Read Zou JEREMIAH 18 Bible Online

JEREMIAH 18 - Zou bible

JEREMIAH 18

¹Jeremiah kunga a tung TOPA’ kammal tam bang ahi hi:

²“Hing pei in, beelkhengpa’ inn ah peisuh inlen tua munah ka thu kang theisah ding hi,” ei ci hi.

³Tuaci’n beelkheng pa’ inn ah ka peisuh a, tuale a beel khen laitah ka va tuohkha ta hi.

⁴Ama’ khut sungah tungman tawh a bawl a beel kisie a, tuale ama in hoi a sah bangin beel dang khatin a kheng phakia hi.

⁵Tua ciengin keima kungah TOPA’ thu ang tung hi:

⁶Israel innkuon aw, tam beelkheng pa bawl bangin no zong hing bawl thei hi lo ka mah? TOPA in ci hi. Israel innkuon aw, beelkheng pa’ khut sunga a om tungman bangin note zong keima’ khut sungah na om uhi.

⁷Keima in hun khat lai-in minam khat ahi sihle kumpi gam khat botzuonin, phelkhie-in ka suhsiet ding tawh kisai-in ka na pulah kha mai thei ding a,

⁸hizongle ama’ tungtang thu ka pholah ziehin a gitlona panin tua minam ang kihei leh, ka lungsim khelkia-in ama tunga tunsah dinga ka gelsa gimna ka tungsah nawn sih ding hi.

⁹Tuale keima in adang hun khat lai-in minam khat ahi sihle gam khat’ tungtangthu ah lam ding le suon dingin ka na pulah mai thei ding a,

¹⁰hizongle tua minam in ka thu ei ngai nuom loin, ka muna-ah sil hoi lo a bawl leh, ka lungsim khelkia-in ama tunga sil hoi bawl dinga ka gelsa pen khu ka bawl nawn sih ding hi.

¹¹Tua ahi ziehin tu-in Judah mite le Jerusalem-a tengte kungah tam bangin gen in: TOPA in tam bangin ci hi: En un, kei pen note tunga sietna tunsah ding gelna a nei beelkheng pa ka hi hi. Tu-in na unpi-un na gitlona panun kiheikia unlen, na omdan ule na gamtatnate uh bawlpha un.

¹²Ahi vangin amate in, “Khum khu a mawhna hi bo! Koma’ gelna bangin om lel va ung, koma khat ciet in ka gitlo lungsim khauna uh ma bangin gamta lel va ung,” a ci uhi.

¹³Tua ahi ziehin TOPA in tam bangin ci hi: Minamte lahah dong un: Koi in tam bang thu za kha ahei? Ngahnu siengtho Israel in a mulkinhuoi pen na khat bawl zo hi.

¹⁴Lebanon vuakhal in Sirion[66] kentawng a nuasie ngai amah? Muol tung[67] pana ang luong luitui vot kihkiahte a kang ngai amah?[68]

¹⁵Ahi vangin ka mite in kei ei mangngil zo ta vua, amate in kisolna tungah meihal biehnate a hal uhi; tanglai lampite ahi amau’ lampite ah a kipalpua[69] vua, a lamlienpi uh zui nawn loin lampelte a zui uhi.

¹⁶Amate in a gam uh a cizat huoi le mite’ ehneh ho zing dingin a bawl uhi. Khum gam a kantan mi zosie ciza-in a lu a pei uhi.

¹⁷Nisuona lam huipi bangin galte mai-ah amate ka thethang ding hi. A tuosiet ni ciengun amate ka elngat ding a, ka maingat sih ding hi.

¹⁸Tua ciengin amate in, “Hing pei un, Jeremiah sawmsim va vui, azieh pen thu ei hil ding siempu, i thu dawh ding mipil le Pasien’ kammal ei gen ding kamsang i kitasam sih ding uhi. Hing pei un, ama mawsiet vai-in[70] a thugen khat mama zong mang sih vai,” ei ci uhi.

¹⁹TOPA aw, ka thugen ei ngai inlen, ka galte’ thugente zong ngai in!

²⁰Sil hoi pen sil hoi lo tawh thuh ding ma amah? Hizongle amate in ka si nadingin dum a to uhi. Amate kung panin na lungthahna na heimang nading le amate dinga thuhoi a gen dingin na mai-a ka din khu ei phawh in.

²¹Tua ahi ziehin kiel tawh a tate uh pulsisah inlen, namsau-in sisah sieng in. A zite uh ta nei loin meigongsah in. A pasalte uh pul natna tawh si uh hinlen, a tangvalte uh gal sungah namsau tawh si uheh.

²²Amate tungah thakhatin mi susiete na sawl ciengin, amau’ inn panin kaana awging kizasah in! Azieh pen kei ei mat nadingun dum a to vua, ka kenga ka aw nadingin thang a sie uhi.

²³Hinanle TOPA aw, kei tha ei sawmnate uh na thei hi. Amau’ khielnate maisah sinlen, na muna panin amau’ mawna phietmang sin. Na mai-ah amate puasah sieng in; na lungthah laitah ma-in amate thuohsah pai in.