Read Zou SIEMPU LAIBU 9 Bible Online

SIEMPU LAIBU 9 - Zou bible

SIEMPU LAIBU 9

¹Moses in a ni giet ni-in Aaron le a tapate le Israel upate hlan hi.

²Ama in Aaron kungah, “Mawna zieha biehna dingin genbaang lo bawngtang ano khat le meihal biehna dingin tuutang khat la inlen, TOPA mai-ah tuate pie in.

³Israel mite kungah, ‘Mawna zieha biehna dingin keeltang khat la in; meihal biehna dingin genbaang lo kumkhat a pha bawngno khat le tuuno khat,

⁴le TOPA mai-ah thunuoma biehpiehna dingin bawngtang khat le tuutang khat la in; tuale sathau kisaw an tawh biehna pie in. Bangzieh ahei cile tuni-in na kung vuah Pasien ang kilang ding hi,’ ci-in gen in,” a ci hi.

⁵Kikhopna puonbuh mai-ah Moses’ thupieh teng a peipi uhi; tuale a nai-ah mihon zosie pei-in TOPA mai-ah a ding uhi.

⁶Tuale Moses in, ”Tami pen note tungah TOPA’ vanglietna ang kilaa thei nadinga na bawl ding vua TOPA ang thupieh ahi hi,” a ci hi.

⁷Tua ciengin Moses in Aaron kungah, “Maitam lam neh inlen na mawna zieha biehna le na meihal biehna pie in. TOPA’ thupieh bangin nangma ading le mite adingin thoidamna bawl in; tuale mite adingin biehpiehna bawl inlen amate dingin thoidamna bawlpieh in,” a ci hi.

⁸Aaron in maitam lam nehin ama adingin mawna zieha biehna bawngno go hi.

⁹Aaron’ tapate in ama kungah si a tawi vua, ama in tua si sungah a khutme dawn phumin maitam’ kite tungah nu hi; tua site a omlai teng maitam bulah a sungsuh hi.

¹⁰Hizongle TOPA in Moses a thupieh bangin ama in maitam tungah mawna zieha biehna panin a thau, a kal gel le a sin tunga beh a tepkaite a hal hi;

¹¹tuale a sa le a vun teng zong giephuol pulamah a hal hi.

¹²Tua ciengin meihal biehna gan a go hi. Aaron tapate in ama a si a pie vua, tua a si pen maitam pang zosie-ah the hi.

¹³Amate in meihal biehna a nennenin a lutang tawh ama kungah tawi-in maitam tungah a hal uhi.

¹⁴Ama in a sungkuo le a kengte sawp a, tuate maitam tungah meihal biehna tawh a halton hi.

¹⁵Abanah ama in mite’ biehna a pie a, mite adingin zong mawna zieha biehna keel a pie hi. Ama in tua keel go a, a masa-a bangin mawna zieha biehna dingin a pie hi.

¹⁶Ama in meihal biehna peipi a, bawldan ngaina a om bangin biehpiehna a bawl hi.

¹⁷Zingmawnga meihal biehna banah an tawh biehna a peipi a, tuate a sipdim khat la-in maitam tungah mei tawh a hal hi.

¹⁸Ama in mite adingin thunuoma biehna dingin bawngtang le tuutang go hi. Aaron’ tapate in ama kungah a si a peipi vua, maitam pang zosie-ah ama in tua si the a,

¹⁹bawngtang le tuutang thau-a meithau, a sungkuo tuom a thau, a kal gel le tuate tunga a tuom a thaute,[5] le a sin tunga beh a tepkai teng a peipi uhi.

²⁰Amasa-in a awmpheu tungah a thau a koi vua, maitam tungah tua a thaute kihal hi;

²¹Moses’ thupiehsa bangin Aaron in a awmpheute le a zietlam pheite, TOPA mai-ah a kivei biehna-in a vei hi.

²²Aaron in mite lamah a khut lamto-in amate thupha a pie hi; ama in mawna zieha biehna, meihal biehna, le thunuom biehnate a lui zaw ciengin a peisuh hi.

²³Kikhopna puonbuh sungah Moses le Aaron a lut vua, ang pusuo cieng gelin mipite thupha pie a, tuaci’n TOPA’ minthanna mi zosie tungah kilang hi.

²⁴TOPA tung panin mei pusuohin maitam tunga meihal biehna le a thaute a katum hi; tuale mi zosie in tua mei a mu ciengin awngin a mai tuolkun uhi.