Read Zou SIEMPU LAIBU 25 Bible Online

SIEMPU LAIBU 25 - Zou bible

SIEMPU LAIBU 25

¹TOPA in Sinai Muol tungah Moses hopi-in tam bangin gen hi:

²Israel mite hopi inlen a kung vuah tam bangin gen in: Note kang pieh ding leitangah na tun ciengun tua leitang in TOPA adingin sabbath tang ding hi.

³Kum guh sung lo na pawi ding vua, kum guh sung na lengguite uh heuhin a ga na khawm ding uh;.

⁴ahi vangin a kum sagina sungin leitang ading a bukim tawlngahna sabbath khat om ding a, TOPA ading sabbath hi ding hi. Na lo uh na pawi sih ding vua, na lenggui uzong na heuh sih ding uhi.

⁵Anlah nua-a ali pote na at sih ding vua, a kiheuh lo na lengguite na khawm sih ding uhi: Tua khu leitang adingin a bukim tawlngahna kum hi ding hi.

⁶Tua sabbath kum sunga leitang pana a piengte- note, na sila numeite le pasalte, a kiguoi na nasemte ule no tawh a tengton pemtate in na ne thei ding uhi;

⁷azieh pen tua na leitang panun a pieng zosie na ganhonte ading zong le na gam sung vua gamsate dingin an hi ding hi.

⁸Kum nipi sagi[43] hun pen kum sawmli le kum kuo ahi thei nadingin kum nipi sagi, kum sagi mun sagivei na simto ding uhi.

⁹Tua ciengin hla sagina a ni sawm ni-in pengkul na gingsah ding uhi; note in hla sagina a ni sawm ni ahi thoidamna ni-in na gam sung zosie vuah pengkul na gingsah ding uhi.

¹⁰A kum sawmngana na siengthosah ding vua, gam sung mun zosie-a teng mi zosie tungah suotahna thu na phuongzah ding uhi. Tua khu note dingin jubilee khat hi ding hi: Na unpi-un na logam ule na inn ciet vuah na kilekia ding uhi.

¹¹Tua kum sawmnga cinna pen note adingin jubilee khat hi ding hi: Lo pawi lo, a lipote la lo, a kiheuh lo lengguite khawm loin na om ding uhi.

¹²Bangzieh ahei cile tua khu jubilee ahi hi; tua khu note dingin siengtho ding hi: Note in gamlah pana a piengte beh na ne ding uhi

¹³Tami jubilee kum sungin na neisa uh na logam ciet vuah a koimapo na peikia ding uhi.

¹⁴Na vengte kunga na zua cieng ule na vengte kung pana na lei ciengun khatlekhat na kisol sih ding uhi.

¹⁵Jubilee zaw ciengin a kum phaza tawh kituohin na vengte tung panin na lei ciengun a zuate in an pieng ding kum phaza tawh kituohin a manh tan ding uhi.

¹⁶A kum a tam leh a manh sangsahin, a kum a tawm leh a manh na tawmsah ding uhi; azieh pen an pieng ding kum tawh kituohin na tung vua ang kizua ahi hi.

¹⁷Khatlekhat kisoltuoh loin na Pasien uh na giing zaw ding uhi; bangzieh ahei cile keima TOPA na Pasien uh ka hi hi.

¹⁸Tua leitang tungah lungmuong tahin na ten thei nadingun ka thukhamte zui-in ka biehna ngaina kipte na tang ding uhi.

¹⁹Tua leitang in an piengsahin gilva tahin an ne-in, a sungah lungmuong tahin na teng ding uhi.

²⁰Note in lo pawi loin an lah at sih mawh leih a kum sagina kum ciengin bang i ne ta ding vuoi? na ci kha thei ding uhi.

²¹Keima in kum thum sung khom ding an a pien thei nadingin a kum guhna kumin note dingin ka thupha kang peisah ding hi.

²²A kum gietna kumin lo na pawi ciengun anlui na ne ding uhi; antha ang tun nading a kum kuona masang anlui na ne ding uhi.

²³Leitang keima-a’ ahi ziehin kumtawnin kizuamang thei lo ding hi; note na hi uleh keima tawh a omton pemta le leitang kawmte na hibo uhi.

²⁴Na leitang neina zosie vuah leitang tatkia thei dingin na bawl ding uhi.

²⁵Na tanaute uh khatpo in a hamsat ziehin a leitang behkhat a zua leh, a tanau a kinaipi pen pa pei-in tua a sanggampa’ zuasa leitang tankia ding hi.

²⁶Tua mipa in a tan ding koima a nei sih a, hizongle ama ang citheikia ciengin a tat nading sum a kicingin ang mukia leh,

²⁷a leitang a zua ni panin a kum phaza kisimin, a zuana pa kungah a piehbe ding teng lekia ding a, tuaci’n a neisate kipiekia ding hi.

²⁸Ahi vangin tuate a ngakia thei nadingin sum a kicinga a nei sih leh, tua a vanzua pen a leipa kungah jubilee dong om ding hi; Jubilee hun ciengin kipiekia-in tua neisa kilekia ding hi.

²⁹Mi khatpo in khuo kulpi sungah tenna inn khat a zua leh, a zua huna kipanin kum khat a cin zaw ciengin tankia thei ding hi; tatkia theina ding hun pen kum khat sung hi ding hi.

