Read Zou JEREMIAH 17 Bible Online

JEREMIAH 17 - Zou bible

JEREMIAH 17

¹Sia laikung tawh Judah’ mawna kigiel hi; a lungtang peh tung ule maitam kite tungah suong manpha dawnhiem tawh zihin kigiel a,

²a tate un singna dawng gei cinteng le muolsangte tunga om a maitamte ule a khuom siengthote[59] a phawh veve vua,

³gam-awng lai-a muolsang teng tungah zong a phawh veve uhi. Na gam sung zosie vua na bawl uh mawna[60] manh dingin na neisa ule na gou zosie uh galvan lahin ka pie ding hi.

⁴Noma’ bawlin kang piehsa na gouluo na tan ding vua, tuale keima in na thei ngai lo uh gam khatah na galte uh’ na semin kang koi ding hi, azieh pen keima’ lungthahna khu mei bangin kikuontaw-in[61] a kuong zing ding hi.

⁵TOPA in tam bangin ci hi: Mi maimaite muongin cilesa hatna maimai suong a, TOPA kung pana a lungsim kiheite pen samsiet thuoh ahi uhi.

⁶Amate senel gama a po sawlbawh a bang ding vua, panpina ang pei ciengin a mu kha sih ding uhi. Koima’ ten lona ci gam ahi senel gam gawta ah a teng ding uhi.

⁷TOPA sunga muonna a neite, a muonna uh TOPA ahi sahte thupha nga ahi hi.

⁸Amate pen tui gei-a kisuon, lui gei-a zunghla singkung a bang ding uhi. Amate pen khuo a lum ciengin zau loin, a nate a hing zing ding hi; guo a zuh lo kumin zong amate in khawh sa loin ga a ga zing uhi.

⁹Adang na zosiete lahah lungsim khu a kawi pen ahi hi; kinahsiet mama hi - tua khu koi in thei zo ding ahei?

¹⁰Keima TOPA in amau’ gamtatna le amau’ sep thaman zui-a a pie dingin lungsim ka sittel a, lungtang zong ka sui hi.

¹¹Thuman lopi tawh hauna a sui mi zosie pen ama’ tui hi lopi a keuhsah dinga a op valaa tawh kibang hi; a khan kimtan ciengin a neisa teng taan ding a, a tawpkhahna ah a mot lam uh a kipholah ding uhi.

¹²A cila panin a kitawisang, a minthang mang topha khu i mun siengtho sung vua om biehbuhno ahi hi!

¹³Aw TOPA! Israel’ kinepna pa aw! nangma[62] kung panin a tai mite zosie a maizum ding uhi; na kung pana a kihei poma leinei gamah[63] a min uh kikhum ding hi, azieh pen amate in hinna ciatui ahi TOPA a taisan zo ta uhi.

¹⁴TOPA aw, ei damsah in, tua hile kei ka dam ding hi; ei hundam in, tua hile kei hutdamin ka om ta ding hi; bangzieh ahei cile kang phat pa khu nangma na hi hi.

¹⁵Amate in keima kungah, “TOPA’ thu hei-a om ahei? Tua khu hing tung taheh!” ci-in ei bangci gen uh ci ei thei in.

¹⁶Hinanle na nasepna ah tuucing[64] hina panin ka taimang sih a, sietna ni ang tun ding zong lah ka dei tuom sih hi. Ka nephu panin bang pusuoh ci na thei hi; tua khu na mai-ah a om hi.

¹⁷Ka dipkuot nadingin hing om sin; gimna hun cienga ka kibuhna na hi hi;

¹⁸ei bawlsiete maizumsah inlen, ahi vangin kei ei maizumsah sin; amate lungkiesah inlen, ahi vangin kei ei lungkiesah sin; amate tungah gimna ni tungsah in; a za ni kisietna tawh amate susie in!

¹⁹TOPA in keima kungah tam bang ci hi: Pei-in, Judah kumpite’ sungtumna le a pusuona uh ahi Mite’ Tunkot le Jerusalem khuo-a tunkotte zosie ah va ding ta’nlen,

²⁰tuale amate kungah tam bangin gen in: Tami tunkot sunga ang lut no Judah kumpite, Judah mi zosie, le Jerusalem-a a tengte zosie aw, TOPA’ kammal za un.

²¹TOPA in tam bang ci hi: Na hin nadingun Sabbath ni-in van na puoh lo nading ule Jerusalem tunkotte ah tuate na lutpi lo nadingun kidawm un.

²²Sabbath ni-in na inn panun van khatpopo puo loin, na khatpopo zong sem sih unlen, keima in na pu na pate thu ka piehsa bangin Sabbath ni siengthosah un.

²³Hizongle amate in ngai nuom loin a bil ei daw sih uhi; amate in a ngawng uh a khausah vua, thuhilna ngai nuom loin zong a sang nuom sih uhi.

²⁴Ahi vangin ka thu na ngai vua, Sabbath ni-in tam khuopi tunkotte ah bangma van puo loin, Sabbath ni na sienthosah vua, khum ni-in na na sep sih uleh,

²⁵David’ mang topha tunga a to ahi kumpite,[65] amate le a uliente, Judah mite le Jerusalem-a tengte in sakol leeng le sakol tungah tuongin tam khuopi tunkotte ah ang lut ding uhi; tuale tam khuopi sungah mi a teng zing ta ding hi.

²⁶Judah khuopite le Jerusalem kimvel panin hi tale, Benjamin gam, Shephelah gam, muoltung gam, le Negeb gam panin hi tale TOPA’ biehinn ah mite ang pei-in, meihal biehnate le biehpiehnate, an tawh biehnate le panamtuite, le lungdamko biehnate ang peipi ding uhi.

²⁷Ahi vangin Sabbath ni sienthosah ding le Sabbath ni-in Jerusalem tunkotte ah van puo-in lutpi lo ding hi, ci thute ah ka thu na man sih uleh keima in a tunkotte ah mei ka tawkuong ding hi; tua mei in Jerusalem kumpi innte katumin kiphel zo nawn lo ding hi, TOPA in ei ci hi.