Read Zou JEREMIAH 15 Bible Online

JEREMIAH 15 - Zou bible

JEREMIAH 15

¹Tua ciengin TOPA in keima kungah tam bangin a gen hi: Ka mai-ah Moses le Samuel hing ding nan uleh tam mite lamah ka lungtang a kihei tuom sih ding hi. Ka muna panin amate del dawh unlen peimangsah ta un!

²Tuale amate in nang kungah, “Hei-a pei ding ka hi uh ahei,” ang ci ciengun amate kungah tam bangin na gen ding hi: TOPA in tam bangin ci hi: Pul natna tawh si dinga kisesate pulnatna tawh si ding a, namsau tawh si dinga kisesate namsau tawh si ding uhi; kiel tawh a pulsi dingte kiel tawh pulsi ding a, saltang dinga kisesate zong salin kikai ding hi.

³Tuale keima in amate tungah mi susie thei nam li ka tungsah ding hi, TOPA in ci hi: A kitha nading uh namsau, a bottel ding ui, a valtum ding le a susie ding huilah vate le leitunga gamsate ahi uhi.

⁴Judah kumpi Hezekiah’ tapa Manasseh in Jerusalem-a a bawl thute ziehin leitunga kumpi gam zosie in mulkin huoi a sah dingun tuate ka bawl ding hi.

⁵Jerusalem aw, koi in nang hing khuotuo ding a, koi in nang hing hlasietpi ding ahei? Dam le dam lo a dong dingin koi hing lambaang ding ahei?

⁶Nang in kei nei nuol zo ta a, nei elngatsan ta hi, TOPA in ci hi. Tuaci’n ka khut zahin nang kang susie hi. Ka lungthahna ka ip na lamin ka cimgawp ta hi.

⁷Gam sung tunkot tengah ansi zapna ciengkaa tawh amate ka zap zo hi; amate ta nei loin ka koi a, ka mite ka susie zo hi; a lampi panun amate ang kinuahei tuom sih uhi.

⁸A nupi meigongte uh tuipi-a senel sangin a tamzaw uhi; sunkim lai-in tangvalte’ nute sim dingin a susie thei pa ka peipi hi; ama tungah lungkhamna le zauna thakhatin ka tungsah zo hi.

⁹Ta sagi a nei numei nu hlalam vei-in a sibup hi; sunkim lai ahi vangin ama’ ni a tum zo hi. Ama in zum le mindai teng a thuoh hi. A omlai teng namsau tawh tha dingin a galte khut sungah ka pie ding hi, TOPA in ci hi.

¹⁰Ka nu aw, kei gim nga ka hi ta hi. Gambup-a om micin teng tawh kihau kisel dinga nei hin ka hi sese izaw! Mi sum leitawisah loin mi sum zong palah lo napi, a unpi-un kei ei sampawm lai veve uhi.

¹¹TOPA in tam bangin gen hi: Nangma hoi nadingin na hinkhuo[55] ah kang kisungthaw valon ding a, hahsat hun le lungdon hunin na galte in nangma kungah kang thumsah valon ding hi.[56]

¹²Sia le sumngo in leilu lama sia a hliehtawng zo amah?

¹³Na gam sung uh muncing tenga na bawl uh mawna zosiete ziehin note in na hauna ule na goute uh man nga loin galvan lahin ka pie ding hi.

¹⁴Na thei khah lo uh gam khatah na galte uh’ na kang semsah ding hi, azieh pen ka lungthahna mei bangin kitawkuong a, mit ngai nawn lo ding hi.

¹⁵TOPA aw, nang na thei hi; kei ei phawh inlen ei ve bo in. Kei ei bawlsiete tungah phu ei lahpieh inlen, na thuohzawhna ziehin kei ei sisah sin; nangma zieha hosietna thuoh ka hilam ei thei in.

¹⁶Na thute kimu a, keima in tuate ka ne hi, kei adingin na thute kipahna le lungdamna ahi hi; azieh pen Vanglien TOPA Pasien aw, nangma’ min tawh ei kihlan ka hi hi.

¹⁷Guolnop bawlte lahah ka to sih a, ka guolnuom ton sih hi; lungthahna tawh nei dimsah ziehin a gih na khut nei-ah kei guohin ka to hi.

¹⁸Adam nuom lote bangin bang dingin ka natna dai thei lo a, ka liemma dam thei lo ahei? A tahtahin nang pen kei adingin tui a kangzel luidung le misol thei tui tawh na kibang hi.

¹⁹Tua ahi ziehin TOPA in tam bangin ci hi: Nang kilekia leh kang lakia ding a, ka na na semkia ding hi. Kimanna nei lo thute gen loin thu manphate na gen leh, ka kamsang na hi ding hi. Na kunga ang pei ding pen amate ahi vua, amate kunga a pei ding pen nang na hi sih hi.

²⁰Tam mite adingin sumngo kulpi-in kang bawl ding hi; amate in ang do vangun ang zo sih ding uhi. Azieh pen ang hundam ding le ang hunkhie dingin keima in nangma kang ompi hi, TOPA in ci hi.

²¹Migilote’ khut sung panin kang hunkhie ding a, mi gawgamte khut sung panin kang tankhie ding hi.