³⁰Kum khatbih a cin zaw masangin tua inn a kitat zawh sih leh, tua khuo kulpi sunga om inn pen a khan tawntunga a nei den dingin a leipa kungah kipie ding hi; Jubilee ciengin tuate kipiekia lo ding hi.

³¹Ahi vangin kul a nei lo a kimvela khuota innte ahileh, gamlaha lote tawh kibangin kiciemte ding hi; tuate kitanthei kia-in jubilee hun sungin kipiekia ding hi.

³²Levi-te’ nei khuopite tungtang thu-ah, Levi-te in tua khuopite sunga a nei uh innte a tawntungin tatkia theina thu nei ding uhi.

³³Levi-te tung panin tua bang neisate-khuopi khat sunga a nei uh a kizuasa innte kitankia thei ding a- jubilee hun sungin kipekia ding hi; azieh pen Levi-te’ khuopite sunga innte pen Israel mite lahah amate’ neisa ahi hi.

³⁴Ahi vangin a khuopi uh kim gamlaha lote pen kizua thei lo ding hi; azieh pen tuate amau’ nei den ahi hi.

³⁵Hamsatna ziehin na tanau khatpo un note[44] ang bel leh amate na va ding uhi; amate pen note tawh khuolmi pemta bangin teng ding uhi.

³⁶Amate tung panin a met la masa sih unlen, tua ahi sihle a met a khang la loin na Pasien ging zaw un; amate, note lahah tengsah un.

³⁷Amate tungah na sum uh a metin palahsah loin, a metin na an uzong na pie sih ding uhi.

³⁸Kei pen na Pasien uh ahi ding le note’ tunga Canaan leitang ang pie dingin Egypt pan ang peipi TOPA na Pasien uh ka hi hi.

³⁹No ang belte lahah mite in a zawn ziehin na tung vua ang kizua uleh, silate bangin amate na bawl sih ding uhi.

⁴⁰Amate pen a kiciel nasemte ahi sihle a kihen nasemte bangin note tawh omden ding uhi. Jubilee kum masangin amate in na na uh a sem ding uhi.

⁴¹Tua ciengin na khut sung panun a tate utawh amate a suohta ding uhi; a inn uh lam zuonin a peikia ding vua, a pu a pa’ gamah a kilekia ding uhi.

⁴²Azieh pen Egypt gam pana ka peipi amate pen keima’ nasemte ahi uhi; silate kizua bangin amate kizua lo ding hi.

⁴³Pauhat thu tawh amate na uh sih ding vua, na Pasien uh na giingzaw ding uhi.

⁴⁴Note’ nei thei ding sila numeite le sila pasalte tam bang ahi hi: Na kimvel vua a om minamte lah panin sila numeite le sila pasalte na lei thei ding uhi.

⁴⁵Note tawh a tengton pemtate lah pan le na gam sung vua a suoh note tawh a tengton amau’ innkuon lah panin na lei thei ding uhi; amate pen na neisa uh a suoh thei ding hi.

⁴⁶Na nua cieng vua na tate uh’ nei le luo dingin amate na koi thei ding uhi. Silate bangin amate na bawl thei ding vua, ahi vangin na sanggamte uh Israel-te ahile, mi koima in adang khat tungah ngongtatna tawh uh lo ding hi.

⁴⁷Note lahah khuolmi pemta khat ang cithei a, na tanaute un hamsatna tuohin tua pemta pa kungah amau le amau a kizua vua, ahi sihle tua pemta pa’ innkuon khatpo tungah a kizua uleh,

⁴⁸amau le amau a kizua zawciengun a kitatkia theina ding thu nei ding uhi; amau’ sanggamte khatpo in amate tankia thei ding a,

⁴⁹ahi sihle amau’ pano ahi sihle amau’ pano’ tapa amate tankia thei ding a, ahi sihle amau’ innkuon sunga si le sa-a a kinaipi uh khatpo in amate tan thei ding hi; ahi sihle a cithei vua ahile amau le amau zong kitan thei ding hi.

⁵⁰Tua pemta pa tunga amate a kizua kum panin jubilee kum dong a kum teng zosie a unpi-in a leipa tawh tuot ding uhi; a kizua manh pen a kum phaza tawh kituot ding hi: A neipa tawh a omton hun sung teng pen a kiciel nasem khat’ thaman tawh a kikimin kise ding hi.

⁵¹Kum tampi a sap lai leh a kileina manh tawh kituohin amau’ kitatna pie ding uhi;

⁵²tuale Jubilee kum masang kum tawmno in a sap lai leh tam bangin tuot ding uhi: Amate in nasep kum kisam dung zui-in amau’ kitat manh pie ding uhi.

⁵³Amate pen a kumkumin a kicieltawm nasem khat bangin tua pa’ thuneina sungah a om ding vua, ahi zongin ama in note’ muna-ah amate gamtahin uh lo ding hi.

⁵⁴Tam dan teng lahah khat penpen tawh amate a kitat sih leh, Jubilee hun ciengin amate le a ompi a tate utawh a suohta ding uhi.

⁵⁵Bang ding ahei cile Israel mite pen kei adingin ka nasemte ahi uhi; amate pen keima in Egypt leitang pana ka peitopi ka nasemte ahi uhi: Keima TOPA na Pasien uh ka hi hi.