Read Zou SIEMPU LAIBU 21 Bible Online

SIEMPU LAIBU 21 - Zou bible

SIEMPU LAIBU 21

¹TOPA in Moses hopi-in tam bangin a gen hi: Aaron’ tapa siempute hopi inlen tam bangin gen in: A unau sanggamte lahah a koima in misi khat po,

²a kinaipi pente ahi, a nu, a pa, a tapa, a tanu, a sanggampa-te hang ci simlo ama le ama kibuasah lo ding hi;

³tua ma bangin a sanggam nungah nu hangin ama kibuasah thei ding hi, azieh pen tua nu in pasal a nei lo ziehin ama tawh kinai ahi hi.

⁴Ahi vangin a mite lahah mi khat’ pasal khat bangin ama le ama kibuasah loin kimindaisah lo ding hi.

⁵A lutung vuah a behkieu mun a bawl sih ding vua, a khamul mong uzong tantom loin a ci tung vuah liemma themkhat zong a bawl sih ding uhi.

⁶A Pasien tung vuah a siengtho ding vua, a Pasien uh’ min a daisah sih ding uhi; azieh pen amate in a Pasien’ uh an ahi mei tawh TOPA’ biehna a pie uhi; tua ahi ziehin amate a siengtho ding uhi.

⁷Amate in numei pahtat ahi sihle numei a buasate a kinunpi thei sih ding uhi; a pasal in a khulsa numei zong a kinunpi sih ding uhi. Azieh pen amau’ Pasien adingin siempute a siengtho uhi,

⁸tuale amate in na Pasien uh’ an a pieh ziehun amate a siengtho-in na ngaisun ding uhi; Note ang siengsah pa, TOPA ahi keima ka sientho ziehin note dingin amate siengtho ding uhi.

⁹Siempu khatpo’ tanu in a pahtatna tawh ama le ama a kidaisah leh a pa daisah ahi hi; ama nu mei tawh kihaltum ding hi.

¹⁰A guolte lah panin a kitawisang, a lu tunga sathau siengtho kibuoh, le a puonte sil dinga a ki-apsa siempu pa in a sam paw loin koi lo ding a, a puonsilte zong ehsah lo ding hi.

¹¹Mi siluong opna munah ama pei lo ding hi; a nu ahi sihle a pa luong nangawn tawh ama le ama kibuasah lo ding hi.

¹²Mun siengtho pulamah pusuoh loin a Pasien’ mun siengtho zong daisah lo ding hi; azieh pen ama tungah Pasien-a’ ahi suhdetna sathau a om hi. Keima TOPA ka hi hi.

¹³Ama pen ngahnu siengtho numei beh tawh kinung ding hi.

¹⁴Ama in meigong, ahi sihle a kikhulsa numei, ahi sihle a buasa numei, le a pahtat numei, tam teng tawh kinung lo ding hi. A tanaute lah panin ngahnu siengtho khat tawh kinung ding hi.

¹⁵Tua khu ama in a tanaute lahah ama’ suonlehlahte a daisah lo nading ahi hi; azieh pen ama a siengsah pa keima TOPA ka hi hi.

¹⁶TOPA in Moses hopi-in tam bangin a gen hi:

¹⁷Aaron hopi inlen tam bangin gen in: A khang khanga na suonlehlahte lahah poina a nei mi koima in an pie dingin a Pasien neh thei lo ding hi.

¹⁸Azieh pen poina a nei mittaw ahi sihle khelbai, ahi sihle maihem ahi sihle khut le keng a behsau,

¹⁹khut tawng keng tawng,

²⁰ahi sihle ngumbaw, ahi sihle mitun cing lo, ahi sihle mit hem, ahi sihle cithah vei, ahi sihle hima nei, ahi sihle a cilkeh poma in ei neh thei lo ding hi.

²¹Aaron siempu pa’ suonlehlahte sung panin TOPA’ meihal biehna pie dingin a nai-ah koima pei lo ding hi; tua pa pen poina nei ahi ziehin a Pasien’ an pie dingin a nai-ah pei lo ding hi.

²²Ama in a Pasien’ anlum, a siengtho pente le a siengtho nate ne thei ding hi.

²³Ahi vangin ama in poina a nei ziehin ka mun siengthote a daisah lo nadingin dalna puon ahi sihle maitam lamah pei thei lo ding hi, bang ding ahei cile keima TOPA ka hi hi; keima in amate ka siengsah hi.

²⁴Tua bangin Moses in Aaron le a tapate le Israel mi zosie kungah a gen hi.