Read Zou JEREMIAH 51 Bible Online

JEREMIAH 51 - Zou bible

JEREMIAH 51

¹TOPA in tam bangin ci hi: Keima in Babylon langkhat le Leb-qamai[158]-a tengte langkhatah a susie thei hui[159] ka langsah ding hi;

²keima in a zap ding mite Babylon ah ka sawl ding a, amate in tua gam a zap sieng ding uhi. Gimna ni a tun ciengin ama a langpan dingin muncin teng panin amate a kuon uh ciengin, amate in gam sung teng a hawmin koi ding uhi.

³Thaltawi pa in a thal kuoi sih hinlen, a sia songkhol zong sil sih heh. A tangvalte uh hinkhawi sih un; a galkap honte zosie that sieng un.

⁴Chaldea gam sungah amate kithatin a pua ding vua, khuopi gawldung tengah a liemgawp ding uhi.

⁵Israel’ Siengtho Pa mai-ah khielna tawh a gam uh kidim nanle, Vanglien TOPA a Pasien un Israel le Judah taisan lo hi.

⁶Babylon panin tai unlen, na hinna uh taipi ciet un! Ama’ khielnate sipi sih un. Bang ding ahei cile tam pen TOPA’ phulah hun ahi a, a mawna tawh kituohin ama in a thuh ding hi.

⁷Babylon pen leitung zosie a khamsah thei, TOPA’ khut sunga khamhai ahi hi; minamte in ama’ zu a dawn vua, tuaci’n minamte mimaw a suoh uhi.

⁸Thakhatin Babylon pua a, a guoicim sieng hi; ama adingin kapin mau un! Ama’ liemma nu ding zatui la un, ama dam thei lai kha ding hi.

⁹Babylon a cidam ding i hanciem vangun ama kidamsah thei lo hi. Ama taisan ta unlen, i gam ciet zuonin pei va vui; azieh pen a tunga thukhenna in vantung dongah tung a, vantungte dong nangawnah kikhangto zo ta hi.

¹⁰TOPA in eite ei dihsahna a talang zo ta hi; hing pei un, TOPA eite’ Pasien nasepnate Zion ah va gen ta vai.

¹¹Thaltangte hiem un! Thalbawm thaltang tawh dim un! TOPA in Babylon suhsiet sawm ahi ziehin Media kumpite a hantawh hi, azieh pen khumi khu TOPA’ phulahna ahi a, a biehinn ading phulahna ahi hi.

¹²Babylon kulte langkhatah diel khat khai unlen, galvilte hatsah un; a cing ding mi zong koi un; a buhdap dingin kithawi un; azieh pen Babylon-a tengte tawh kisai-in, TOPA in a gensa teng gel zo-in sem zo ta hi.

¹³No tui tamna gei-a teng gougil haute aw, na hun uh tawp zo ta a, na hinna khau uh tat zo hi.

¹⁴Vanglien TOPA ama le ama kiciem hi: Na tungah kauphe honpi bangin galkapte kang dimsah ding a, amate in na tungah guolzo-in awng ding uhi.

¹⁵A vanglietna tawh leitung bawl a, a pilna tawh leitung phutin, a theitelna tawh vantungte a kizahsah pa khu ama ahi hi.

¹⁶Ama in a aw a ginsah ciengin vante-a om tuite ging valuh a, ama in leimongte panin tuikhu a katosah hi. Ama in guo a zuh nadingin tun phesah a, a vankholna inn panin hui langsah hi.

¹⁷Mi zosie a mawlawm vua, bangma a thei sih uhi. Amau’ milimte ziehin khamkhengte a unpi-un a maizum uhi; azih pen a milim uh zuou ahi bo a, tuate sungah naahu om lo hi.

¹⁸Khumte kimanna a nei lo, kisolna nasep ahi bo hi; dan a kipieh hun ciengin amate mangthai ding uhi.

¹⁹Jacob’ tanh TOPA[160] khu tamte bang ahi sih hi. Bangzieh ahei cile ama na vannuoi a bawlpa ahi hi. Israel ama’ gouluo minam ahi a, ama’ min Vanglien TOPA ahi hi.

²⁰Nang ka khetbuh le ka galvan na hi hi: nang tawh minamte ka sat guoi a, nang tawh kumpi gamte ka susie hi;

²¹nang tawh sakol le a tunga tuongpa ka sat guoi hi; nang tawh sakol leeng le a tunga tuongpa ka sat guoi hi;

²²nang tawh numei le pasal ka sat guoi hi; nang tawh khangham le khangnote ka sat guoi hi; nang tawh tangvalte le ngahnute ka sat guoi hi;

²³nang tawh tuucingpa le a tuuhonte ka sat guoi hi; nang tawh lo nei pa le a pawlte ka sat guoi hi; nang tawh gam uhte le a khut nei-a uliente ka sat guoi hi.

