Read Zou JEREMIAH 16 Bible Online

JEREMIAH 16 - Zou bible

JEREMIAH 16

¹Keima tungah TOPA’ thu ang tung hi:

²Tam munah zi la sinlen, tanu tapa zong nei sin.

³Bangzieh ahei cile tami muna pieng tanu tapate le tami gama a nu a pate uh tungtangah TOPA in tam bangin gen hi:

⁴Si natna vei-in a si ding vua, koima’ kaa lo le koima’ vui loin a om ding uhi; amate pen lei lahah a kitha eh a bang bep lel ding uhi. Namsau le kielin a si ding vua, a luonghawmte uh hui lahah a leng vate le leitunga gamsate’ an hi ding hi.

⁵TOPA in tam bangin ci hi: Misi inn ah lut sinlen, a kaa dingin zong pei sin, zong hlasietpi da in; azieh pen tam mite kung panin ka lungnopna, ka itna kip, le ka hepinate ka la zo hi, TOPA in ci hi.

⁶Tam gamah milien mineu a si ciet ding uhi; amate kivui loin koima in zong kaa lo ding hi; amate ziehin koima kikuiliem loin a sam uzong a heukieu sih ding uhi.

⁷Misite ziehin a kapte hlai nadingin koima in khomun[57] phalsuo loin koima in a nu ahi sihle a pa dawn dingin henepna hai tul lo ding hi.

⁸Pawi bawlna inn ah na pei sih ding a, amate tawh neton dawnton dingin na to sih ding hi.

⁹Azieh pen Vanglien TOPA, Israel’ Pasien in tam bangin ci hi: Note’ mu tehtehin, na hin sung ma-un tam mun panin guolnopna awgingte, lungdamna awgingte, le zinei pa le monu’ awgingte kisipsah ding hi.

¹⁰Tam mite kungah tam thute zosie na gen ciengin amate in, “Bang ziehin TOPA in eite tungah tam gimna lienpi ang tunsah tah lawm ahei? I khielna uh bang ahei? TOPA i Pasien uh tungah bang mawna i bawl uh ahei?” ang ci uleh,

¹¹nangma in amate kungah tam bang na ci ding hi: Na pu na pate un keima ei taisanin, pasien dangte nuadelin a na a sem vua, keima ei nuasie-in ka thukhamte a zui lo zieh uh leh;

¹²note, na pu na pate uh sangin a siezaw-in na gamta vua, na unpi-un na gitlo lungtang uh zui tentunin ka thu na man nuom lo zieh uh ahi hi.

¹³Tua ahi ziehin tam gam panin note le na pu na pate un a thei ngai lona gam khatah kang notmang ding a, tua munah a sun a zanin pasien dangte’ na na sem ding uhi, azieh pen keima in note kang angvan ta sih ding hi.

¹⁴Tua ahi ziehin mite in, “Egypt gam panin Israel mite a peipi TOPA a hing ahi ma bangin,” ci-in keima’ minin a kiciem nawn lo uh hun ang tung valon ding hi,” TOPA in ci hi.

¹⁵“Leilu lam gam pan le amate a hawlkhietna gam zosie panin Israel mite ang peipi TOPA a hing ahi ma bangin,” kicizaw ta ding hi. Azieh pen keima in a pu a pate uh ka na piehsa a gam vuah amate ka peipikia ding hi.

¹⁶TOPA in a cina ah, keima in tu-in ngabeng mi tampi sawlin amate ka mansah ding hi; tua zaw ciengin keima in sabeng mi tampi sawlin amate in muol le tang le suonghawmte lahah sa a beng ding uhi.

¹⁷Bangzieh ahei cile keima in a peina uh lampi zosie ka en hi; ka kung panin amate a kibu thei sih vua, a gitlonate uzong ka muna-ah a kisel thei sih hi.

¹⁸Tuale[58] keima in amau’ khielna le amau’ mawna a za ni-in ka thuhkia ding hi. Azieh pen a muthadahuoi siluong hawmte tawh a kibang milimte tawh ka gam a buasah zo ta vua, a sil kidahhuoite utawh ka gouluo a kidimsah uhi.

¹⁹Aw TOPA, ka hatna le ka kulpi, lungkham hun cienga ka kibuhna pa aw, leimong panin na kungah minamte hing pei-in tam bangin gen ding uhi: Ka pu ka pate un zuouthu le bangma-a kimang lo, phattuomna ei pie thei lo milimte cilo, bangma dang a na luo sih uhi.

²⁰Mihingte in amau adingin pasien-te a bawltawm thei amah? Khumte pasien ahi sih hi!

²¹“Tua ahi ziehin keima in amate thu ka hil valon ding hi. Tutungin ka vanglietna le ka hatna ka theisah ding a, tuaci’n amate in keima’ min TOPA ahi lam ei thei ta ding uhi,” a ci hi.