Read Zou JEREMIAH 47 Bible Online

JEREMIAH 47 - Zou bible

JEREMIAH 47

¹Pharaoh in Gaza khuo a sim masangin Philistia-te tawh kisai kamsangpa Jeremiah kungah TOPA’ thu a tung hi:

²TOPA in tam bangin ci hi: En un, leilu lam panin tui ang khang a, ang letin ang luong ding hi; amate in gam sung le a sunga om zosie hlummang ding a, khuopi le a sunga tengte zosie zong hlummang ding hi. Mite a kap ding vua, gam sunga teng zosie a mau ding uhi.

³Ama’ sakol ketot gingte, ama’ sakol leeng gingte le ama’ lengkang kigawi gingte ziehin, a khutte uh zawgawpin nu le pate in a tate uh a donzo ta sih uhi.

⁴Tua Philistia mi zosie a kisuhgam ding ni ang tun ding zieh le, Tyre le Sidon khuo-a om mi hu thei zosie suhmaimang nading ni ang tun zieh ahi hi.

⁵Gaza khuo in a lu met tol a, Ashkelon khuo mangthai zo hi. A omlai amau’ vanglietna[128] aw, bang tanvei noma le noma kisuliem ding na hi uh ahei?

⁶Kadei, TOPA’ namsau! Nang bang tanvei sip ding na hei? Na pai sungah kihengkia inlen, khawl inlen sip dide in!

⁷TOPA in thu a pieh ciengin tua[129] khu bangci sip thei ding ahei? Ashkelon khuo le tuipi gei teng sim dingin ama in a sesa ahi hi.