Read Zou JEREMIAH 46 Bible Online

JEREMIAH 46 - Zou bible

JEREMIAH 46

¹Minamte tawh kisai-in kamsangpa Jeremiah kunga a tung TOPA’ kammal tami ahi hi.

²Judah Kumpipa Josiah’ tapa Jehoiakim in kumpi a sep zaw a kum lina kumin Babylon kumpipa Nebuchadnezzar in a na zawsa, Euphrates gun gei Carchemish khuo-a om Egypt kumpi Pharaoh Neco’ galkapte tawh kisai tam bang ahi hi:

³Phaw le lumte tawh kithawi unlen, gal sim dingin kuon un!

⁴Sakol phaw guong unlen, tuong dawh ta un! Na sia lukhute uh khu unlen, panmun la un. Na teipi uh tat hiem unlen, na sia puonte sil un!

⁵Bang a cile a zausa-a amate ka va mu tah mawh ahei? Amate a kilekia ta uhi; a galhangte uh kisatlia a, a naw taimang ta uhi. Amate a kinuahei sih uhi. Muncin tengah zauna behbeh! TOPA in ci hi.

⁶A mallangte zong a taiman sih vua, galhangte a suohta tuom sih uhi; sahlam Euphrates gun gei-ah amate kipalin a pua uhi.

⁷Nile gun banga ang khang, guntui khanglien bang khu koi ahei?

⁸Nile gun bangin Egypt khang a, guntui phulto bang hi. Ama in, kei ei khangsah inlen, leitung zosie ei tuomsah in. Khuopite le a sunga tengte zosie ei susiesah in, a ci hi.

⁹Sakolte aw, mai nawt un, sakol leengte aw, kikhaw vapo un! Galhangte ahi: Ethiopia[123] le Put mi lum tawite, thal kamsa-a[124] om Ludim mite kuonsah un.

¹⁰Khum ni pen Vanglien TOPA’ ni ahi a, phu a kilahkia ni, a galte tung panin dih tanna a nga ni ahi hi. Namsau in amate valtum ding a, a du ta sih ding hi. A kham dongin a si uh a dawn ding hi. Bang ding ahei cile Vanglien TOPA in Euphrates gun gei sah lamah kithoina khat a nei hi.

¹¹Egypt ngahnu siengtho aw, Gilead ah peito inlen, damna zatui va la ta’n! A mawhna-in zatui tampi na zang zo hi; nang adingin damna om tuon lo hi.

¹²Minamte in na zumhuoina uh a za vua, leitungah na kaana aw uh a kidim hi; azieh pen galhang le galhang kiphukha-in, a ni gelin a puaton uhi.

¹³Egypt gam sim dingin Babylon kumpipa Nebuchadnezzar peina tawh kisai-in TOPA in Jeremiah kunga a gen thu tam bang ahi hi:

¹⁴Egypt gamah genzah inlen, Migdol khuo ah phuongzah in; Memphis khuo le Tahpanhes khuo ah tangko in; “Na kimvel vua om mite namsau in valh ahi ziehin, na panmun uh la unlen a kigingsa-in om un,” va ci ta’n.

¹⁵Bang dingin Apis taimang[125] ahei? Na bawngtang pasien uh bang dinga ding lo ahei? Bangzieh ahei cile TOPA in ama a sawnpua hi.

¹⁶Na mihonpite uh kipalin[126] a pua sieng vua, “Ei susie namsau ziehin, hing pei un, i mipite kung le i pienna gamah kinualekia vai,” khatlekhat[127] a kici uhi.

¹⁷Egypt kumpipa, Pharaoh khu “Mi kam tam, a hun hoi teng a tan pa,” ci-in min pie un.

¹⁸A min Vanglien TOPA kici, Kumpipa in a genna-ah, keima a nungta ka hi ma bangin, muolte lahah Tabor muol bang le tuipi gei-a Carmel muol bangin mi khat ang pei ding hi.

¹⁹A nop khan Egypt tanu aw, sal tang dingin na puonlomte zielsa-in koi in! Azieh pen Memphis kinuasie ding a, a teng om loin kisie ding hi.

²⁰Egypt gam khu bawngla melhoi bang a, leilu lam gam panin cippi khat ama tungah a tu hi.

²¹A galkap guoite nangawn zong bawngno thaute bang uhi; amate tungah tuosietna ni le dan piehna hunte a tun ziehin amate in a sim tentun sih vua, kihei-in a taiton uhi.

²²Sing phuate bangin tua nu sim dingin hei tawh a galte a honpi-in a kuon ziehin tua nu in gul kithol ging bangin a aw a gingsah hi.

²³Gam a pha sengin kiphu zo sih zong le a gam mangte uh a phua ding uhi, TOPA in ci hi. Bangzieh ahei cile amate kauphe sangin a tamzaw vua, sim zawh ding ahi sih hi, TOPA in ci hi.

²⁴Egypt’ tanu kimaizumsah ding hi; leilu lam pana ang peite’ khut sungah tua nu kipie ding hi.

²⁵Israel’ Pasien, Vanglien TOPA in tam bangin ci hi: En in, keima in Thebes khuo-a Amon pasien le Pharaoh, Egypt le a pasien-te ule a kumpite uh, Pharaoh tung le ama tunga kinga teng tungah gimna ka tungsah ding hi.

²⁶Amate a tha sawm Babylon Kumpipa Nebuchadnezzar le a uliente’ khut sungah amate ka pie ding hi. Tua zaw ciengin tanglai hun ma bangin Egypt gamah mi tengkia ding hi, TOPA in ci hi.

²⁷Hinanle ka nasempa Jacob aw, zau malmal sin, Israel aw, lungkie malmal sin; azieh pen a gamlapi panin kang hundam ding a, na suonlehlahte uh a saltanna gam panin ka hundam ding hi. Jacob kilekia-in siptah le nuomtahin om ding a, koima in ama a zausah nawn sih ding hi.

²⁸Ka nasempa Jacob aw, zau malmal sin. azieh pen keima in nang kang ompi hi. Amate lahah kang nawdawhna gam zosie ka sumang ding a, ahi vangin nang kang sumaimang sih ding hi! A kituoh bep khatin thu kang hil ding a, dan pieh loin lah kang mawh koi sih ding hi, TOPA in ci hi.