Read Zou JEREMIAH 6 Bible Online

JEREMIAH 6 - Zou bible

JEREMIAH 6

¹Benjamin’ suonte aw, na suotah nadingun Jerusalem laikim panin tai un. Tekeo- ah pengkul mut unlen, Beth-haccherem ah lim khat khai un. Bangzieh ahei cile leilu lam panin gimna le sietna lienpi ang tung hi.

²Keima in Zion tanu khu a deihuoi pen lonona gam[20] tawh ka tekah hi.

³Tuucingte a tuuhon utawh ama sim dingin a kuon ding vua, a kimvel vuah a puonbuhte uh lamin a unpi-un a mun ciet vuah ganhonte a vah ding uhi.

⁴“Tua nu tawh kido dingin kithawi un. Tho un, sunlai-in sim va vui!” a ci uhi. “A da i hi ta uhi, azieh pen ni lah kiemsuhsuh ta, nitah lam a hlimliep zong ang sau tehteh ta!” a ci uhi.

⁵“Tho un, zan ciengin simin, a kumpi innte uh susie vai!” a ci uhi.

⁶Azieh pen Vanglien TOPA in tam bangin ci hi: A singte phua sieng unlen, Jerusalem sim nadingin leicien cieng un. Daan tuoh valon ding khu tami khuopi ahi hi.[21] A sungah bawlsietna ci simlo bangma dang om lo hi.

⁷Tuikhuh sungah tuiciim a vei kihkiah bangin ama in a gitlona tuiciim bangin a khol hi. A sungah tatsietna le kisuhsietna kiza den a, ka masangah natna le liem le bai om zing hi.

⁸Jerusalem aw, kidawm in, na kidop sih leh nang hing kidahin kang nua heisan ding a, gamkhing le koima ten lona gam kang suohsah ding hi.

⁹Vanglien TOPA in tam bangin ci hi: Lengga kungah a sangh teng a kikhon sieng bangin Israel a omlai teng zong khon[22] sieng vet in. Lengga khon pa bangin a bate tungah na khut zamsah kia in.

¹⁰Amate in a zah thei nadingin koi hopi-in koi galgih ding ka hei? En vawi, a bil uh bing a,[23] khuo a za thei sih uhi. Amate dingin TOPA’ kammal khu simmawna-a kizang ahi a, tua sungah nuom a sa sih uhi.

¹¹Ahi vangin keima pen TOPA’ thangpaina tawh ka kidim a, ka sunga ka khol ding zong ka cimtah ta hi.

¹²Amate, a inn uh, a lote ule a zite utawh midang kungah kipieton ding hi. Bangzieh ahei cile khum gama tengte langah ka khut ka zah ding hi, TOPA in ci hi.

¹³Bangzieh ahei cile a neupen pan a lienpen dongin thumaan lo sum ngana lamah a koimapo a duhop uhi; kamsangte a kipan siempute dongin koimapo in zuou a phuoh uhi.

¹⁴Amate in ka mite’ liemma a thop bawlpieh vua, kilemna om vawt lopi, “Kilemna, kilemna,” a ci mawhmawh uhi.

¹⁵Zumhuoi tahin gamta-in a kidahhuoi nate a bawl vua, hinanle amate maizum loin, kisuonna dan zong a thei sih uhi. Tua ahi ziehin a puate lahah amate zong a pua ding uhi. Amate dan ka pieh hun ciengin a kilawnkhie ding uhi, TOPA in ci hi.

¹⁶TOPA in tam bangin a gen hi: Lamka bawm-ah ding inlen khuodah un. Lam hoi ahi lampi luite dong unlen, tua lampi khu zui un. Tua hile note in toidamna na mu ding uhi. Ahi vangin amate in, “Ka zui sih ding uhi,” a ci uhi.

¹⁷Note dingin galvil ding mite ka koi hi: Keima in “Pengkul gin ngai un!” ka ci hi. Ahi vangin , “Ngai sih va ung,” a ci uhi.

¹⁸Tua ahi ziehin minamte aw, za un. Mihonpite aw, amate kunga tung ding thu thei un.

¹⁹Leitung aw, za in. Amate in ka thute khawhsa loin ka thuhilte a nuol ziehun tam mite tungah a gelna ga uh ahi, gimna ka tungsah ding hi.

²⁰Sheba pana ang pei panamtui hile, gamlapi pana ang pei sing namtuite hile, ken bangin mang ding ka hei? Na meihal biehnate uh kisang thei lo a, na biehpiehnate un ei lungdamsah lo hi.

²¹Tua ahi ziehin TOPA in tam bangin gen hi: En un, amate a pua nadingin keima in tam mite mai-ah a kipal thei ding uh nate ka koi ding a, pate le tate, innvengte le lawm le guolte tawh a kisie ding uhi.

²²TOPA in tam bangin gen hi: En un, leilu lam gam panin minam khat ang pei ding a, leimong a gamla pen panin minam lien khat gal sim dingin a kithawithawi ta hi.

²³Amate in thal le teipi a tawi vua, gilo-in hepina a nei sih vua, a huging uzong tuipi hawh ging tawh kibang hi. Zion tanu aw, nang ang sim dingin sakol tungah a tuong vua, galkuon dinga a kisa galhang khat bangin a kivon uhi!

²⁴“Amau’ thute i za zo ta vua, i khutte uh a zaw sieng ta hi. Lungkhamna in ei tukon a, numei nausuoh bangin na i sa hi.

²⁵Galte in namsau a tawi vua, i kimvel zosie a zauhuoi ziehin, gam lahah pei sih unlen, lampi-ah zong pei sih un,” a ci hi.

²⁶Ka mite aw, la-ip puon sil unlen, vut lahah kilawmlia un. Tapa tang khat a kikaa bangin mau-in nahpi tahin kap vapo un. Azieh pen ei susie ding pa thakhatin eite tungah ang tung ding hi.

²⁷Amau’ lampite thei-in note in na ze-et thei nadingin, ka mite lahah a ze-et pa le a siengsah pa[24] dingin nang kang bawlzo hi.

²⁸Amate ahile a unpi-un a lungkhau mi ledote ahi vua, mi daisahin vah kawikawi uhi. Sumngo le siatang bangin a sah vua, a unpi-un a sie lamin a gamta uhi.

²⁹Pum hazapin kizap a, mei in hanawh tang a tuisah sieng hi. Tua puma a kizapzap khu a mawhnapi ahi bo hi. Bangzieh ahei cile migilote a kizap sieng zo sih hi.

³⁰Amate “a kinuol ngun” kici ding hi. Azieh pen TOPA in amate nuol zo hi.