Read Zou JEREMIAH 49 Bible Online

JEREMIAH 49 - Zou bible

JEREMIAH 49

¹Ammon-te Tungtang thu. TOPA in tam bangin ci hi: Israel in tapate nei lo amah? Ama in innluo ding nei lo amah? Tua ahile bang dingin Milcom in Gad gam la-in, a khuopite sungah a mite teng uh ahei?

²Tua ahi ziehin Ammon-te’ khuopi Rabbah sim nading galdo patauna aw ka ginsah hun ang tung valon ding hi, TOPA in ci hi; tua khuopi a kisie muol gawta suohin, a khuotate mei tawh kihaltum ding hi; tua ciengin Israel in a gam a suon mite ama in a suonkia ding hi, TOPA in ci hi.

³Hesbon khuo aw, da-in mau in, a zieh pen Ai suhsietin om ta! Rabbah tanute[140] aw, kap un! La-ip puon silin kap unlen, ciengpum tawh kisunliem un![141] Azieh pen a siempute le a tuonvaite tawh Milcom salin kipeipi ding hi.

⁴Bang dingin na hatna uh kisahtheipi na hi uh ahei? Na hatna uh a kiemsuh ding ahi hi. Upna nei lo tanu aw, nang in na haunate suongin, “Koi in kei ei sim ding ahei?” na ci hi.

⁵Keima in na veng zosie tung panin na tungah zauna kang tungsah ding hi, Vanglien TOPA in ci hi. Note kithezah gawpin na tuotuona vuah na tai ding vua, galtaite a kaikhawm ding koima a om sih ding hi.

⁶Ahi vangin khum nua ciengin Ammon-te a gam uh ka piekia ding hi, TOPA in ci hi.

⁷Edom Tungtang Thu. Vanglien TOPA in tam bangin ci hi: Teman gamah pilna a om nawn sih amah? Mi pilvangte kung panin thukupna a tawp ta amah? Amau’ pilna a maimang sieng ta amah?

⁸Dedan gama tengte aw, kinuahei-in tai unlen, a thuhna munah kumsuh un! Bangzieh ahei cile, ama dan ka pieh hun ciengin Esau tungah tuosietna ka tungsah ding hi.

⁹Lengga khawmte na kungah hing pei uleh amate in a sanghte nuasie lo ding uh amah? Zan lai-in gutate hing pei uleh amate nangawn in a dei teng beh la ding uhi.

¹⁰Ahi vangin kei in ka hile Esau a puon hawhdawhin a guohtangin ka omsah a, a kiphuolna munte ka phele a, ama a kiphuol thei ta sih hi. A tate, a sanggamte le a innvengte kisusie a, ama om nawn lo hi.

¹¹Na tagate uh nuasie un, keima in kemin ka hinsuo ding hi; na meigongte un zong keima ei muong uheh.

¹²Azieh pen TOPA in tam bangin ci hi: Dan tuoh dinga kilawm lote in dantawhna hai a dawn lo uh phamaw lai ding ahile, nang zong dan tuoh loin na om thei ding amah? Dan tuoh loin na om sih ding a, tua hai na dawn lo phamaw hi.

¹³Bang ding ahei cile kei le kei ka kiciem a, Bozrah pen mite’ lipkhap le zapi ding, nuasie ding le samsietna-a zah ding hi ding a, a khuopi zosie uzong hawmsuoh zing ding hi, TOPA in ci hi.

¹⁴TOPA kung panin thupha ka za a, minamte lahah kamtai khat kisawl zo hi: “No le no kikaikhawmin ama sim dingin hing pei unlen, gal sim dingin kisa un! a ci hi.

¹⁵Azieh pen minamte lahah a neu penin kang bawl ding a, mite in kang simmaw sah ding hi.

¹⁶Suong keen kawmah tengin muolsang dawnah a busa pa aw, mi’ giin dinga na opna le na kisahtheina in nang ang sol lawm ta hi. Muvanlai bangin a sangpi ah bu bawl nan lacin tua panin kang khiesuh veve ding hi, TOPA in ci hi.

¹⁷Edom gam pen a cimulthaw huoi khat suoh ding a, ama kunga pei zosie a cimul uh tho-in, a gimna teng uh ziehin a ehneh ho ding uhi.

¹⁸Sodom, Gomorrah le a kimvela khuote a kisuhsiet lai bangin tua munah koima teng loin, a sungah koima in khuomkhaw lo ding hi.

