Read Zou SIEMPU LAIBU 22 Bible Online

SIEMPU LAIBU 22 - Zou bible

SIEMPU LAIBU 22

¹TOPA in Moses hopi-in tam bangin a gen hi:

²Aaron le a tapate in ka min siengtho a daisah lo nadingun Israel mite in keima tunga ang pieh a siengtho silpiehte a zatah siem nadingun hil in; keima TOPA ka hi hi.

³Amate kungah tam bangin gen in: Na khang tawntungun na suonlehlahte uh mi khatpo in a sien lo laitahin, TOPA tunga Israel mite pieh ahi silpieh siengtho nate a nai leh ka opna panin keima in tua pa ka hemkhie ding hi: Keima TOPA ka hi hi.

⁴Aaron’ suonlehlahte lah panin phah natna[32] vei ahi sihle a neitah tuiluong khatpo in ama a sientho masangsie tua a siengtho nate ne thei lo ding hi. Misi a tham zieha a sieng lo poma, a bawtui luon zieha a sieng lo poma,

⁵ama a bua thei nadinga a bawhva ganhing khat a tham poma, ama’ sien lona pen bang bang hi tale,

⁶tua bang na khatpo a tham pa pen nitah dongin a sieng lo hi ding a, tui sungah a kipumsil sih leh ama in tua a siengtho nate a ne sih ding hi.

⁷Ni a tum ciengin ama a sieng hi ding hi; tua zaw ciengin ama in a siengtho nate ne thei ding hi. Bangzieh ahei cile ama’ an tuate ahi hi.

⁸Ama in sapul sa ahi sihle gamsate’ pelup sa ne lo ding a, tua tawh ama a sieng lo a kisuohsah sih ding hi: Keima TOPA ka hi hi.

⁹Amate in khielna bawlin mun siengtho[33] a buasah ziehun tua sungah a si lo nadingun ka thuhilte a zui ding uhi. Amate a siengsah pa khu keima TOPA ka hi hi.

¹⁰A pulam mi in silpieh siengthote ne thei lo ding hi. Siempu pa’ inna om pemtate in hile, a kiguoi tengtate in hile tua silpieh siengthote a ne thei sih ding uh;.

¹¹ahi vangin siempu khat in a sum tawh mi khatpo a lei leh tua pa in tuate ne thei ding a, a inn sunga a suoh mite in ama’ an a ne thei ding uhi.

¹²Siempupa’ tanu khat in a pulam mi khat a kinunpi leh tua nu in silpieh siengthote ne thei lo ding hi;

¹³ahi vangin siempupa’ tanu pen suonlehlah nei loin meigong ahi sihle a kikhul ahi a, a ngahnut lai ma bangin phungkia-in a pa’ inn a zotkia leh tua nu in a pa’ an ne thei ding hi. A pulam mi in tua an ne thei lo ding hi.

¹⁴Mi khat in tupna nei loin silpieh siengtho a neh khah leh ama in a na manza’ senga lahah sekhat belapin, siempu pa tungah silpieh siengtho pie ding hi.

¹⁵TOPA tunga a pieh uh Israel mite’ silpieh siengthote koima in buasah lo ding a,

¹⁶tua a siengtho silpiehte nehna ziehin amate in khielna zieha biehna pieh ding kisam za dongin tua khielna a puosah sih ding hi: Azieh pen keima TOPA ka hi hi; keima in amate ka siengsah hi.

¹⁷TOPA in Moses hopi-in tam bangin a gen hi:

¹⁸Aaron le a tapate le Israel mi zosie hopi inlen a kung vuah tam bangin gen in: Israel innkuonte lahah hile, Israel gam sunga a teng pemtate lahah hile, mi khatpo in TOPA tungah kiciemna ahi sihle nop thu-a biehna ahi meihal biehna a pieh ciengin,

¹⁹tuate ang kisanpieh thei nadingin bawngtang hile tuu hile keel hile genbaang lo apa khat na pie ding uhi.

²⁰Genbaang khatpo na pie sih ding uhi. Azieh pen note dingin tuate kisang lo ding hi.

²¹Mi khatpo in a kiciemna khat ahi sihle nop thu-a a biehna khat a tangtun thei nadingin bawnghon pan hile, tuu le keel hon pan hile TOPA tungah thunuoma biehpiehna khat a pieh ciengin a kisan thei nadingin a ganhing pen a bukim hi ding hi; paubaanna om lo ding hi.

²²TOPA tungah ganhing a mittaw, ahi sihle a liem, ahi sihle a gutawng, ahi sihle hima nai nei, ahi sihle cithah vei ahi sihle hima pawn neite na pie sih ding vua, ahi sihle meihal biehna dingin maitam tungah tuate khatpo na koi sih ding uhi.

²³Nopthu-a biehna dingin bawngtang khat ahi sihle a keng tuomsau ahi sihle a keng tuomtom tuu khat na pie thei ding uhi; ahi vangin kiciemna dingin tuate kisang lo ding hi.

²⁴TOPA tungah a ciltang liemsa ahi sihle a ciltang kitawkehsa ahi sihle a ki-atkhesa, ahi sihle a kiladawhsa ganhing khatpo na pie sih ding vua, na gam sung vuah tua bangin na bawl sih ding uhi.

²⁵TOPA na Pasien uh tunga an tawh silpieh dingin gamdang mi khatpo kung pana kinga ganhingte na sang sih ding uh;. azieh pen amate genbaangin melsie uh ahi ziehin note dingin tuate kisang lo ding hi.

²⁶TOPA in Moses hopi-in tam bangin ci hi:

²⁷Bawng khat ahi sihle tuu khat ahi sihle keel khat a suo ciengin a nu tawh ni sagi sung omton ding a, a ni giet ni panin tua ganno pen TOPA kungah mei tawh a kihal biehna dingin kisang thei ding hi.

²⁸Ahi vangin bawnghon lah panin hile, tuu le keelhon lah panin hile, api pen a tasen tawh ni khat thu-in na goton sih ding uhi.

²⁹Lungdamkona silpieh ahi biehpiehna na lui ciengun, note tanga ang kisan thei nadingin TOPA tungah tua biehpiehna na pie ding uhi.

³⁰Khumi ni ma-in tuate kine ding hi; zingmawng dongin khat beh na hen si ding uhi: Keima TOPA ka hi hi.

³¹Tua ahi ciengin ka thupiehte zui-in na tang ding uhi: Keima TOPA ka hi hi.

³²Israel mite lahah ei kisiensah thei nadingin ka min siengtho na daisah sih ding uhi: Keima TOPA ka hi hi; keima in note ka siengsah hi,

³³na Pasien uh ahi dingin Egypt gam panin ang peipi pa keima ka hi hi: Keima TOPA ka hi hi.