²⁴Babylon le Chaldea gama tengte zosie in Zion ah sietna a bawl zosiete uh ziehin nangma’ muna-ah amate ka thuh ding hi, TOPA in ci hi.

²⁵A susie muolpi aw, leitung buppi a susie pa aw, nang kang langpan hi, TOPA in ci hi; nang langkhatah ka khut ka zah ding a, keen kawm panin kang liasuh ding a, a katum muol kang suohsah ding hi.

²⁶Innkiu suong ding le inn khuombul dingin nang tung panin bangma suong kila lo ding hi. hinanle nang gamkhing na suoh zing ding hi, TOPA in ci hi.

²⁷Khum gamah diel khai unlen, minamte lahah pengkul mut un; tua nu sim dingin minamte kithawisah unlen, ama sim dingin kumpi gamte, Ararat, Minni, le Ashkenaz gamte hlan un; ama sim dingin galkapmang khat se unlen, kauphe hon kitom bangin sakolte kai un.

²⁸Ama sim dingin minamte kithawisah un. Media kumpite, a uhpite le a khut nei-a uliente tawh amau’ uhna sunga gam zosie kithawisah un.

²⁹Khum gam citunin kin gawp hi. Bangzieh ahei cile TOPA in Babylon sim ding a gelna a tangtung hi. Ama in Babylon gamkhing suohsahin, koima’ ten lona suohsah hi.

³⁰Babylon galhangte gal kido khawlin, a mun muonhuoi sung vuah a om ta uhi; a thahatna uh tawp sieng a, numei tawh a kibang uhi; a innte uh mei tawh kihal a, khuopi tunkotgol sietawnte a tawngsan sieng hi.

³¹Babylon kumpipa kungah muncin teng panin khuopi kila zo hi, ci thu a ko dingin patong khatlekhat, kamtai khatlekhat a kimu dingin a tai kawikawi uhi:

³²Tanmunte kila zo a, zang phaite kihaltumin, galkapte a patau uhi.

³³Azieh pen Israel’ Pasien, Vanglien TOPA in tam bangin ci hi: Babylon’ tanu a kisiacil ciengin ama ancilna mun tawh kibang hi; hinanle bano khat sungin ama anlah banga a kilah hun ang tung ding hi.

³⁴“Babylon Kumpipa Nebuchadnezzar in ei valtumin ei suguoi hi; beelhawm bangin ei koi a, gulpi bangin ei nawmval hi; ama ka sa tuilai teng tawh kivakham a, tuaci’n keima ei luokhie kia hi.

³⁵Babylon tungah a kisemnen ka tahsa kithuh taheh,” Zion-a tengte in ci ding uhi. “Chaldea-a tengte tungah ka sisan kithuh taheh,” Jerusalem in ci ding hi.

³⁶Tua ahi ziehin TOPA in tam bangin ci hi: Na vai kang seppieh ding a, phu kang lahpieh ding hi. A tuipi ka gawtasah ding a, a ciatui ka kangsah ding hi;

³⁷tuale Babylon pen van kisie lompi, le si-alte kuo suohin, a lipkhap huoi, a ehheh huoi le koima’ ten lona mun a suoh ding hi.

³⁸Humpite bangin a hawh vapuoh ding uhi; amate in humpi note bangin mi a ngih ding uhi.

³⁹A du mama laitahun a dawn ding uh zu ka pie ding a, a guolnop dong uh amate zu khamsahin, tuaci’n amate khanglo nawn loin a lum den ding uhi, TOPA in ci hi.

⁴⁰Gaw dinga a kipeipi tuunote bang ahi a, tuutang le keelte bangin ahi zongin, amate ka peipisuh ding hi.

⁴¹Bangci danin Sheshach[161] kila a, leitung buppi’ kisah theina kila dawh a ta diei! Bang a cile minamte lahah Babylon cizat huoi suoh a ta diei!

⁴²Babylon ah tuipi letto a, tuihuol zauhuoite in ama hlummang hi.

⁴³A khuopite cizat huoi suoh a, leigaw senel gam suoh sieng hi. Khum gam sungah koima teng loin, koima in nawhkha lo hi.

