Read Zou SIEMPU LAIBU 23 Bible Online

SIEMPU LAIBU 23 - Zou bible

SIEMPU LAIBU 23

¹TOPA in Moses hopi-in tam bangin a gen hi:

²Israel mite hopi inlen tam bangin gen in: A siengtho biehpieh kikhopnate ahi hi, ci-in na tangtawh ding uh a kisesa TOPA’ pawite tam teng ahi hi.

³Ni guh sungin nasep kizo ding hi; hizongle a ni sagi ni pen a bukim tawlngahna Sabbath, a siengtho biehpieh kikhopna ahi hi; note in na na sem sih ding uhi: tua khu na tenna zosie vuah TOPA dinga Sabbath ahi hi.

⁴Tam teng pen a kise TOPA’ pawite, amate dingin a kise huna na bawlpieh ding uh a siengtho biehpieh kikhopnate ahi hi.

⁵A hla masa, tua hla a ni sawm le ni li ni a nitah lamin[34] TOPA tungah peisan pawi biehna om ding a,

⁶tua hla a ni sawm le ni nga ni pen TOPA tungah tol saw lo anlum pawi ahi hi; ni sagi sung tol saw lo anlum na ne ding uhi.

⁷A ni masa ni-in a siengtho biehpieh kikhop khat na nei ding vua, leitung nate na sem sih ding uhi.

⁸Azieh pen note in TOPA tungah ni sagi sung meihal biehna na pie ding uhi; a ni sagi ni-in siengtho biehpieh kikhop khat om ding hi: note in leitung nate na sem sih ding uhi.

⁹TOPA in Moses hopi hi:

¹⁰Israel mite hopi inlen tam bangin gen in: Keima in na tung vua kang pieh ding gamah lutin bu na at ciengun siempu pa kungah na buphai at masa pen uh na tawi ding uhi.

¹¹San thei-a na op nadingun TOPA mai-ah ama in tua buphai vei ding a, sabbath zaw a zing ciengin siempu pa in tua buphai a vei ding hi.

¹²Buphai na vei ni-un TOPA tungah meihal biehna dingin tuuno apa khat TOPA na pie ding uhi.

¹³Tua tawh kipiehtha ding an tawh biehna dingin sathau kisawsa annel ephah khat’ sesawm-suo-seni hi ding hi; tua khu TOPA kipie a gimnamtui ding meihal biehna ahi hi; tua tawh a kipiehtha ding dawn thei biehna dingin lenggazu hin khat’ seli-suo- sekhat hi ding hi.

¹⁴Na Pasien uh’ biehna na tawi masang uh, tua ni masangin anlum ahi sihle a ki-em an ahi sihle ansielte na ne sih ding uhi: Tua khu na tenna mun vannuoi vuah na khang tawntung vua na zui ding uh ngaina khat hi ding hi.

¹⁵Sabbath ni zaw ciengin a kivei biehna dingin buphai na tawi ni vua kipanin nipi sagi na simto ding uhi; tuate pen a bih hi ding hi.

¹⁶Sabbath sagina zaw a zing cieng dong ni sawmnga dong na simto ding uhi; tua ciengin TOPA kungah an tha tawh biehna na pie ding uhi.

¹⁷A kivei biehna dingin na tenna uh panin TOPA tungah ephah khat’ sesawm-suo-seni tuoh tawh a kibawl anlum ni na tawi ding uhi; tuate pen annel tawh a kibawl, tol tawh ki-em, TOPA tungah anpal-a kipie dingte ahi hi.

¹⁸Anlum tawh kum khat a pha, a paubaang lo tuuno sagi, bawngno khat, le tuutang ni na pie ding uhi. Tuate, an tawh biehna le dawn thei biehnate tawh TOPA tunga kipiehtha meihal biehna hi ding hi; tuate pen TOPA a lungkimsah a gimnamtui mei tawh kihal biehna ahi hi.

¹⁹Mawna zieha biehna dingin keel apa khat, le thunuom biehna dingin kum khat a pha tuuno apa ni na pie ding uhi.

²⁰Siempu pa in TOPA mai-ah tuate a kivei biehna-in anpal anlum le tuuno ni tawh veiton ding hi; siempu pa adingin tuate TOPA mai-ah a sieng hi ding hi.

²¹Khum ni ma-in note in tang na tawh ding uhi; note in a siengtho biehpieh kikhop khat na nei ding uhi; note in leitung nasepte na khawl ding uh. Tam pen na tenna uh mun vannuoi-ah na khang tawntung vua na zui zing ding uh thukham ahi hi.

