Read Zou JEREMIAH 23 Bible Online

JEREMIAH 23 - Zou bible

JEREMIAH 23

¹Ka gantatna munah tuuhonte a susie, a kithezahsah tuucingte in gimna thuoh ding uhi! TOPA in ci hi.

²Tua ahi ziehin TOPA, Israel’ Pasien in ka mite a kem tuucingte tungtang thu tam bangin gen hi: Note in ka tuuhonte thezahin na delmang vua, amate na cing sih uhi. Tuaci’n na gitlo gamtatnate ziehun keima in note kang cing ding hi, TOPA in ci hi.

³Tua ciengin kei mama in amate ka delmangna gam zosie panin a omlai ka tuuhon teng ka kaikhawm ding a, a huong sung vuah amate peipikia-in amate pungin a khang ding uhi.

⁴Amate a cing dingin tuucingte ka koi ding a, zau nawn lo, lungkham nawn loin khat beh zong mang nawn lo ding hi, TOPA in ci hi.

⁵TOPA in kang ci-in, keima in David adingin a thudih a bazam khat ka tundawh ding hun ang tung valon ding a, ama kumpi bangin maang ding a, pilvang tahin vai hawmin gam sungah thudih thutang tawh thu a khen ding hi.

⁶Ama’ hun sungin Judah kihundam ding a, Israel lungmuong tahin a teng ding hi. Ama a kihlat nading min in: “TOPA eite’ Dihtanna,” ahi hi.

⁷Tua ahi ziehin TOPA in kang ci-in, “Egypt gam pana Israel mite a peipi TOPA a hing ahi ma bangin,” ci-in kiciem nawn loin,

⁸“Ama[74] in a delmangna leilu lam gam le gam zosie panin Israel innkuon’ suonte a mapui TOPA a hing ahi ma bangin,” ci-in a kiciemzaw ta ding uhi,” a ci hi. Tua ciengin a gam ciet vuah amate a teng ding uhi.

⁹Kamsangte tawh kisai-in: TOPA zieh le a kammal siengthote ziehin keima sungah ka lungsim zanciim a, ka gu ka tang zosie a kithing hi; kei pen zu in a zawgawp zu kham pa tawh ka kibang hi.

¹⁰Bangzieh ahei cile gam sungah angkawmte a dim hi; samsietna ziehin gam sung kap a, gamlah lonona munte gawta sieng hi. Amau’ lampi a hoi sih a, amau’ thahatna zong maan lo hi.

¹¹Kamsangte le siempute in a ni gelin Pasien a zatah sih uhi; ka biehinn sung nangawnah a gitlona uh ka mu hi, TOPA in ci hi.

¹²Tua ziehin amau’ lampi pen khuomiel lamnal bang hi ding a, khumnah kidelmangin amate a pua ding uhi; azieh pen amau’ gimthuoh ding hun a tun ciengin amate tungah gimna ka tungsah ding hi, TOPA in ci hi.

¹³Samaria kamsangte lahah a muthadahuoi khat ka mu hi: Amate in Baal minin thu a hil vua, ka mi Israel-te a puikhiel uhi.

¹⁴Hinanle Jerusalem kamsangte sungah a mulkinhuoizaw lai na khat ka mu zo hi: Amate in angkawmin zuouthu a gen uhi; a gitlona uh panin koima a kilekia lo nadingin amate in na hoi lo a bawl mite’ khut a khausah uhi. Kei adingin amate a unpi-un Sodom a bang sieng ta vua, a sunga teng mi zosie zong Gomorrah a bang ta uhi.

¹⁵Tua ahi ziehin kamsangte tawh kisai-in Vanglien TOPA in tam bangin gen hi: “Keima in amate gamsai ka nesah ding a, keima in a dawn dingun gutui ka pie ding hi; bangzieh ahei cile Jerusalem kamsangte panin gamsung muncin tengah Pasien zatah lona kizel zo hi,” a ci hi.

¹⁶Vanglien TOPA in tam bangin gen hi: Na kung vuah thu hing genin note ang sol kamsangte’ thugente ngai sih un; amate in a lungsim sung vua a geltawm uh thute ang gen uh ahi bo a, TOPA’ kam sung pan hi lo hi.

¹⁷Amate in TOPA’ kammal a simmawte kungah, “Note adingin hing hoi na va,” a ci den mielmuol uhi; amau’ lungtang khauna banga khau taha a zui mi zosie kungah amate in, “Note tungah tuosietna ang tung sih ding hi,” a ci uhi.