¹⁹Lonona munah a om tuute ka delmang ding a, Jordan hamphul lah pana ang kuonto humpi bangin, a gam panin thakhatin Edom[142] ka delmang ding hi; tuale keima in a gam sunga vaihawm dingin ka dei popo ka se ding hi.[143] Bangzieh ahei cile kei tawh a kibang koi om ahei? Koi in kei ei hlan thei ding ahei? Ka mai-a ding ngam ding tuucing koi ahei?

²⁰Tua ahi ziehin TOPA in Edom tunga a tunsah ding a gelnasa, le Teman gama tengte tunga tunsah a sawmte za in: Ganhing a note kitawmang tahtah ding hi; gan khumna in zong a tuokhah thute ziehin a dipkuo ding hi.

²¹A puana uh a ging ngai seng ahi ziehin leitung kithingsah hi; San Tuipi[144] dongah amau’ kaana kiza ding hi.

²²En in, muvanlai bangin ama lengto-in Bozrah tungah a hla zahin bawhsuh ding a, tua ni ciengin Edom galhangte’ lungsim, numei nausuoh dingte’ lungsim tawh kibang ding hi.

²³Damascus Tungtang Thu. Hamath le Arpad a lungmang uhi, azieh pen amate in thu hoi lo a za uhi; amate zau-in a lungkie vua, tuipi dai thei lo bangin a buoi uhi.[145]

²⁴Damascus thazawmin a taimang dingin kihei hi, patauna in ama mancip a, lungkhamna, le dana in ama tukon hi; numei nausuoh ding bangin a om hi.

²⁵Bang a cile a minthang khuopi, kipahna khuopi[146] khu a kinuasie ta adiei![147]

²⁶Tua ahi ziehin khum ni ciengin a tangvalte le a galkap zosie a khuolai tuol-awngah a pua ding uhi, Vanglien, TOPA in ci hi.

²⁷Keima in Damascus kulpi ah mei ka tawkuong ding a, tuami in Benhadad’ mun muonhuoi a katum ding hi.

²⁸Babylon Kumpipa Nebuchadnezzar in a zawsa Kedar le Hazor kumpi gamte tawh kisai-in TOPA in tam bangin gen hi: Ding unlen, Kedar sim dingin mainawt un! Nisuona lama om mite thatgam un!

²⁹A puonbuhte ule a ganhonte uh, a buh kotkhai puonte ule a van zosie uh ladawh un; amau’ adingin kalaohte kipeipi ding a, tam bang kikona aw khat kato ding hi: “Muncin tengah zauna behbeh!”

³⁰Hazor khuo-a tengte aw, taimang unlen gamlapi ah vahmang un! A thuhna munte sungah kiphuol un, TOPA in ci hi. Bangzieh ahei cile Babylon Kumpipa Nebuchadnezzar in nang langpan nading gelna le tupna nei zo ta hi.

³¹Tho inlen, kulpi tunkot ahi a, a khana ahi zongin a nei vateh lo, muongtah le bihtaha a om hit hiet gam khat va sim ta’n, TOPA in ci hi.

³²A kalaoh-te uh kimawh lahpieh ding a, a bawnghonte uh kitomgam pieh ding hi. A sam uh a heukieute muncin tengah ka thezah ding a, muncin teng panin amate tungah tuosietna ka tungsah ding hi, TOPA in ci hi.

³³Hazar khuo khu si-alte’ buolna suoh ding a, tua munah koima teng loin koima in a sungah khuom khaw lo ding hi.

³⁴Judah kumpipa Zedekiah kumpi a suo pat lamin Elam tungtang thu tawh kisai-in Jeremiah kungah TOPA’ thu tung hi.

³⁵Vanglien TOPA in tam bangci hi: Elam gam’ hatna bulpi ahi a thalpi ka kuoitawng ding hi;

³⁶tuale keima in Edom tungah van ning li panin hui nam li ka langsah ding hi; tua huite lahah amate kithethangin Elam panin ka delmang mite tun lona gam khat beh a om sih ding hi.

³⁷Amate a thasawm, a galte uh mai-ah Elam mite ka zausisah ding hi; keima in amate tungah gimna le a giinhuoi ka lungthahna ka tungsah ding hi, TOPA in ci hi. Amate ka thagam masangsie namsau in ka nuadelsah ding hi.

³⁸Elam gamah a kumpipa ule a vaihawm uliente thatin ka kumpi topha ka phut ding hi, TOPA in ci hi.

³⁹Ahi vangin ni nukhia ni ciengin Elam a gam ka piekia ding hi, TOPA in ci hi.