Read Zou JEREMIAH 1 Bible Online

JEREMIAH 1 - Zou bible

JEREMIAH 1

¹Benjamin gam Anathoth khuo-a siempute lahah khat ahi Hilkiah’ tapa Jeremiah’ thugente tam bang ahi a,

²Kumpi Amon’ tapa Josiah, Judah gamah a maan zaw kum sawm le thum a cin kumin Jeremiah kungah TOPA’ kammal a tung hi.

³Judah Kumpi Josiah’ tapa Jehoiakim’ uh hun le Judah kumpi Josiah’ tapa Kumpi Zedekiah’ uh kum sawm le khatna a tawp dong cieng, Jerusalem mite sal tang dinga a kipeipi a hla ngana dong ciengin zong a tung hi.

⁴Tu-in keima kungah TOPA’ thu ang tung a,

⁵“Na nu gil sunga tuisih a na vei masangin kang thei zo a, na suo masangin zong kang siengthosah zo hi; minamte tungah kamsang dingin nang kang koi zo hi,” ei ci hi.

⁶Tua ciengin keima in, “Ah, TOPA Pasien! Ka thugen dan ding zong mantahin ka thei sih hi, azieh pen kei naupang khat ka hi bo hi,” ka ci hi.

⁷Ahi vangin TOPA in kei kungah, “’Naupang khat ka hi bo hi,’ ci sin; azieh pen kang sawlna mi zosie kungah na pei ding a, nang kang sawl popo na gen ding hi.

⁸Amate giing sin, azieh pen nangma ang hunkhie dingin kang ompi hi, TOPA in kang ci hi,” ei ci hi.

⁹Tua ciengin TOPA in a khut hing zampheisahin ka kam ei thampieh hi; tuale TOPA in kei kungah, “Tu-in na kam sungah ka thute ka koi zo hi.

¹⁰En in, minamte le kumpi gamte tungah a botkhie ding le a phelkhie ding, a susie ding le a paimang ding, a lam ding le a phut dingin nangma kang koi zo hi,” ei ci hi.

¹¹Keima kungah TOPA’ thu ang tung a, “Jeremiah, bang na mu ei?” ei ci hi. Keima in, “Almond singba khat ka mu hi,” ka ci hi.[1]

¹²Tua ciengin TOPA in ka kungah, “Na hoi mu hi; azieh pen ka thu a tangtun nadinga a ngah gige[2] ka hi hi,” ei ci hi.

¹³Ka kungah TOPA’ thu ang tung leuleu a, “Bang na mu ei?” ei ci hi. Tuale keima in, “Leilu a kinga tui a so beel khat ka mu hi,” ka ci hi.

¹⁴Tua ciengin TOPA in keima kungah, leilu lam gam panin gam sunga a teng zosie tungah gimna ang tung ding hi.

¹⁵Azieh pen tu-in leilu lam kumpi gam sunga om minam zosie ka hlan ding hi; amate a unpi-in ang pei-in Jerusalem lutna tunkot teng, a kulpi baang kimvel zosie le Judah khuopi zosie-ah a kumpi tophate uh ang phut ciet ding uhi.

¹⁶Tuale a gitlona ziehun keima ei taisanna uh, pasien dangte tunga biehna a lui zieh ule a khut utawh a bawlsa uh milimte a bieh ziehun amate tungah ka thukhenna ka gen ding hi.

¹⁷Hizongle na kawng gah in; dingto inlen, kang thupieh zosie amate kungah va gen ta’n. A mai vuah zau sin; na zau leh amai vuah kang zausisah ding hi.

¹⁸Tuni-in gambuppi- Judah kumpite, a uliente, a siempute le a gammite langah a pang dingin kulh tawh a ki-im khuopi khat, sia khuompi khat le sumngo kulpi khat bangin kang bawl zo ta hi.

¹⁹Amate in nang ang do ding uhi; hinanle ang zo sih ding uhi, azieh pen nang ang hunkhie dingin kang ompi ding hi, TOPA in ci hi,” ei ci hi.