¹⁸Azieh pen TOPA’ kikhopna ah koi ding ngai a, a thugente va thei ngai, va za ngai ahi ahei?

¹⁹En un, TOPA’ huipi khu! A thangpaina pumpei kihiapi ang pusuoh zo hi; migilo pa’ lutung a mutgawp ding hi.

²⁰A lungtup teng semin a tangtunsah masangsie, TOPA’ lungthahna a kilekia sih ding hi. Ang tung ding nite ah note in kicien tahin na thei ding uhi.

²¹Ka sawl lopi-in kamsangte a tai uhi; amate kungah ka gen lopi thu a songen uhi.

²²Hinanle amate ka kikhopna ah ang to uh hi leh, amate in ka mite kungah ka kammalte a tangko thei ding vua, a lampi hoi lote ule a gamtat hoi lote uh panin amate kinuahei ding uhi.

²³Kei pen a naina muna a om Pasien ka hi amah? A gamlapi-a zong a om Pasien hi lo ka mah? TOPA in ci hi.

²⁴Ka mu thei lo nadingin koi in phuolsel munah amate phuol thei ding ahei? TOPA in ci hi. Vantung le leitung dim hi lo ka mah? TOPA in ci hi.

²⁵Keima in, “Mang man zo ing, mang man zo ing!” ci-in keima’ min tawh zuouthu a gen kamsangte’ thugente ka za zo hi.

²⁶Zuouthute hilin a lungsim sung vua a suoh misolna po a gen kamsangte ang kiheikia nading bang tanvei sawt ding ahei?

²⁷A pu a pate un Baal a bieh ziehun ka min a mangngil bangun khatlekhat a mang uh kigenin ka mite keima’ min a mangngilsah sawm uhi.

²⁸Mang man kamsangpa in a mangmat gen hinlen, hizongle ka kammal a nei pa in muonhuoi tahin ka kammal gen taheh. Butu le butang bangci kibah thei ding ahei, TOPA in ci hi.

²⁹Ka kammal mei tawh kibang a, suongte a satguoi thei sehta tawh zong kibang hi lo amah, TOPA in ci hi.

³⁰Tua ahi ziehin en un, khatlekhat keima’ kammal a kiguhpieh kamsangte ka langpang hi, TOPA in ci hi.

³¹En un, a phuotawm uh thu gen hi napi, “TOPA in ci hi,” a ci kamsangte ka langpang hi,” TOPA in ci hi.

³²En un, TOPA in kang ci-in, ka sawl lopi le thu ka pieh lopi-in zuou mang genin amate thu hil a, a zuouna ule khawhsah ci a nei lona uh ziehin ka mite lam a puikhiel kamsangte ka langpang hi; tuaci’n tam mite in amate a phattuompi vawt sih uhi, TOPA in ci hi.

³³Tam mite, ahi sihle kamsang khat, ahi sihle siempu khat in, “TOPA’ vangih[75] bang ahei?” ci-in nang ang dawh uh ciengin nang in amate kungah, “Tua vangih nangma na hi a, nang kang paimang ding hi, TOPA in ci hi,” na ci ding hi.

³⁴Kamsang, siempu, ahi sihle ka mite khatpo in, “TOPA’ vangih,” a ci leh ama le a innkuonpite gim ka pie ding hi.

³⁵Note lahah, “TOPA in bangin ang dawng ei? “ahi sihle, “TOPA in bang ang gen ei?” khatlekhat na kici ding uhi.

³⁶Ahi vangin, “TOPA’ vangih,” ci-in na gen nawn poma sih ding uhi. Bangzieh ahei cile TOPA’ vangih na ci uh pen note’ thugen ahi bo a, tuaci’n note in eite’ Pasien ahi a hing zing Pasien, Vanglien TOPA’ kammalte na leheipieh ta uhi.

³⁷Note in kamsangpa kungah, “TOPA in bangin ang dawng ei?” ahi sihle, “TOPA in bang ang gen ei?” ci-in tua bangin na dong ding uhi.

³⁸Ahi vangin, “TOPA’ vangih” na ci uleh TOPA in tam bangin ci hi: “TOPA’ vangih,” na ci sih ding uhi, ci-in kang sawl vangin note in “TOPA’ vangih,” ci kammalte gen zo ta na hi ziehun,

³⁹tuaci’n note hing domto-in[76] note le na pu na pate uh tunga ka piehsa khuopi pen ka opna panin ka paimang valon ding hi.

⁴⁰Kumtawn simmawna le maizumna kang thuohsah ding vua, tua khu bangma cih hunin a kimangngil ngai nawn sih ding hi.