⁴⁴Babylon ah Bel ka gawt ding a, a valsate ka luokhesah ding hi. Ama kungah minamte a honhonin pei nawn lo ding hi; Jerusalem kulpi cim zo hi.

⁴⁵Ka mite aw, ama sung panin pusuoh un! A zauhuoi TOPA’ lungthahna panin mi zosie kisuotah ciet un!

⁴⁶Gam sunga kam baleng kigente ziehin lungkie loin zong zau sih un. Kum khatin kam baleng khat kigenin a kumkia ciengin adang khat kigen hi. Gam sungah tatsietna le kumpi khat le kumpi khat kidona kam balengte a ging hi.

⁴⁷Babylon milimte dan ka pieh ni ding ang tung valon ding hi; a gambuppi kimaizumsah ding a, a mi kithatte khuo lai-ah a pua ding uhi.

⁴⁸Tua ciengin vantung, leitung le a sunga om na zosie in Babylon ziehin kipahin la a sa ding uhi; bangzieh ahei cile amate do dingin leilu lam panin mi susie dingte ang pei ding uhi, TOPA in a ci hi.

⁴⁹Babylon ziehin leitung zosie-ah mi kithatte a pua bangin, Israel a thagam ziehin Babylon pua valon ding hi.

⁵⁰No namsau pana a suohta teng aw, pei pai unlen lung uoikai nawn sih un! A gamlapi panin TOPA phawh zing unlen, Jerusalem lunggul zing un:

⁵¹Gensietna ka zah ziehun mitzum maizum teng ka tuoh vua, minsietna in ka mai uh a tuom ta hi. Bang ding ahei cile TOPA’ biehinn mun siengthote sungah gamdang mite a lut ta uhi.

⁵²Tua ahi ziehin a milimte ka gawt ding hun ang tung valon ding a, a gam sung muncin tengah a milimte a tau ding uhi, TOPA in ci hi.

⁵³Vantung dongah Babylon kato nanle, a sangpi-in a kulpi get zong nanle, keima kung panin mi susie dingte ama tungah tung veve ding hi, TOPA in ci hi.

⁵⁴Ngai un! Babylon pana kaana khu! Chaldea pana suhsietna gingpi khu!

⁵⁵Azieh pen TOPA in Babylon a hawmguohin koi a, a husa a daisah ta hi. A tuihuolte tuipi kilawh ging bangin hawh vapuoh a, a husa in gamcin teng thawn hi;

⁵⁶azieh pen Babylon tungah a susie dingte a kuon zo tah ziehun, a galhangte uh kiman zo a, a thaltangte uh tawng sieng zo hi; azieh pen TOPA khu a thuhkia thei Pasien ahi a, ama in a kimin thuhkia ding hi.

⁵⁷A uliente uh, a mipilte uh zu ka tekham ding a, a gam uhte, a khut nei-a uliente le a galhangte zu tekhamin, amate pong lo kei-in lum den ding uhi, a min Vanglien TOPA a kici, Kumpipa in ci hi.

⁵⁸Vanglien TOPA in tam bangin ci hi: A sa mama Babylon kul khu lei ah cimsuh ding a, a khuo kul sangpite mei tawh kihaltum ding hi. Mite bangma lo a balia vua, mite in mei tawh hal ding bepin a gimpi uhi.[162]

⁵⁹Judah Kumpipa Zedekiah a kumpi sep zaw a kum lina kum, kamsang Jeremiah in Babylon gama a na zawpi lai-a, Mahseiah’ tapa, Neriah’ tapa Seraiah thu a na pieh khu tam bang ahi hi. Seraiah pen galkap vansai pa ahi hi.

⁶⁰Jeremiah in Babylon tawh kisai-in Babylon-a tung ding gimna zosie laiziel khatah giel hi.

⁶¹Jeremiah in Seraiah kungah tam bangin ci hi: “Babylon na tun ciengin tam thu zosie na sim ding a,

⁶²‘TOPA aw, nang in mihing le ganhingte teng loin, kumtawna a kinuasie dingin tam mun suhsiet ding na galgih hi,’ ci-in gen in.

⁶³Tam laiziel na sim zaw ciengin suong khat tawh khi inlen, Euphrates gun lai-ah paimangin,

⁶⁴tuale ‘Ama tunga[163] ka tunsah gimnate ziehin Babylon tam bangin tumsuhin dawhto kia nawn lo ding hi,’ ci-in gen in,” a ci hi. Jeremiah’ thugenna tu-a cieng ahi hi.