Read Zou JEREMIAH 48 Bible Online

JEREMIAH 48 - Zou bible

JEREMIAH 48

¹Moab Tungtang Thu. Israel’ Pasien, Vanglien TOPA in tam bangin ci hi: Nebo khuo khu da huoi sam e. A hawmkieu-a kikoi hi ta! Kiriathaim khuo kizumsah a, kilamang zo ta hi; khuo kulpi kizumsi sahin, suhsiet ahi zo ta hi;

²Moab gam’ minthanna a om ta sih hi. Heshbon khuo ah amate in a siet nading a lunggel uhi: “Hing pei un, minam khat a hina uh suhmang pieh vawi!” a ci uhi. Madmen khuo aw, nang zong suhdai[130] na hi ta ding hi; namsau in nang ang nuadel ding hi.

³Ngawi vawi un! Horonaim khuo pana kikona aw, “Gawgamna le sietna lienpi!” kici hi.

⁴“Moab gam kisusie zo a, a naupangte a kap uhi.

⁵Azieh pen Luhith muol katona lampi-ah a peito kawmun amate[131] nahpi-in a kap uhi. Azieh pen Honaraim khuo zotsuhna lampi-ah amate in manthai kikona aw a za uhi.

⁶Tai un! No le no kihundam un! Senel gam sunga gam- laa[132] tai bangin taimang ta un!

⁷A tahtahin na mun muonhuoite[133] le na goute na suon ziehin, nang zong ang kikaimang ding hi; a siempute le a tuonvaite tawh saltang dingin Chemosh a pei ding hi.

⁸Khuopi zosie-ah mi sumang pa ang pei ding a, khuopi khat zong suohta lo ding hi; TOPA gensa bangin muolkuomte mangthai ding a, zangleite kisusie ding hi.

⁹Moab adingin ci tuomkoi pieh un, azieh pen ama a kisie valon ding ahi hi; a khuopite hawmsuoh ding a, a sungah koima teng lo ding hi.

¹⁰Thasie kawma TOPA’ na a sempa in samsiet thuoh taheh; sisan suohsah lo a, a namsau a nuakoi kia pa in samsiet thuoh taheh.

¹¹Moab a neu lai panin nuom khan a, zutee tunga a om zuning[134] bangin a om hit hiet hi; zubeel khat panin zubeel khatah kihlei loin, salin zong kikai lo hi; tua ahi ziehin a tui ngai-in tui a, a gimnam zong a theng thei sih hi.

¹²Tua ahi ziehin TOPA in a ci na-ah, Moab mite zubeel sunga sun bangin a sung ding mi kang sawl hun ang tung valon ding a, amate in ama’ beelte hawmsahin ama’ tuibeelte[135] a tawkeh ding uhi.

¹³Tua ciengin Israel innkuonte in a kinepna uh Bethel a zumpi bangun Moab in Chemosh zumpi ding hi.

¹⁴“Ko galhangte le galsim hatte ka hi uhi,” bang dinga note in na ci thei uh ahei?

¹⁵Moab-a khuopite susie ding pa ang peito ta hi, a tangval deiteel tuomte uh gawlup dingin pei zo ta uhi, Vanglien TOPA a kici, Kumpipa in gen hi.

¹⁶Moab’ tuosietna ding nai zo ta a, a kisietna in mallangin a zuon hi.

¹⁷No a innveng zosie le a min a thei zosie in ama kaa pipi tave un; “ Vanglien kumpi ciengkhut le minthang ciengkhut bang dinga tawng ta mawh a!” ci un.

¹⁸Dibon khuo-a teng a tanu aw, na vanglietna pan kumsuh inlen, tuolgum ah to in! Azieh pen nang ang do dingin Moab susie pa peito ta hi; na kulpite zong susie zo ta hi.

¹⁹No Aroer-a tengte aw, lam gei-ah dingin na en un! A taimang pasal le a suohta numei nu dong un; “Bang thu a om ei?” ci-in dong un.

²⁰Moab kimaizumsah hi, azieh pen ama kisusie zo hi; kapin mau-in om un! Moab a kisuhsietna thu Arnon gun dungah va gen ta un.

²¹Muoltung zanglei gam teng le Holon, Jahzah, Mephaath,

²²Dibon, Nebo, Beth-diblathaim,

²³Kiriathaim, Beth-gamul, Beth-meon,

²⁴Kerioth, Bozrah, le Moab gam sunga a gamla a nai-a om khuopi zosie tungah thukhenna a tung zo hi.

²⁵Moab’ ki kisattawng a, a bante zong kitawngsah ta hi, TOPA in ci hi.

