Read Zou JEREMIAH 41 Bible Online

JEREMIAH 41 - Zou bible

JEREMIAH 41

¹A hla sagina hla-in kumpi sungkuon, kumpi vaisai a lienpen khat ahi, Elishama’ tapa Nethaniah, a tapa Ishmael in mi sawm tawh Mizpah khuo-a Ahikam’ tapa Gedaliah kungah a haw uhi. Amate in Mizpah ah an a nehton laitahun,

²Babylon kumpipa in tua gam sungah ama gam uhpa-in a koi ziehin Nethaniah’ tapa Ishmael le tua mi sawmte a dingto vua, Shaphan’ tapa Ahikam, a tapa Gedaliah-te namsau tawh satpua-in a that uhi.

³Ishmael in Mizpah ah Gedaliah tawh a omton Judah mi zosie le tua sunga a om Chaldea galkapte zong that hi.

⁴Gedaliah a kitha zaw a zing ni, koima in a thei masangin,

⁵Shechem, Shiloh le Samaria khuote panin mi sawmgiet, khamul heukieusa, puon ehkehsa le a pumpi uh kikui liemsa-in an tawh biehnate le panamtuite tawi-in TOPA’ biehinn sungah biehna pie dingin a tung uhi.

⁶Amate lamdot dingin Mizpah panin a kap kawmin Nethaniah’ tapa Ishmael a pei hi. Ama in amate a mu ciengin a kung vuah, “Ahikam’ tapa Gedaliah kungah hing pei un,” a ci hi.

⁷Khuopi laikimtah a tun ciengun Nethaniah’ tapa Ishmael le a optonpi mite in amate thatin tuikhuh sung khatah amate[113] a paai uhi.

⁸Ahi vangin amate lahah mi sawm in Ishmael kungah, “Ei that sih un, azieh pen lozau lahah ka na kholsa uh mangbu, mangbuham, sathau le khuoizu tampi ka nei uhi,” a ci uhi. Tuaci’n ama zong ki-ipin a guol honpi tawh amate that nawn lo hi.

⁹Ishmael in a thasa misi luonghawm zosie a paina tua tuikhuh[114] pen a gol khat ahi a, tua khu Kumpipa Asa in Israel kumpipa Basha a nan nadinga a na bawl ahi hi; Nethaliah’ tapa Ishmael in a mithate tawh tua tuikhuh a dimsah hi.

¹⁰Tua ciengin Ishmael in kumpi cing galkapmangpa Nebuzradan in Ahakim’ tapa Gedaliah tungah a piehsa kumpipa’ tanute le Mizpah khuo-a a kinuasie mi zosie salin a man hi. Nethaniah’ tapa Ishmael in sal dingin Ammon gam lam zuonin amate a peipi hi.

¹¹Hizongle Nethaniah’ tapa Ishmael in a bawl a mawna huoisie teng Kareah’ tapa Johanan le a optonpi galkapmang zosie in a zah bepun

¹²a mite zosie zawpi-in Nethaniah’ tapa Ishmael sim dingin a kuon uhi. Amate in Gibeon muna tuikhuh golpi ah a pha uhi.

¹³Ishmael kunga om mi zosie in Kareah’ tapa Johanan le galkapmang zosie a mu ciengun a nuom mama uhi.

¹⁴Tuaci’n Ishmael in Mizpah panin sal dinga a mat mi zosie kinuahei-in Kareah’ tapa Johanan kungah a peikia uhi.

¹⁵Ahi vangin Johanan kung panin Nethaniah’ tapa Ishmael le mihing giet suohta-in Ammon-te kungah a pei uhi.

¹⁶Tua ciengin Kareah’ tapa Johanan le a optonpi galkapmang zosie in, Nethaniah’ tapa Ishmael in Ahikam’ tapa Gedaliah a na tha zaw ciengin Mizpah panin sal[115] dinga a kaisa mite lahah amawh teng zosie - galkapte, nupite, naupangte, le numeite a uh cilgesa pasalte a unpi-in Gibeon panin a peipikia uhi.[116]

¹⁷Egypt gam lam pei sawmin amate a dingkhie vua, Bethlehem khuo gei-a Geruth Chimham kici munah a khawl uhi.

¹⁸Azieh pen Nethaniah’ tapa Ishmael in gam uhpa dinga Babylon kumpipa in a koi Ahikam’ tapa Gedaliah a tha ziehin amate in Chaldea-te a giing mama uhi.