Read Zou SIEMPU LAIBU 27 Bible Online

SIEMPU LAIBU 27 - Zou bible

SIEMPU LAIBU 27

¹TOPA in Moses hopi-in tam bangin a gen hi:

²Israel mite hopi inlen amate kungah tam bangin gen in: Mi khat in mihing khat’ manhza tawh kikim thu tawh kisai TOPA tungah a tuom vilvelin kiciemna a bawl ciengin,

³pasal khat’ kikimpi a manh pen tam bang hi ding hi: Kum sawmni panin kum sawmguh a phate’ kikimpi amanh dingin mun siengtho shekel tawh kizui-in ngun shekel sawmnga hi ding hi.

⁴Numei ahile a kikimpi amanh dingin shekel sawmthum hi ding hi.

⁵Kum nga panin kum sawmni cieng a pha pasal khat ahile pasal’ kikimpi amanh dingin shekel sawmni hi ding a, numei’ kikimpi amanh dingin shekel sawm hi ding hi.

⁶Hla khat pan kum nga cieng a pha, pasal khat’ kikimpi amanh dingin ngun shekel nga hi ding a, numei khat’ kikimpi amanh dingin ngun shekel thum hi ding hi.

⁷Mi khat kum sawmguh le a tungsie ahile pasal khat’ kikimpi amanh dingin shekel sawm le nga hi ding a, numei adingin shekel sawm hi ding hi.

⁸Mi khatpo in tua a kikimpi za a piehzawh sih leh siempu pa kungah amate kipeipi ding a, siempu pa in amate’ manh phaza ding tanpieh ding hi; siempu pa in a kiciem mi khatpo’ pieh zawh za ciet tawh kizui-in amanh tan ding hi.

⁹TOPA tungah biehna-in kitawi thei ganhing tawh kisai ahile TOPA tungah tua banga a kipie na khatpopo a siengtho ahi hi.

¹⁰Tua ganhing tangin adang khat tawh kihleng lo ding a, a hoite a hoilote tawh, a hoilote a hoite tawh kihleng lo ding hi. Ganhing khat adang khat tawh na hlen leh, tua ganhing le na hlenna ganhing tegel a nituohin siengtho ding hi.

¹¹TOPA tungah biehna-in a kitawi thei lo ganhing sieng lo khat tawh kisai ahile siempu pa’ mai-ah tua ganhing kipeipi ding hi.

¹²Siempu pa in a hoi le a hoi lo tawh kizui-in amanh za se ding hi: Siempu pa se bang bang amanh hi pai ding hi.

¹³Ahi vangin tua ganhing a kitankia ding ahile a kisesa amanh’ senga- suo-sekhat kibelap ding hi.

¹⁴Mi khat po in TOPA’ kungah a inn khat a siengtho dingin a ap leh, siempu pa in tua inn a hoi le a hoi lo tawh kizui-in amanh se ding hi: Siempu pa se bangin kip ding hi.

¹⁵A inn ap pa in a tat nuomkia leh amanh kitansa’ se nga-suo-sekhat piehbe ding a, tuaci’n a inn tangkia thei ding hi.

¹⁶Mi khat in TOPA tungah a gamhluo leitang beh khat a ap leh amanh ciengtan dan ding pen khaici pieng ding tawh kizui-in kise ding hi: Mangbuham homer[48] khat kipawitheina leitang pen ngun shekel sawmnga hi ding hi.

¹⁷Tua mipa in jubilee kum kipatin a logam a ap leh amanh kisena zaza kip ding hi;

¹⁸ahi vangin tua lo pen jubilee zaw cienga ki-ap ahile siempu pa in jubilee kumkia dong a omlai kumte tawh kituohin tua logam’ manh tuot ding a, jubilee kum tunkia nadinga a kisam lai kumte tawh kizui-in tuot ding a, a kum tawh kizui ma-in amanh khiem ding hi.

¹⁹Tuami lo a ap pa in ama’ piehsa lo a tat nuomkia leh amanh kitanza’ senga-suo -sekhat piehbe ding a, tuaci’n a nei masa pa kungah tua lo tungkia ding hi;

²⁰ahi vangin tua lo a kitatkia sih a, ahi sihle midang khat kunga kizuasa ahile kitankia thei nawn lo ding hi.

²¹Ahi vangin jubilee hun sungin tua lo a kipieh ciengin TOPA tunga ki-apsa lo bangin a siengtho hi ding hi; tua khu siempupa-a’ hi ding hi.

²²Mi khat in a gamhluo logam ahi lo, a leisa logam khat TOPA tunga a ap leh

²³siempu pa in jubilee kum dong tawh kituohin tua logam’ manh za ding tuot ding a, tua ni-a kipanin TOPA tungah a manh kiseza pen a siengtho silpiehin a pie ding hi.

²⁴Jubilee kum sungin tua logam pen a kileina logam neipa tungah kilekia ding hi.

²⁵Van manh sena zosie mun siengtho shekel tawh kizui-in kise ding hi: Gerah sawmni ciengin shekel khat ding hi.

²⁶Ahi vangin ganno tacilte TOPA- a’ ahi ziehin koima in ap thei lo ding a, bawng ahi a, keel ahi zongin tuate TOPA-a’ ahi hi.

²⁷Tuate pen ganhing sieng lo ahile amanh kise za’ senga-suo- sekhat tungdipin kitanh ding hi; a kitat sih leh amanh kisena bangin kizua ding hi.

²⁸Mi khat in a nei, TOPA tunga suhsiet dinga ki-apsate, mihing hitale ganhing hitale, gamhluo logamte hitale, kizua thei lo ding a, zong kitankia thei lo ding hi; a ki-ap na zosie pen TOPA adingin sil siengtho pen ahi hi.

²⁹Suhsiet dinga ki-apsa mite kitankia thei lo ding hi; amate kithat ding hi.

³⁰Leitang pana pieng sawm-ah-khat zosie khaici ahi a, singga ahi zongin TOPA-a’ ahi hi; tuate pen TOPA adingin siengtho hi.

³¹Amau’ sawm-ah-khat a tanhkia nuomte in amanhza’ senga-suo-sekhat tungdip ding hi.

³²Bawnghonte le tuuhonte panin sawm-ah-khat zosie le tuucingpa’ ciengkhut nei-a pei ganhing zosie’ sawm-ah-khat poma TOPA adingin a siengtho hi ding hi.

³³Koima in tuate hoi hi, hoi lo hi, ci-in ahi zongin, ahi sihle adang khat tawh hlen dingin ahi zongin kantel thei lo ding a, zong hleng thei lo ding hi; mi khat in tua khu a hlen leh ama’ hlen pen le a hlenna ganhing a nituohin a sieng hi ding a, kitankia thei lo ding hi.

³⁴Tam teng pen Sinai Muol tunga om Israel mite adingin TOPA in Moses tunga a hil thupiehte ahi hi.