Read Zou JEREMIAH 22 Bible Online

JEREMIAH 22 - Zou bible

JEREMIAH 22

¹TOPA in tam bangin ci hi: Judah kumpipa’ inn ah va peisuh inlen, tam thu khumnah

²tam bangin va gen ta’n: David topha tunga a to Judah kumpipa aw, nang, na nasemte le tam tunkotte-a ang lut na mite in TOPA’ kammal za un.

³TOPA in tam bangin ci hi: Thutang le thudih tawh gamta unlen, mi bawlsie pa’ khut sung panin a kisuom khat popo hlakhie un. Pemtate, pa nei lote le meigongte tungah khielna bawl loin tatsietna zong zang sih unlen, ahi sihle mawna a nei lo mite’ sisan tam munah luongsah sih un.

⁴Bangzieh ahei cile note in tam thute na man tahtah uleh, David’ topha tunga a to kumpite in sakol leengte le sakolte tungah tuongin amate, a nasemte le a mite tawh tami inn tunkotte tawnin ang lut ding uhi.

⁵Ahi vangin tam thute na thuse sih uleh tami inn pen gamdai a suoh dingin kei mama ka kiciem hi, TOPA in ci hi.

⁶Azieh pen Judah kumpipa’ inn tungtangah TOPA in tam bangin ci hi: Nang pen kei adingin Gilead le Lebanon muolvum bang na hi hi; hinanle keima in nang pen mi ten lona khuopi[72] senel gam ang suosah dingin ka kiciem hi.

⁷Nang langkhatah a galvan teng tawh ang susie ding mite ka kithawisah ding hi; amate in na taamtah sing hoipente hing phuapiehin mei-ah pai ding uhi.

⁸Tuale minam tampite in tam khuo nawhin a unpi-un, “TOPA in bang dinga tami khuopi lien a hici bawl ta adiei,” ci-in khatlekhat kiho ding uhi.

⁹Tuale amate in, “A Pasien uh TOPA’ thuciemna a taisan vua, pasien dangte bie-in a na a sep zieh uh ahi hi,” ci-in a dawng ding uhi.

¹⁰A sisa mipa kaa sih unlen, zong hlasietpi sih un; A kipeipi pa kaazaw un, bangzieh ahei cile a pienna gam a mu dingin ama ang kilekia nawn sih ding hi.

¹¹Azieh pen a pa Josiah’ za a luo, tam mun pana a peidawh Judah Kumpi Josiah’ tapa Shallum tungtang thu TOPA in tam bangin a gen hi: Tam sungah ama ang kinuale nawn sih ding a,

¹²sal tang dinga a kikaina munah si-in tam gam a mukia nawn sih ding hi.

¹³Dihtat lona tawh a inn a lam, thutang lo tawh a inndan tungnung a lam pa; a mawhna-in a innvengte na a semsah, a thaman a pie lo pa in gimna thuoh ding hi;

¹⁴“Inn golpi khat lam vangin innkhan tungnung tampi neisah vang,” ci-in tawlet vangte bawlin, taamtah sing thuopsawn a, zasan tawh a zut mi in gimna thuoh ding hi!

¹⁵Taamtah sing tawh inn na lam ziehin kumpi kisa na hi amah? Na pa in an ne tui dawnin thutang le thudih tawh na sem hi lo amah? Tua ciengin ama a dau a pei hi.

¹⁶Ama in mizawngte le mi cimawte’ vai thutang tawh a khenpieh hi; tuaci’n ama a khutlam a zang hi. Tam khu kei nei thei nading uh hi lo amah, TOPA in ci hi.

¹⁷Hinanle a manlo-a nga nading, maw nei lote’ sisan luonsah nading le, bawlsietna le ngongtatna dingin na mit ule na lungsim uh na zang uhi.

¹⁸Tua ahi ziehin Judah Kumpipa Josiah’ tapa Jehoiakim tungtang thu TOPA in tam bangin a gen hi: Amate in ama adingin, “Kadei, ka sanggam pa! Kadei, sanggam nu!” ci-in a kaa sih ding uhi. Amate in ama adingin, “Kadei, ka pupa! Kadei, a thupina!,”ci-in zong a kaa sih ding uhi.

¹⁹Ama pen laa si a kivui khat bang lelin kivui ding a, Jerusalem tunkot pulamah kikai phitin kipai ding hi.

²⁰Lebanon ah kato-in awng unlen, Bashan ah na aw sangsah un; Abarim panin awngzah un, azieh pen na guolngaite zosie kisu maimang zo hi.

²¹Na dau uh a pei laitahin kang hopi a, ahi vangin, “Na thu ngai sih vang,” nei ci hi. Na neu lai-a kipanin a tuaci den na hi hi. Azieh pen nang in ka thu na mang sih hi.

²²Hui in na tuucingte zosie uh lenmang sieng ding a, na guolngai teng uzong salin kiman ding hi; tua ciengin na gitlona zosie uh ziehin mai zumin na lungkie ding uhi.

²³Lebanon ah tengin taamtah sing lahah bu a bawlte aw, note tungah gimna ang tun ciengin numei nausuoh nat bangin bang na ci tau[73] vagua ding vuoi!

²⁴TOPA in, keima a hing ka hi ma bangin, nang Judah Kumpipa Jehoiakim’ tapa Coniah pen ka zietlam khuta kang but ka suoikaina khutsip na hi phiel ta zongin tua panin kang sutdawh ding a,

²⁵nang ang thasawm na giin mama Babylon Kumpipa le Chaldea-te’ khut sungah kang pie ding hi.

²⁶Na suona mun ahi lo gamdang khatah nang le na pienna na nu kang paidawh ding a, khumnah na si ding uhi.

²⁷Ahi vangin a kilekia nopna uh gamah amate kilekia nawn lo ding hi,” a ci hi.

²⁸Tam pa, koima in a dei lo, a kisimmaw beelkehsa, Coniah hi lo amah?

²⁹Ka gam, ka gam, ka gam aw, TOPA’ kammal ngai ven!

³⁰TOPA in tam bangin ci hi: Tam mipa, ta nei lo pa, a khan tawntunga khuosuoh ngai lo ding pa, ci-in ciemte in; azieh pen ama’ suonlehlah khat beh David’ topha tungah to lo ding a, Judah gam zong uhkia lo ding hi.