Read Zou JEREMIAH 24 Bible Online

JEREMIAH 24 - Zou bible

JEREMIAH 24

¹TOPA’ biehinnpi mai-a a kikoi theiga lawdim ni TOPA in ei musah a, tam pen Babylon Kumpi Nebuchadnezzer in Jerusalem panin Judah Kumpi Jehoiakim’ tapa Kumpi Jeconiah le Judah uliente, khutsiemte le siakheng siemte tawh manin Babylon ah sal dinga a peipi zaw ahi hi.

²Law khatah a min masate tawh a kibang theiga hoite om a, ahi vangin adang law khatah neh thei lo ding za donga a hoi lo theigate a om hi.

³TOPA in keima kungah, “Jeremiah aw, bang na mu ei?” ei ci hi. Kei zong, “Theiga ka mu hi, a hoite hoi mama a, a hoi lote lah a hoimaw sengin kine thei lo hi,” ka ci hi.

⁴Tua ciengin keima kungah TOPA’ kammal ang tung hi:

⁵Israel’ Pasien TOPA in tam bangin a gen hi: Tam mun panin Chaldea-te gama ka sawldawh Judah gam pana saltangte pen tam theiga hoite bangin ka ngaisun ding hi.

⁶Amate a hoi nadingun keima in mit tuhna-in ka nei ding a, tam gamah ka peipikia ding hi. Keima in amate ka lam ding a, ka phelmang sih ding hi; amate ka phut ding a, amate ka botzuon sih ding hi.

⁷Keima TOPA ka hi lam theitheina lungsim amate ka pie ding hi; ka kungah a lungtang zosie utawh ang kilekia ding uh ahi ziehin amate keima’ mi ahi ding vua, kei zong amau’ Pasien ka hi ding hi.

⁸Ahi vangin TOPA in tam bangin ci hi: Judah kumpipa Zedekiah, a uliente, tam gama a om den Jerusalem-a a omlai teng le Egypt gama a tengte pen a hoimaw senga a kine thei lo theiga bangin ka bawl ding hi.

⁹Leitung kumpi gam zosie adingin a mulkinhuoi le a siehuoi-in amate ka bawl ding a, ka delmang nading muncin tengah mite’ simmawna, thusie gentena, zakona le awsie lawna ka thuohsah ding hi.

¹⁰Amate le a pu a pate uh ka piehsa gam panin ka suhmaimang masangsie amate lahah namsau, kielpi le pul natna ka tungsah ding hi.