Read Zou SIEMPU LAIBU 19 Bible Online

SIEMPU LAIBU 19 - Zou bible

SIEMPU LAIBU 19

¹TOPA in Moses hopi-in tam bangin ci hi:

²Israel mihonte zosie tam bangin hopi in: Note na siengtho ding uhi, azieh pen keima TOPA na Pasien uh ka siengtho hi.

³Note khat ciet in na nu le na pa zatahin ka Sabbath-te na tang ding uhi. Keima TOPA na Pasien uh ka hi hi.

⁴Milimte lamah kihei sih unlen, noma dingin a kisungtawm pasien-te bawl sih un: Keima TOPA na Pasien uh ka hi hi.

⁵TOPA tungah thunuom biehna na pieh ciengun, note tangin tuate a kisan thei nadingin tam bang danin pie un.

⁶Na pieh ni ma uh ahi sihle a zing ciengin kine ding hi; a ni thum ni donga a kine lo a val poma mei tawh kihal ding hi.

⁷A ni thum ni-in a kineh lai leh tua pen a kidahhuoi ahi hi; tua pen kisang lo ding hi.

⁸Tua a ne mi zosie in mawna dan thuoh ding uhi. Azieh pen amate in TOPA tunga sil siengtho pen a niehsah zo ahi ta vua, tua bang mi poma a mite sung panin kihemkhie ding hi.

⁹Na leitang tung panun an na lah ciengun na lo gei dongun na la sih ding vua, na ansangh uzong na khawm sih ding uhi.

¹⁰Na lengga lo vuah lenggate na lo sieng sih ding vua, tuola a kie lenggate zong na tung sih ding uhi; mizawngte le pemtate adingin tuate na nuasiepieh ding uhi: Keima TOPA na Pasien uh ka hi hi.

¹¹Na guta sih ding uhi; a man loin zong na gamta sih ding vua, khatlekhat na kisol sih ding uhi.

¹²A man loin ka min tawh na kiciem sih ding vua, na Pasien uh’ min na daisah sih ding uhi: Keima TOPA ka hi hi.

¹³Na vengte na sol sih ding uhi; na guta sih ding uhi; noma dingin zingmawng cieng dongin nasem khat’ thaman na kem sih ding uhi.

¹⁴Bilbingte hamsiet loin mittawte mai-ah a suikhah ding nate na koi sih ding uhi; na Pasien na zatah ding uhi: Keima TOPA ka hi hi.

¹⁵A dih lo thukhenna na nei sih ding uhi; mizawngte deisah tuom loin miliente na mai-et tuom sih ding uhi: thuman tawh na vengte thu na khen ding uhi.

¹⁶Na mite lah vuah mi gensiete[26] bangin suhva tova sih unlen, na vengte’ sisan[27] tawh phattuom na sui sih ding uhi: Keima TOPA ka hi hi.

¹⁷Na lungtang sung vuah na tanaute khatpo na muda sih ding uhi; na vengte thu na hil ding uhi, tua hi sihle ama’ khielna na puo ding uhi.

¹⁸Na mite uh khatpo tungah phu la loin na kilungsimpuoh sih ding vua, noma na ki-it bangun na vengte na it ding uhi: Keima TOPA ka hi hi.

¹⁹Ka thukhamte na zui ding uhi. Namdangte tawh na gante uh ta na neisah sih ding uhi; na lo vuah khaici nam ni na vaw sih ding uhi; khau nam ni tawh a kigan puon zong na sil sih ding uhi.

²⁰Pasal khat in midang khat tawh kikhamsa hi napi a kitan nai lo ahi sihle suotahna kipie nai lo sila nu khat a luppi leh thukanna kinei ding hi. Tua nu suohta nai lo ahi ziehin amate kithat lo ding hi;

²¹hizongle tua pa in amama adingin khielna zieha biehna dingin tuutang khat, kikhopna puonbuh lutna TOPA kungah peipi ding hi.

²²Siempu pa in ama’ bawlsa mawna dingin khielna biehna tuutang tawh TOPA mai-ah ama adingin thoidamna bawlpieh ding hi; tuale a bawlsa a mawna kimaisah ding hi.

²³Khum gamah lutin neh dingin singkung namcin na suon ciengun tua singgate a kikham[28] bangin na ngaisun ding uhi; note dingin tua singgate kum thum sung kikham[29] ding a, kine lo ding hi.

²⁴A kum lina ciengin a ga zosie lungdamna biehna-in TOPA tungah kituomkoi ding hi.

²⁵Ahi vangin a kum ngana ciengin note dinga tuate ang ga semsem nadingin a gate na ne thei ding uhi: Keima TOPA na Pasien uh ka hi hi.

²⁶Na khatpopo a si tawh na neton sih ding uhi. Mailam thugen kholna ahi sihle aisanna na nei sih ding uhi.

²⁷Na lu kimvelin na sam uh heusieng loin na khamul mongte uzong na tan sih ding uhi.

²⁸Misite adingin na citung uh liemsah loin na ci tung vuah ciemtena khatpo na sun sih ding uhi: Keima TOPA ka hi hi.

²⁹Gam sung pahtatna suohin gamtat sietnate tawh a kidim lo nadingin pahtatna tawh na tanute na daisah sih ding uhi.

³⁰Ka Sabbath-te na tang ding vua, ka mun siengtho na zatah ding uhi: Keima TOPA ka hi hi.

³¹Dawilawm neite le bumtawite lamah kihei sih un; amate tawh a kibuasah dingin amate sui sih un: Keima TOPA na Pasien uh ka hi hi.

³²Khanghamte mai-ah dingin putehte’ maitang na zatah ding uhi; na Pasien uh na zatah ding uhi: Keima TOPA ka hi hi.

³³Na gam sung vuah pemta khat tawh na tenton ciengun tua pemta pa na gawt sih ding uhi.

³⁴Na tentonpi uh pemta khat pen note dingin tuolsung mi hi ding hi; noma bangin pemtate na it ding uhi, azieh pen no zong Egypt gamah pemta na hi ngai uh: Keima TOPA na Pasien uh ka hi hi.

³⁵A sau tena, a gih tena, ahi sihle a nem tenate-ah a man lo zangin mi na sol sih ding uhi.

³⁶Tawikhaina a man, tawisuong a man, ephah a man, hin[30] a mante na nei ding uhi: Egypt gam pana note ang peipi keima TOPA na Pasien uh ka hi hi.

³⁷Ka thukham zosie le ka biehna ngaina kipte zosie zui-in tuate na tang ding uhi: Keima TOPA ka hi hi.