²⁶Moab zu khamsah un, bang ding ahei cile TOPA langpangin ama le ama kiliensah hi; a luoh lahah kibuolsah un; ama zong mite’ nuisatin a om ding hi.

²⁷Gutate lahah a kimat khah sih vangin nang adingin Israel khu nuizathuoi khat a suoh hi; ama na hopi sielin na lu na peisansan mawh hi!

²⁸Moab gama tengte aw, khuopite nuasie unlen, suong lahah teng un! Keen kawm lahah a om vakhu butom bang un.

²⁹Moab’ kiphatsahna ka za zo ta vua, ama a kinah phatsah mama hi. Ama’ kilietsahna, a kiphatsahna, a kihisahna, a lungkula a kisahthei dan teng ka za zo ta uhi.

³⁰Ama’ thangpaina kei mama in ka thei a, a kisielnate zuoupi ahi a, a sil bawlte zong zuoupi ma ahi hi, TOPA in ci hi.

³¹Tua ziehin Moab adingin ka mau ding hi; Moab-te zosie adingin ka kap ding hi; Kir-heres khuo adingin ka kap ding hi.

³²Sibmah lenggui aw, Jazar[136] ading sangin nangma adingin ka nah kaazaw hi. Na bamengte tuipi kansanin zam suoh a, Jazar tuipi dongin a zam hi; na khal singgate le na lenggate tungah a susie pa ang tungta hi.

³³Moab leihoi gam panin nuomna le kipahna kilamang zo ta hi; keima in lengga cilna panin lenggatui ka kangsah dawh ta hi; koima in kipahna awging tawh a cilkia ta sih vua, tua awging khu kipahna awging ahi sih hi.

³⁴Heshbon khuo le Elealeh khuote kap a, Jahaz cieng dong, le Zoar panin Horonaim le Eglath-shelishiah dongah amau’ kaana aw a ging hi. Azieh pen Nimrim tui nangawn a kang zo hi.

³⁵Tuale keima in Moab gam muol sang tungah kithoina nei a, a pasien-te kungah biehnate a tawi mite ka khawlsah ding hi, TOPA in ci hi.

³⁶Tua ahi ziehin Moab adingin theile kitum bangin ka lungsim a mau a, Kir-heres mite adingin theile kimut bangin ka lungsim a mau hi; azieh pen a nei a lamte uh mangthai zo ta hi.

³⁷Bang ding ahei cile lu zosie kimettol a, khamul zosie kimetmai hi; khut zosie atliem ahi ta a, kawngte ah la-ip puon a om hi.

³⁸Moab gam innkhum zosie le khuolai tuol-awng zosie ah kaana simlo bangma dang om lo hi; azieh pen keima in koima’ dei lo beel khat ka suhkeh bangin Moab gam ka sukeh hi, TOPA in ci hi.

³⁹Moab gam a kisie lah ahi ta’n! Amate nah kaa sam uh e! A maizumin Moab in ei elngat vawt ta khu la! Tuaci’n Moab khu a innveng zosie’ nuisat le lipkhap ahi ta hi.

⁴⁰Azieh pen TOPA in tam bangin ci hi: En in, ama in muvanlai bangin a hla zahin, Moab bawhsuh ding hi;

⁴¹a khuopite[137] kila-in a mun muonhuoite ki-imtawm hi. Khum ni ciengin nupi nau suoh bangin Moab galhangte’ lungsim in na a sa ding uhi.

⁴²Ama in TOPA langpangin ama le ama kiliensah ahi ziehin, Moab kisusie ding a, minam khatin a dingkia zo nawn sih ding hi.

⁴³Moab gama tengte aw, na masang vuah zauna, dum le thangte om hi! TOPA in ci hi.

⁴⁴A zau-a taite poma dum sungah kiesuh ding a, dum sung pana a katote poma thangah a awh ding uhi. Bang ding ahei cile a dan thuoh ding uh kumin Moab tungah tam thute[138] ka tungsah ding hi, TOPA in ci hi.

⁴⁵Heshbon hlim ah a basam galtaite a khawl uhi; azieh pen Heshbon panin mei khat ang kuong a, Sihon inn panin meikuong khat ang pusuoh to hi; tuami in Moab’ talpang le a gamlum mite’ luvunte a katum hi.[139]

⁴⁶Moab aw, gimna na thuoh ding hi! Chemosh mite kisusie zo ta hi, azieh pen na tapate uh salin kiman zo a, na tanute uh salin kipeipi zo hi.

⁴⁷Hinanle ni nukhia ciengin Moab a gam ka piekia ding hi, TOPA in ci hi. Moab tunga thukhenna tam cieng ahi hi.