Read Zou JEREMIAH 10 Bible Online

JEREMIAH 10 - Zou bible

JEREMIAH 10

¹Israel innkuonte aw, na kung vua TOPA ang thugen khu ngai vawi un:

²TOPA in tam bangin ci hi: Minamte’ omdan sin sih unlen, vana limte ziehin lungkie sih un; azieh pen minamte in tuate a lungkiehpi uhi.

³Bangzieh ahei cile tam mite’ tawndante khu zuouthu ahi bo hi: Gamlahah sing khat kiphua a, tuale singsiem pa in hei khat tawh a suizol hi;

⁴mite in tua khu kham le ngun tawh a zem uhi; a kilah dawh thei lo nadingin siakil le sehta tawh a khencip uhi.

⁵A milimte uh,[38] tangmai lei-a lo hunna milimte tawh kibangin a ham thei sih a, lam zong a pei thei lo ziehin puoh kawikawi a kul hi; Tuate giing sih un; bangzieh ahei cile tuate in sietna bawl thei loin, tuate sungah a hoi bawl thei nading zong om lo hi.

⁶TOPA aw, nang tawh a kibang koima a om sih hi; nang na lien a, na min vanglienin a thahat hi.

⁷Minamte kumpipa aw, koi in nang hing giing lo ding ahei? Azieh pen tua khu nang’ tanh ahi hi; azieh pen namcin mipil zosiete lah le a kumpi gam sung zosie vuah nang bang koima om lo hi.

⁸Amate mimaw le mingol ahi uhi; tua milimte thuhil zong sing[39] sangin hoizaw tuon lo hi!

⁹Tarshish panin ngun kikhengsa kipuo a, Uphaz panin kham kipuo hi. Tuate khu khutsiemte le kham khengte’ khutsuo ahi hi; a puonsil uh pen a dum le a ausan ahi hi; tuate a unpi-in khutsiemte’ khutsuo ahi hi.

¹⁰Hinanle TOPA pen a man Pasien ahi hi; ama ahing Pasien le tawntung kumpipa ahi hi. A lungthah ciengin leitung kilawh a, minamte in ama’ lungthahna a thuoh zo sih uhi.

¹¹Amate kungah, “Vantung le leitung a siem lo pasien-te pen leitung pan le vanneite panin a mangthai ding uhi,” ci-in na gen ding hi.[40]

¹²A vanglietna tawh leitung a siem pa, a pilna tawh leitung a phutdet pa ama ahi a, ama in a theitelna tawh vante a zah hi.

¹³Ama a ham ciengin vantunga tuite ging vapuoh a, leimong tengah meiilumte a zamtosah hi. Ama in guo a zuh nadingin tun phesah a, a vankoinate panin hui langsah hi.

¹⁴Mi zosie a mawlawm vua, theina a nei sih uhi; milimte ziehin kham khengte zosie a maizum uhi; bangzieh ahei cile a milimte uh zuou ahi bo a, amau’ sungah naahu a om sih hi.

¹⁵Tuate pen kimanna a nei lo, kipumsolna hi lel a, dan a kipieh ni ciengin tuate a kisie ding hi.

¹⁶Jacob’ tanh TOPA pen tamte bang ahi sih hi, azieh pen na zosie a siem pa ama ahi a, Israel pen ama’ gouluo minam ahi hi; ama’ min pen Vanglien TOPA[41] ahi hi.

¹⁷Galte’ imtawm a thuoh mite aw, lei-a na puonlom uh ziel un!

¹⁸Bangzieh ahei cile TOPA in tam bangin ci hi: Tu petpetin tam gam sunga tengte ka lawnmang ding a, amate in a thei nadingun a tung vuah lunggimna ka tungsah ding hi.

¹⁹Ka kisuhkhah ziehin gim nga lah ka hi ta’n! Ka liemma a nasie mama hi. Hinanle, “Tami ka thuoh valon ding danpiehna hi a, tuale ka thuoh kul ding hi,” ka ci hi.

²⁰Ka puonbuh kisie ta a, a khau teng tatsan zo hi; keima kung panin ka tate taimang siengin a om nawn sih uhi. Ka puonbuh ei lampiehkia ding le ka dalna puonte ei khaipieh ding koima a om ta sih hi.

²¹Azieh pen tuucingte a mawlawm vua, TOPA a dong sih uhi; tua ahi ziehin amate mazang loin a tuuhonte uh a kithethang hi.

²²Za vawi, awging khat khu! Ngai vawi, Judah khuopite gamkhing a suo nading le si-alte busah nadingin leilu lam panin husa ging vapuoh khat ang pei hi.

²³TOPA aw, mihingte’ hinkhuo pen amau’ thu ahi lo lam ka thei a, mihingte lam a pei uh ciengin a kalsuon nading uh a gel thei sih uhi.

²⁴TOPA aw, a hoi bepno khatin ei puopha in; hing thangpai mawh lacin bangma lo nei suo ta ding hi.

²⁵Ang thei lo minamte le na min ang lo ngai lo mite tungah na lungthahna sungsuh in; azieh pen amate in Jacob a netum uhi; amate in ama netumin a that vua, tuale a tenna gam a susie sieng uhi.