Read Zou JEREMIAH 30 Bible Online

JEREMIAH 30 - Zou bible

JEREMIAH 30

¹TOPA kung panin Jeremiah kungah thu ang tung pen khu tami ahi hi:

²Israel’ Pasien, Vanglien TOPA in tam bangin ci hi: Na kunga kang gensa thute zosie laibu khat sungah khum in.

³Azieh pen TOPA in a genna-ah, ka mite ahi Israel le Judah tungah a gam uh ka piehkia nading nite ang tung valon ding a, tuale a pu a pate uh kunga ka piehsa gamah amate peipikia-in tua gam a luo ding uhi, a ci hi.

⁴Tam teng pen Israel le Judah tawh kisai-in TOPA in a gen thute ahi hi:

⁵TOPA in tam bangin ci hi: Eite in zauna, le patauna aw i za zo vua, lungnopna aw ahi sih hi.

⁶Tu-in kan unlen encien vawi un. Pasal in nau a pai thei amah? Tua ahile bang ziehin pasal zosie in numei nausuoh nat banga a khut utawh a tai uh a hum mu ka hei? Bang dingin a maite uh kangdang ahei?

⁷Ka nu ei! Khum ni pen a nasie sengin tua bang ni a om ngai sih hi; tam pen Jacob adingin lungkham hun hi ding a, hinanle khum panin ama kihunkhie veve ding hi.

⁸Khum ni ciengin keima in ama’[90] ngawnga hahkol kuoitawngin, ama’[91] kihenna khaute ka bottan ding a, tuale ama pen namdangte in salin khawi nawn lo ding hi, Vanglien TOPA in ci hi.

⁹Ahi vangin amate in TOPA a Pasien uh’ na le a kumpi uh David’ na a sem ding uhi.

¹⁰Hinanle ka nasempa Jacob aw, nang na hi leh zau vawt sin, Israel aw, lungkham sin, TOPA in ci hi. bangzieh ahei cile a gamlapi panin note kang hundam ding a, keima in a saltanna uh panin na suonlehlahte ka hundam ding hi. Jacob’ suonte ang kilekia ding a, amate sip dide le nuomtahin omin, koima in a zausah nawn sih ding hi.

¹¹Azieh pen kang hutdam thei nadingin nang tawh kang omton hi, TOPA in ci hi; amate lahah nang kang thethangna minam zosie ka susie ding a, ahi vangin keima in nangma kang susie sih ding hi. A kituoh bep khatin thu kang hil ding a, dan pieh loin lah kang mawh koi sih ding hi.

¹²Azieh pen TOPA in tam bangin ci hi: Na liemna dam thei lo a, na hima nasie mama hi.

¹³Na vai puo ding koima a om sih a, na hima adingin zatui om loin, na dam nading zong bangma a om sih hi.

¹⁴Na lawm it zosie in ang mangngil sieng a, amate in nang ang don nuom ta sih uhi; azieh pen na khielna lien luo-in na mawna tam luo ahi ziehin, khuotuona a nei lo galte khat dan ka pieh bang le galte khat satin ka liemsah bangin, nang kang bawl hi.

¹⁵Na liemna ziehin bang dingin kapkap na hi ahei? Nang natna pen damsah thei ahi sih hi. Na khielna lien luo-in na mawna a tam seng ziehin, keima in na tungah tam teng kang bawl ahi hi.

¹⁶Tua ziehin nangma ang valte ken zong kivaltum ding a, na galte zosie a unpi-un salin kipeipi ding hi. Nang ang bulute kibulu ding a, galmata nangma ang mante galmatin kiman ding hi.

¹⁷Azieh pen amate in mi kipampai hing ci-in “Koima’ don lo Zion na hi hi,” ang ci ziehun na tungah damna kang piekia ding a, na liemmate ka damsah kia ding hi, TOPA in ci hi.

¹⁸TOPA in tam bangin ci hi: Jacob suonte’ buhte a ngaingai ka bangsah kia ding a, amau’ tenna mun tungah lainatna ka nei ding hi. A muol tungah khuopi kilamkia ding a, a om ngaina mun ma-ah kumpi inn omkia ding hi.

¹⁹Khumte sung panin lungdamkona la sahna le guolnopna awging ang pusuoh ding hi. Amate ka pungsah ding a, a tawmtham ahi sih ding uhi; mi zatah dingin amate ka bawl ding a, amate a kineu-et sih ding hi.

²⁰A tate uh pen hun lui lai bang ding a, a mihonpite uh ka mai-ah kiphutdet ding hi. Amate a gawt mi zosie dan ka pie ding hi.

²¹A kumpi ding uh pen amate khat ma hi ding a, a vaihawm lamkai ding uh amate sung pan ma-in ang pieng ding hi; Keima in a nai ah ama ka kai ding a, ama in ka kung ei zuon ding hi. Tua hi sihle koi in ka kung ei zuon ngam ding ahei, TOPA in ci hi.

²²Tuale note ka mite na hi ding vua, kei na Pasien uh ka hi ding hi.

²³En un, TOPA’ khuopi huipi khu! Thangpaina ang pusuoh ta a, pumpei kihiapi[92] in migilo pa’ lutung mutgawp ding hi.

²⁴Ama’ lungtup teng semin, a tangtun masangsie, a giinhuoi TOPA’ lungthahna a kilekia sih ding hi. Ang tung ding nite-ah note in tami na telsiem ding uhi.