Read Zou JEREMIAH 5 Bible Online

JEREMIAH 5 - Zou bible

JEREMIAH 5

¹Jerusalem gawlzing lahah suhtai totai unlen, en kawikawi-in ciemte un! A tuol-awng teng sui-in en unlen, a dih gamtat le thuman a sui mi khat na mu vua ahile keima in Jerusalem[15] mawna ka maisah ding hi.

²“TOPA’ minin a kiciem vangun amate pen zuouthu tawh a kiciem ahi bo uhi.

³TOPA aw, nangma’ mit in thuman sui hi lo amah? Nang in amate na vuoh vangin amate in na a sa sih uhi; nang in amate na sat vangin a kibawlpha nuom tuon sih uhi. A maitang uh suongtum sanga a sahzaw-in a bawl uhi; amate a kisia nuom vawt sih uhi.

⁴Tua ciengin keima in, “Tam mite mizawng ahi a, thu ngaisutna a nei sih uhi; azieh pen amate in TOPA’ lampi le a Pasien uh’ thukham a thei sih uhi.

⁵Mihaute[16] kungah va pei ta vangin amate va hopi ta vang; amate in TOPA’ lampi a thei vua, a Pasien uh’ thukham zong a thei tahpi uhi,” ka ci hi. Hinanle amate in a unpi-un hahkol hliehtawngin, a kikhina khaute a botsat uhi.

⁶Tua ziehin gamlahah humpi in amate that ding a, senel gam sunga ngie in amate a susie ding hi. Kamkei in amau’ khuopite buh dap ding hi; tuate pana a pusuoh poma ehmal ding hi, azieh pen amau’ tatkhielna tam a, amau’ nuatolnate nasie luo hi.

⁷Na mawnate uh kang bangci maisah thei ding ahei? Na tate un keima ei nuasie zo a, pasien ahi lopite po tawh kiciem zo uhi. Gilva tahin an ka va ciengin amate in ang a kawm vua, numei pahtatte’ inn-ah a honpei valuoi uhi.

⁸A gilva sakoltang lante bangin a vengpa’ zi lunggulin a tau vahut uhi.

⁹Keima in tam teng ziehin amate dan thuohsah lo ding ka mah? TOPA in ci hi. Hici bang minam tungah phu la loin om ding ka hi amah?

¹⁰A lenggui guol lahah peito-in vasusie ta’nlen, hizongle a unpi-in suhmangpieh sieng sin; abate heusiengpieh in; azieh pen tuate TOPA- a’ ahi sih hi.

¹¹Azieh pen Israel innkuon le Judah innkuon-te kei tungah a muonhuoi vawt sih hi, TOPA in ci hi.

¹²Amate in TOPA thu-ah zuouthu a gen vua, “Ama’n bangma bawl sam sih va. Eite tungah sietna tung loin, gal le sa le kiel le ta zong i tuoh sih ding hi,” a ci uhi.

¹³Kamsangte lah hui a bang leltah uhi, azieh pen amau’ sungah thu a om sih hi. Amau’ thugen bangin a tung vuah kibawl ding hi!

¹⁴Tua ziehin Vanglien TOPA Pasien in tam bangin a gen hi: Amate in[17] tam thu gen zo uh ahi ziehin na kam sung vuah ka thute meikuong ka bangsah ding a, sing tawh a kibang tam mite meikuong in a katum ding hi.

¹⁵Israel innkuonte aw, a gamlapi panin na kung vuah minam khat kang puoh ding hi, TOPA in ci hi. Tua khu a thahat minam, tangmaleh lai-a a om ta bo, a ham na thei lo uh, a thugen zong na thei lo uh minam khat ahi hi.

¹⁶A thal-um uh pen a kihongsa han tawh kibang a, amate a unpi-un galhang thahat vive ahi uhi.

¹⁷Amate in na anlahsate ule na ante uh ang khawnpieh ding a, na tanu na tapate uh zong ang thagampieh ding hi; amate in na tuuhon, na bawnghonte uh ang khawnpieh ding hi; na lengguite ule na theikungte uzong ang nehmangpieh ding hi; amate in kul tawh a ki-im na muon mama uh noma’ khuopite namsau tawh ang suhsietpieh ding hi.

¹⁸Ahi vangin keima in tua ni cieng nangawnin zong note kang cigamsah sih ding hi, TOPA in ci hi.

¹⁹Na mite in, “Bang dinga TOPA i Pasien in tam teng zosiepi eite tunga ang bawl a ta diei?” ang ci ciengun nangma in amate kungah, “Kei ei nuasie-in, na gam sung vuah gamdang pasien-te’ na na sep bangun, na gam uh ahi lo gam khatah gamdang mite’ na na sem ding uhi,” na ci ding hi.

²⁰Jacob innkuon sungah tami thu genzah unlen, Judah sungah zong tami thu phuongzah un:

²¹No mimaw thu ngaisun thei lo mite, mit nei napi khuomu lote, bil nei napi khuo za lo mite aw, tami thu khu za un.

²²Kei nei giing sih uh amah, TOPA in ci hi. Ka mai-ah na citun sih uh amah? Keima in tuipi gamgi dingin senel ka koi a, tua khu kantan zawh lo dinga a dalna-a zah zing ding ahi hi; tuihuolte a kile valuh vangin amate in a zo zo sih vua, a gin vapual vangin a kantan zo tuom sih uhi.

²³Ahi vangin tam mite a lungtang uh khauhin, ledo nopna lungtang a nei vua, kilehei-in a peimang uhi.

²⁴Amate in a lungsim sung vuah, a huna guote ang zusah, tua guo le khal guo ei pie le eite dinga anlah hun ei sepieh pa, “TOPA i Pasien zatah vai,” a ci vawt sih uhi.

²⁵Na khielnate un tami na hoite a khahtan ta a, na mawnate un tua na hoite ang taansah ta uhi.

²⁶Azieh pen ka mite lahah mi ginalote kimu hi; amate in midangte’ neisate a lahpieh uhi. Amate in vathangsie bangin thang sie-in[18] mite a man uhi.

²⁷Va khumna bawng ah vate a dim ma bangin solna tawh a nga uh van teng tawh a inn uh kidim hi; tua ahi ziehin amate hau-in ang vanglien ta vua,

²⁸ang thau milmelin ang zol sipsep ta uhi. Amate in gitlo gamtatna lamah tawp hun kici a thei sih uhi; pa nei lote nopsah nadingin a thu uh thutangin khenpieh loin, tasamte nga ding thute-ah a panpi sih uhi.

²⁹Tam teng ziehin amate dan tuohsah lo ding ka mah, TOPA in ci hi. Tam bang minam khat tungah phu la lo ding ka mah?

³⁰A dipkuothuoi, a zauhuoi thu khat gam sungah pieng zo hi:

³¹Kamsangte in zuouthu a gen vua, kamsangte’ thupieh bangin siempute vaihawm hi.[19] Ka mite in tua bang dante a dei lai vaset vua, hinanle a tawpna ang tun ciengin bang na bawl ta ding vuoi?