Read Zou SIEMPU LAIBU 18 Bible Online

SIEMPU LAIBU 18 - Zou bible

SIEMPU LAIBU 18

¹TOPA in Moses hopi-in gen hi:

²Israel mite kungah tam bangin gen in: Keima TOPA na Pasien uh ka hi hi.

³Na tenna uh Egypt leitanga a teng mite’ gamtat bangin na gamta sih ding vua, kang peipi nading Canaan leitanga a teng mite’ gamtat bangin zong na gamta sih ding uhi. A thukhamte uzong na zui sih ding uhi.

⁴Ka biehna ngaina kipte na tang ding vua, ka thukhamte na zui ding uhi: Keima TOPA na Pasien uh ka hi hi.

⁵Ka thukhamte le ka biehna ngaina kipte na zui ding uhi; tua banga a zui pa khu a hing ding hi: Keima TOPA ka hi hi.

⁶Note koima in luppi dingin na kinaipi uh tanaute khatpo na nai sih ding uhi: Keima TOPA ka hi hi.

⁷Na nu na luppi ziehin na pa na mindaisah sih ding hi; ama na nu ahi ziehin na luppi sih ding hi.

⁸Na pa zi’ na luppi sih ding hi; tua khu na pa’ mindai nading ahi hi.

⁹Tuol sunga suoh ahi a, khuol gama suoh ahi zongin, na sanggamnu, na pa’ tanu, ahi sihle na nu’ tanute na luppi sih ding hi.

¹⁰Na tapa’ tanu ahi sihle na tanu’ tanute na luppi sih ding hi, azieh pen amau’ maizumna pen nangma’ maizumna veve ahi hi.

¹¹Na pa pana a pieng, na pa’ zi tanu na luppi sih ding hi. Azieh pen ama na sanggam nu ahi bo hi.

¹²Na pa’ sanggamnu na luppi sih ding hi; ama nu pen na pa’ si le sa ahi bo hi.

¹³Na nu’ sanggamnu na luppi sih ding hi, azieh pen ama na nu’ cilesa ahi bo hi.

¹⁴Na pa’ sanggampa na luppi sih ding hi; tua pen ama’ zi na nai sih ding hi, a ci nopna ahi hi; ama pen na innlah nu ahi hi.

¹⁵Na monu na luppi sih ding hi: Ama na tapa’ zi ahi hi; ama na luppi sih ding hi.

¹⁶Na sanggampa’ zi na luppi sih ding hi; tua khu na sanggampa’ mindaina ahi hi.

¹⁷Numei khat le a tanu na luppi sih ding a, luppi dingin tua numei’ tapa’ tanu ahi sihle a tanu’ tanute na la[23] sih ding hi.; amate nangma’[24] cilesa ahi bo vua, tua banga gamtatna pen gamtat sietna ahi hi.

¹⁸A sanggamnu suon dingin na nuphal nu zi-in na la[25] sih ding a, a sanggamnu hin lai pima-in ama na luppi sih ding hi.

¹⁹Numei khat a nin pei-in a sien lo laitahin luppi dingin na neh sih ding hi.

²⁰Na sanggampa’ zi na luppi sih ding a, tua nu tawh na kibuasah sih ding hi.

²¹A kithoi nadingun Molech tungah na suon na hlahte khatpo na pie sih ding a, Pasien’ min na daisah sih ding hi. Keima TOPA ka hi hi.

²²Numei khat tawh na lupton bangin pasal khat tawh na lumton sih ding hi; tua khu sil kidahhuoi ahi hi.

²³Ganhing khatpo tawh maw-in tua tawh na kibuasah sih ding a, numei khatpo in zong ganhing khatpo mawpi dingin ama’ pumpi a pie sih ding hi; tua khu piensuolna ahi hi.

²⁴Tam teng khatpo tawh noma le noma na kibuasah sih un, azieh pen na masang vua ka nawdawh minamte in tam bang gamtatna zosie tawh amau le amau a kibuasah uhi.

²⁵Tua bangin leitang a bua a suoh hi; tuale khielna ziehin tua leitang dan ka pie ding a, leitang in ama tunga a teng mite a luokhie hi.

²⁶Hinanle na lah vua a teng tuolsung mi hile pemtate hile ka thukhamte le ka biehna ngaina kipte na zui ding uhi,

²⁷(azieh pen na masang vua a om tuolsung mite in a kidahhuoi tam nate zosie a sem vua, tuaci’n leitang a bua ahi ta hi);

²⁸tua bang ahi sihle ama na buasah ziehun na masang vua minamte a luohkhiet bangin leitang in note ang luokhie ding hi.

²⁹Azieh pen tam kidahhuoi nate a sem poma a mite lah panin kinotmang ding hi.

³⁰Tuaci’n na mai vua kizang tam a kidahhuoi khatpo na sepkhah lo nading ule tuate tawh na kibuasah lo nadingun kang thuhil zui un: Keima TOPA na Pasien uh ka hi hi,” a ci hi.