Read Zou JEREMIAH 14 Bible Online

JEREMIAH 14 - Zou bible

JEREMIAH 14

¹Guotui kan ding tawh kisai Jeremiah kunga a tung TOPA’ thu tam bang ahi hi:

²Judah kap a, a kul tunkotte maimang kuon ta hi; lungzuong khuongai-in amate tuolah a bawh vua, a tung lamah Jerusalem-te’ kaana awging kato hi.

³A uliente in tui tawi dingin a nasemte a sawl uhi; tuikhuh ah pei-in amate in tui a mu sih uhi. A beelhawm utawh a kilekia vua, amate maizumin cimaw-in puon a kilukhu uhi.

⁴azieh pen gam sungah guo zu loin leitang a gawta ziehin, lohlote cimaw-in puon a kilukhu uhi.

⁵Lopa om ta lo ahi ziehin, sazuh pi nangawnin a tasen a nuasie ta hi.

⁶Muolpawn sangte[53] tungah gam sakolte a ding vua, si-alte bangin hui dihin a naw na uhi; Lopa om lo ahi ziehin a mit uh a hah zo sih uhi.

⁷Ka khielnate un kote langah teci hing pang nanle, na min zalin na hing sem in, TOPA aw. Ka nuatolnate uh a tam seng ta a, na tungah kang khiel zo ta uhi.

⁸Israel’ kinepna, hahsat hun cienga amau’ hundam pa aw, bang dingin ka gam sung vuah gamdang mi bangin hing omin, khuolzin zan khat beh a taam bangin hing om na hei?

⁹Bang dingin mi lungbuoi bangin omin, a hun zo lo galhang thahat pa bangin om na hei? Hizongle TOPA aw, kohaw lahah nang na om a, na mina ei kilote ka hi uhi; kote ei nuasie malmal sin!

¹⁰Tam mite tawh kisai-in TOPA in tam bang ci hi: amate a vahthap nuom vua, a kengte a tu zo sih uhi; tua ziehin TOPA in amate a pom sih a, tu-in a tawnkhielnate uh phawhin a khielnate ziehun dan a pie ding hi.

¹¹TOPA in kei kungah tam bangin ci hi: tam mite nopsah nadingin thu hing ngen sin.

¹²Amate in an a tan vangun amau’ thumna ka zahpieh sih a, amate in meihal biehna le an tawh biehna ang tawi vangun zong tuate ka sanpieh tuon sih hi; tuale mahin keima in namsau, kielpi, le pulnatna tawh amate ka sisah hi.

¹³Tua ciengin keima in, “Ah, TOPA Pasien! Kamsangte in amate kungah, ‘Namsau mu kha loin kielpi zong na thuoh kha sih ding vua, tam munah lungnopna tahtah note kang pie ding hi,’ a ci uhi,” ka ci hi.

¹⁴TOPA in keima kungah tam bang ci hi: kamsangte in keima’ min suongin zuouthu a gen uhi; amate ka sawl kha sih a, thu zong pie loin zong ka hopi kha sih hi. Amate in note tungah a manlo mangmuna, kimanna a nei lo aisanna, le a ngaisuttawm uh zuouthute ang gen uh ahi bo hi.

¹⁵Tua ahi ziehin ka sawl lopi-a, “Tam gam sungah namsau le kielpi hing tung sih va,” ci-in ka min suonga thugen kamsangte tawh kisai-in TOPA in tam bangin gen hi: Tua kamsangte namsau le kielin a sigam ding uhi.

¹⁶Amau’ thugenna mite zong namsau le kiel thuohin Jerusalem gawlzingah kipaithang ding hi. Amate le a zite, a tate, le a tanute a vui ding koima a om sih ding hi. Bangzieh ahei cile keima in amate tungah a gitlona uh ka sungsuh ding hi.

¹⁷Amate kungah tam thu na gen ding hi: A sun a zanin ka hlitui luong den hinlen, kan hun nei sih heh. Azieh pen keima’ mite, ka tanu ngahnu siengtho nu nahpi-in kisat gawp a, a liemma sie huoi mama hi.

¹⁸Gam lahah pei leng, en vawi namsau a kithat mite! Khuopi sungah lut leng, en vawi, kielpi zieha[54] a cinate! Gam sung muncin tengah siempute le kamsangte summet bawlin a vahkawikawi vua, theina a nei sih uhi.

¹⁹Judah khu na pum nuol ahi ta amah? Zion khu kidahhuoi na sa amah? Damsah thei lo ding lienga bang dinga nang in kote nei liemsah ahei? Kote in lungnopna ka lamen uhi; hinanle sil hoi kici ka mu sih vua, dam ding hun ka lamet vangun zauhuoina vive ka mu uhi.

²⁰TOPA aw, ka gitlona ule ka pu ka pate uh’ gitlonate kang pulah uhi. Bangzieh ahei cile na tungah kote kang khiel zo ta uhi.

²¹Na min na khuolna-in kote ei nol sin; a minthang na kumpi topha mindaisah vawt sin; kote tawh na thuciemna hing phawh inlen, ciem hing pel sin.

²²Minamte’ milimte lahah guo zusah thei khat beh a om amah? Ahi sihle vante in guo a zusah thei uh amah? TOPA kote’ Pasien aw, tua khu nangma hi lo na mah? Tami sil zosie nangma’ bawl ahi ziehin kote in nangma tungah kinepna ka nei uhi.