Read Zou JEREMIAH 19 Bible Online

JEREMIAH 19 - Zou bible

JEREMIAH 19

¹TOPA in tam bangin ci hi: Pei inlen beelkheng pa’ leibeel khat va lei ta’n. Mite lahah upa pawlkhat le khangham siempu pawlkhat zawpi inlen,[71]

²beelkeh Tunkot lutna-a om Hinnom tapa’ kuomah pei inlen, kang thu gente khumnah va tangko ta’n.

³Nangma in tam bangin na gen ding hi: Judah kumpite le Jerusalem-a tengte aw, TOPA’ kammal za un. Vanglien TOPA, Israel’ Pasien in tam bang ci hi: Keima in tua thu a za mi zosie’ bil a khen giap dingin tam munah tam bang gimna ka tungsah ding hi.

⁴Bangzieh ahei cile mite in keima ei nuasie zo a, amate, a pu a pate ule Judah kumpite in a thei ngai lo uh pasien dangte kungah biehnate pie-in tam mun a buasah ta uhi; azieh pen amate in mawna a nei lo mite’ sisan tawh tam mun a kidimsah zo ta vua,

⁵tuale ka thupieh ahi vawt lo, ka lungsim sunga zong a om ngai vawt lo, Baal kungah meihal biehna dinga a pieh ding uh ahi a tapate uh hal nadingin amate in Baal munsangte a banbanin a lam uhi.

⁶Tua ahi ziehin TOPA in a cina-ah, tam mun pen Topheth ahi a, Hinnom tapa’ Kuom ahi zongin a kici nawn lo hun ang tung valon ding a, Kithana kuom kicizaw ta ding hi.

⁷Keima in tam munah Judah le Jerusalem’ gelnate a mawhna ka suohsah ding a, a galte uh mai-ah namsau tawh puasahin tha dinga a suite’ khutlum tawh amate ka sisah ding hi. A luong hawmte uh hui lahah vate le leitunga gamsate’ an dingin ka pie ding hi.

⁸Tam khuopi pen a cimulthaw huoi, a ehneh hohuoi-in ka bawl ding a, a suoh kha mi zosie in ama’ gimna zosiete ziehin cimultho-in tua khuopi a ehneh ho ding uhi.

⁹A galte le amate a tha sawm mite in imtawmin a lungkhamsah ciengin keima in a tanute ule a tapate uh’ sa ka nesah ding a, a unpi-un a innvengte’ sa a ne ding uhi.

¹⁰Tua ciengin na zawpite muna-ah na beel na sukeh ding a,

¹¹amate kungah tam bangin na gen ding hi: Vanglien TOPA in tam bangin ci hi: Mite in beelkheng pa’ beel sukehin bawlphat thei a op lo bang ma-in keima in tam mite le tam khuopi ka sukeh ding hi. Si vui nading mun a om nawn lo za dongin amate in Topheth ah si a vui ding uhi.

¹²Tam mun le a sunga tengte tungah tu-a bangin ka bawl ding a, tam khuopi pen Topheth ka bangsah ding hi.

¹³Jerusalem innte le Judah kumpite’ innte, innkhum zanga vantung nate zosie tungah biehna-a a kipiehna inn zosie le pasien dangte tungah dawn thei biehna a kibuohna innte zosie a unpi-in Topheth mun bangin kibuasah ding hi.

¹⁴TOPA in thu gen dinga a sawlna Topheth panin Jeremiah a pei ciengin, TOPA’ biehinn leituol ah ama dingin mi zosie tungah tam bangin a gen hi:

¹⁵Vanglien TOPA, Israel’ Pasien in tam bang ci hi: Tam khuopi le a khuoneute tungah ka gensa gimna zosie ka tungsah ding hi, azieh pen amate in a lungsim uh khausahin ka thu gente a ngai sih uhi.