Read Zou SIEMPU LAIBU 7 Bible Online

SIEMPU LAIBU 7 - Zou bible

SIEMPU LAIBU 7

¹Khielna zieha biehna bawldan tam bang ahi a, tua khu a siengtho pen ahi hi;

²amate in meihal biehna kigawna munah khielna zieha biehna go-in maitam pang zosie-ah a si kithe ding hi.

³Biehna-a kipie ding a thaute: a meithau, a sungkuo tuom a thau,

⁴a kawnga om a kal gel le a tunga om a thau tawh, a kal gel tawh kilahtha ding ahi a sin tunga beh a tepkai tawh ahi hi.

⁵TOPA tungah meihal biehna dingin siempu pa in maitam tungah tuate hal ding hi; tua khu khielna zieha meihal biehna ahi hi.

⁶Siempute lah panin pasal poma in tua silpiehte ne ding hi; tua pen a siengtho mun khatah kine ding hi; tua khu a siengtho pen ahi hi.

⁷Khielna zieha biehna le mawna zieha biehna a kibang ahi a, a bawldan zong kibang hi; thoidamna a bawlpieh siempu pa in tuate tang ding hi.

⁸Tua ma bangin mi khatpo’ meihal biehna a pie siempu pa in ama’ piehsa tua meihal biehna ganvun tang ding hi.

⁹Meibung sunga ki-em ahi an tawh biehna vannuoi le khangbeeldai ahi sihle khangbeel-a kikang zosie pen a pie siempu pa-a’ hi ding hi.

¹⁰Hizongle adang an tawh biehna vannuoi, sathau kihal ahi a, a gum tangpi ahi zongin Aaron’ suonte zosie in a kikimin hawm ding hi.

¹¹Tam pen mi khatpo in TOPA tunga a pieh thei ding thunuom biehpiehna silpieh bawldan ahi hi.

¹²Lungdamkona-a na pieh ahile tua lungdamkona biehna pen tol saw lo sathau tawh kihal moh, tol saw lo sathau tawh kizut mohpheng, le sathau tawh hoitaha kipawi annel mohte tawh na pieton ding hi.

¹³Lungdamkona dingin thunuom biehpiehna tawh tol kisaw anlum mohte na biehna-in na peipi ding hi.

¹⁴Tami biehna khat ciet panin TOPA tunga letsong dingin moh khat ta na pie ding hi; thunuom biehna gansi a the siempu pa in tua moh tang ding hi.

¹⁵Lungdamkona-a thunuom biehna sa pen a kipieh ni ma-in kine pai ding hi; zingmawng dong khat zong na hen sih ding hi.

¹⁶Ahi vangin na pieh biehpiehna pen kiciemna zieha biehna ahi sihle nop thu-a biehna ahile tua biehpiehna sa pen na pieh ni ma-in kine pai ding a, a zing ciengin khawnla teng kine ding hi;

¹⁷ahi vangin a biehpiehna sa a omlai teng pen a ni thum ni-in kihaltum ding hi.

¹⁸A ni thum ni-in thunuoma kipie biehna sa khat popo a kineh leh tua pen kisang lo ding a, a pie pa tungah zong minphat kipie lo ding hi; tua khu a mudahuoi a suoh ding a, a ne mipa in ama’ khielna a puo ding hi.

¹⁹A bua na khat popo tawh a kisukha sa kine lo ding hi; mei tawh kihaltum ding hi. A sieng mi zosie in tua sa ne thei ding hi.

²⁰Ahi vangin TOPA dinga kipie thunuom biehpiehna sa pen a sientho lo laitahin a ne mite pen a mipite lah panin kihemkhie ding hi.

²¹Note lahah mi khatpo in a bua na khat- mihing sien lona buana hitale ganhing sien lona hitale a buasa na khat popo hitale a tham a- tua zaw ciengin TOPA dinga kipie thunuom biehpiehna sa a neh leh a mipite lah panin tua mipa kinotmang ding hi.

²²TOPA in Moses hopi-in tam bangin gen hi:

²³Israel mite kungah tam bangin ci in: Bawngtang thau ahi sihle tuu thau ahi sihle keel thaute na ne sih ding uhi.

²⁴A mawh si ganhing ahi a, gamsate’ neh ganhing thaute ahi zongin nadangin kizang thei ding a, hizongle a sa na ne sih ding uhi.

²⁵TOPA tunga meihal silpieha kizang ganhing thau a ne poma a mipite lah panin kihemkhie ding hi.

²⁶Na tenna mun khat popo-ah va ahi a, ganhing ahi zongin a si khat popo na ne sih ding uhi.

²⁷Sisan a ne mi poma a mipite lah panin kihemkhie ding hi.

²⁸TOPA in Moses hopi-in tam bangin gen hi:

²⁹Israel mite hopi inlen tam bangci in: Note lahah TOPA tunga thunuom biehpiehna a pie ding mi khatpo in tua thunuom biehpiehna panin TOPA kungah tua biehna peipi ding hi.

³⁰Nangma’ khut tehteh tawh TOPA ading meihal biehna na peipi ding hi; TOPA mai-ah a kivei biehna-in a awmpheu a kivei thei nadingin a thau a awmpheu tawh na peipi ding hi.

³¹Siempu pa in maitam tungah a thau hal ding a, ahi vangin a awmpheu pen Aaron le a tapate-a’ hi ding hi.

³²Thunuoma na biehpiehna panun siempu pa tungah biehna-in a zietlam phei na pie ding uhi;

³³Aaron’ tapate lah panin thunuom biehna a pie mipa in ama’ tanh dingin a zietlam phei nga ding hi.

³⁴Bang ding ahei cile a kivei biehna panin a awmpheu le a kipie a phei pen keima in Israel mite tung panin thunuoma a pieh uh biehpiehnate sung panin la dawhin, Israel mite tung panin kumtawna a tanh den dingun siempu Aaron le a tapate tungah ka pie zo ta hi.

³⁵Tam pen TOPA tunga kipie mei tawh kihal biehnate sung pan TOPA’ siempu na sem dinga a kipeipi huna kipanin Aaron le a tapate tungah a kihawmpieh a tanh uh ahi hi;

³⁶tam teng pen Israel mite kung panin TOPA in a khantan vua a kaih zing dingun amate sathau a nil ni-in thu pie zo hi.

³⁷Tam teng pen meihal biehna, an tawh biehna, mawna zieha biehna, khielna zieha biehna, siempu suhdetna biehna, le thunuoma biehpiehna bawl dan ahi hi.

³⁸Tam teng pen Sinai senel gamah TOPA tunga biehnate a lui nadingun Israel mite a thupieh hun lai-a TOPA in Sinai Muol tunga Moses a thupiehte ahi hi.