²²Na leitang pan vua an na lah ciengun na lo gei dong uh la loin, na ansanghte uzong na khawm sih ding uhi; tuate pen mizawngte le pemtate na nuasiepieh ding uhi: Keima TOPA na Pasien uh ka hi hi.

²³TOPA in Moses hopi-in tam bangin a gen hi:

²⁴Israel mite kungah tam bangin gen in: A hla sagi veina, tuami hla masa ni-in a bukim tawlngahna ni khat, pengkul awte tawh phawna a kibawl a siengtho biehpieh kikhop khat na nei ding uhi.

²⁵Note in leitung nasepte na sem sih ding uhi; mei tawh TOPA’ meihal biehna na peipi ding uhi.

²⁶TOPA in Moses hopi-in tam bangin a gen hi:

²⁷Tu-in tam a hla sagina a ni sawm ni khu thoidamna ni ahi hi; note adingin a siengtho biehpieh kikhop khat hi ding hi: Noma le noma[35] na kideh ding vua, tuaci’n TOPA tungah meihal biehna na pie ding uhi;

²⁸tuami ni bup sung tungtawnin na na sem sih ding uhi; bang ding ahei cile tuami khu TOPA na Pasien mai vuah note tanga thoidamna bawl nadingin thoidamna bawl ni ahi hi.

²⁹Bangzieh ahei cile tua nibup sung tungtawnin ama le ama kidehna[36] a bawl lo poma a mite lah panin kihemkhie ding hi.

³⁰Tuami nibup sung tungtawnin tua banga nasem poma a mite lah panin ka susie ding hi.

³¹Note in na na sem sih ding uhi: Tuami ni pen na khang tungtawn vua na tenna uh mun zosie-ah zui ding thupieh khat hi zing ding hi.

³²Tuami ni pen note dingin a bukim tawlngahna Sabbath ni khat hi ding a, noma le noma[37] na na kideh ding uhi; tua hla a ni kuo nitah panin a nitah kia dong na Sabbath uh na tang ding uhi.

³³TOPA in Moses hopi-in tam bangin a gen hi:

³⁴Israel mite hopi inlen tam bangin gen in: Tami hla a sagina ni sawm le nga ni panin ni sagi sung, TOPA adingin buh pawite[38] om ding hi.

³⁵A ni masa ni pen a siengtho biehpieh kikhop hi ding hi; note in leitung nasepte na sem sih ding uhi.

³⁶Ni sagi sung note in mei tawh kihal TOPA’ biehna na lui ding uhi; a ni giet ni-in a siengtho biehpieh kikhop khat nei-in TOPA’ meihal biehna na lui ding uhi; tua khu a thupi kikhopna khat ahi hi; note in leitung nasepte na sem sih ding uhi.

³⁷Tam teng pen a kisesa TOPA’ pawite ahi a, a siengtho biehpieh kikhopna hunin tuate na zang ding vua, TOPA tungah mei tawh kihal biehnate- meihal biehna, an tawh biehna, thoidamnate le dawn thei biehnate amau’ ni cietin na pie ding uhi.

³⁸Tam teng pen TOPA’ Sabbath-te, na letsongte uh, na kiciemna zieh vua na biehnate zosie ule kiphalna tawh na biehnate zosie ban vuah na pieh dingte uh ahi hi.

³⁹Tu-in leitanga a piengte na kaikhop zaw uh, a hla sagina ni sawm le ni nga panin ni sagi sung TOPA’ pawi na bawl ding uhi. A ni masa ni pen a bukim tawlngahna ni khat hi a, a ni giet ni zong a bukim tawlngahna ma hi ding hi.

⁴⁰A ni masa ni-in a etlawm[39] sing gate, lutu bate, a na pha singbate le luidunga a po gielhehte na la ding uhi; tuale TOPA na Pasien uh mai-ah ni sagi sung na guolnuom ding uhi.

⁴¹Tua pen kum simin ni sagi sung TOPA’ pawi-in na mang ding uhi; tua khu na khang tungtawn vua a kip den ding thukham hi ding a, tua pen a hla sagina sungin na bawl ding uhi.

⁴²Buh sungah ni sagi sung na teng ding uhi; Israel gam sunga tuolsung mi zosie buh sungah teng ding uhi,

⁴³tuaci’n Egypt gam panin amate ka peipi lai-in buh sunga Israel mite ka tensahna thute na suonlehlahte un a thei ding uhi: Keima TOPA na Pasien uh ka hi hi.

⁴⁴Tua bangin Moses in Israel mite tungah TOPA’ pawi a kisate a phuongzah hi.