Read Zou SIEMPU LAIBU 24 Bible Online

SIEMPU LAIBU 24 - Zou bible

SIEMPU LAIBU 24

¹TOPA in Moses hopi-in tam bangin a gen hi:

²Meivah a kuon den thei nadingin olive ga kigawivui sathau siengtho na kungah ang tawi nadingun Israel mite thupie in.

³Kikhopna buh sung, thuciemna[40] dalna diel pulamah nitah panin zingmawng dongin TOPA mai-ah tua meivah a kuong den dingin Aaron in koi ding hi; tua khu na khang tungtawn vua na zui ding uh thukham hi den ding hi.

⁴Ama in kham citah[41] tawh kibawl meivah tunna khuom tung TOPA mai-ah meivahte koi den ding hi.

⁵Annel la-in tua panin moh sawm le ni na em ding a, moh khat ciengin annel ephah khat’ sesawm-suo- seni ta hi ding hi.

⁶Tuate kham citah[42] sabuoi tungah zawn ni-in na koi ding a, zawn khatah guh ta om ding hi.

⁷Annlum tawh melcina biehna dingin TOPA tungah mei tawh kihal biehna a kipieh thei nadingin zawn khat cietah gimnamtui siengtho na koi ding hi.

⁸Sabbath ni sielin Aaron in kumtawn thuciemna-in Israel mite tangin tuate a ngaina bangin TOPA mai-ah koi den ding hi.

⁹Tuate pen Aaron le a tapate nga ding satanh ahi a, amate in mun siengtho khatah ne ding uhi. Azieh pen tuate TOPA tunga meihal silpieh lah panin ama’ nga den ding a satanh siengtho pen ahi hi.

¹⁰Israel mite lah panin a nu Israel-te, a pa Egypt-te ahi mi khat peikhie hi; giephuol sungah Israel numei’ tapa le Israel mi khat kihau uhi.

¹¹Israel numei’ tapa in tua gensie-in a samsie hi. Amate in Moses kungah tua pa a peipi uhi. Ama’ nu min pen Shelomith ahi a, Dan minam, Debri’ tanu ahi hi.

¹²Amate tungah TOPA’ khensatna a kitel masangin tua mipa a khumcip uhi.

¹³TOPA in Moses kungah tam bangin a gen hi:

¹⁴Tua Pasien’ min gensie pa giephuol pulamah peipi in. Tuale a za tapo in ama’ lu tungah khut ngamin mihon zosie in ama suong tawh sepsah in.

¹⁵Israel mite hopi inlen tam bangin gen in: Pasien a samsie poma in ama’ mawna khu ding hi.

¹⁶TOPA’ min a gensie mipa kithat ding a, mihon buppi in suong tawh tua a gensie pa sep ding uhi. Pemtate hile tuolsung mite hile tua Min Siengtho a gensiet ciengun amate kithat ding hi.

¹⁷Mihing khat a that poma kithat ding hi.

¹⁸Ganhing khat a that poma in tua tangin ditkiana bawl ding a, hinna khat tangin hinna khat hi ding hi.

¹⁹Midang khat a poisah mi poma ama bawl bangin ama tungah kithuhkia ding hi:

²⁰Gu pen gu ma tawh, mit pen mit ma tawh, ha pen ha ma tawh kithuh ding hi. Ama in mi khat a liemsah bang ma-in ama kiliemsah ding hi.

²¹Ganhing khat a that pa in tua ganhing’ manh lo ding hi; ahi vangin mi that pa kithat ding hi.

²²Note in pemtate ading le tuolsung mite adingin a kibang thukham na nei ding uhi: Bangzieh ahei cile keima TOPA na Pasien uh ka hi hi.

²³Tam bangin Moses in Israel mite hopi hi; tuale amate in giephuol pulamah mi samsie pa peipi-in suong tawh a seplia uhi. TOPA in Moses a thupieh bangin Israel mite a gamta uhi.