adingin thoidamna a bawl zaw a pusuokia masangsie, kikhopna puonbuh sungah koima om thei lo ding hi.

¹⁸Tua ciengin TOPA mai-a a om maitam-ah pei-in maitam siensuona bawl ding a, bawngtang si le keelsi kimkhat la-in maitam kimvela om a kite nu ding hi.

¹⁹Ama in tua tungah a si kimkhat a khutme tawh sagi vei the-in siensuo ding a, Israel mite’ sienlona panin siengthosah ding hi.

²⁰Ama in siengtho mun le kikhopna puonbuh le maitamte adingin thoidamna a bawlpieh zaw ciengin keel hinglai peipi ding hi.

²¹Tua ciengin Aaron in a hinglai keel lu tungah a khutgel ngam ding a, Israel mite’ khielna zosie, amau’ thupalsatnate zosie, amau’ mawnate zosie le amau’ khielna zosie thumpieh ding a, keel lu tungah tua teng suonin tuami nasep[20] sem dinga a kisesa mi khatin gamlahah tua keel heumang ding hi.

²²Tua keel in a tungah amau’ khielna zosie puo-in gammang tulahah pei ding hi; tuale gampa lahah a keel kihla ding hi.

²³Tua ciengin kikhopna puonbuh sungah lut ding a, mun siengtho a lut masah lai-a a sil saihadiel puonte sutdawhin tua munah nuasie ding hi.

²⁴Ama in mun siengtho khatah tui tawh kipumsilin a puonte sil ding hi; tua ciengin pusuohin a meihal biehna le mite’ meihal biehna pie-in, ama ading le mite adingin thoidamna bawlpieh ding hi.

²⁵Ama in maitam tungah mawna zieha biehna thau haltum ding hi.

²⁶Azazel kunga keel a hlapa in a puonte sawpin tui sungah kipumsil ding a, tua zaw ciengin giephuol zuon thei ding hi.

²⁷Siengtho munah thoidamna dinga a si kipeipi ahi mawna zieha biehna bawngtang le khielna zieha biehna keelte pen giephuol pulamah kipeipi ding hi; a vunte, a telte le a ehte mei tawh kihaltum ding hi.

²⁸Tuate a halpa in a puonte sawpin tui sungah kipumsil ding a, tua zaw ciengin giephuol lam zuon thei ding hi.

²⁹Tami khu note dingin tawntung thukham hi ding hi: Hla sagina, tua hla a ni sawm ni-in, no le no kidehin[21] tuolsung mi hile na lah vua ang pem khuolmi hile bangma na sem sih ding uhi.

³⁰Azieh pen tuami ni-in na sien nadingun thoidamna kibawl ding hi; TOPA mai-ah na mawna zosie panun na sieng ding uhi.

³¹Tam pen note dinga a bukim tawlngahna Sabbath ahi a, no le no na kideh[22] ding uhi; tua khu tawntung thukham ahi hi.

³²A pa tangin siempu dingin sathau kinu-in a kisudet siempu pa in a siengtho saihadiel puon silin thoidamna bawl ding hi.

³³Ama in mun siengtho adingin thoidamna bawl ding a, kikhopna puonbuh le maitam adingin zong thoidamna bawlin, siempute ading le a kikhawm mihonte zosie adingin zong thoidamna bawl ding hi.

³⁴Tami khu kum khatin khatvei amau’ mawna vannuoi ziehin Israel mite adingin thoidamna bawl nadinga a kizang den ding ngaina kip ahi hi. TOPA’ thupiehsa bangin Moses in a bawl hi.