Read Zou JEREMIAH 7 Bible Online

JEREMIAH 7 - Zou bible

JEREMIAH 7

¹Jeremiah kunga a tung TOPA’ kammal tam bang ahi hi:

²TOPA’ biehinn kotpi-ah ding inlen, tua munah tami thu phuongzah in: TOPA a bie dinga kotpi sunga ang lut no Judah mite zosie aw, TOPA’ kammal ngai un.

³Vanglien TOPA Israel’ Pasien in tam bangin ci hi: Na lampite ule na gamtatnate uh puopha unlen, tam munah note[25] tawh ei tengtonsah un.

⁴Tam bang zuouthute tahsang sih un: “Tami[26] TOPA’ biehinn ahi hi, TOPA’ biehinn ahi hi, TOPA’ biehinn ahi hi,” a ci uhi.

⁵Bangzieh ahei cile note in na lampi ule na gamtatnate uh na puophat tahtah vua, khatlekhat tungah thutanga thu na vaihawm tahtah uleh,

⁶pemtate, pa nei lote, le meigongte gawt loin, ahi sihle tam munah midihte sisan luongsah loin na siet nadingun pasien dangte nua na zui sih uleh,

⁷tanglai-a na pu na pate uh tungah a nei zing ding vua ka pieh tam gam sungah note tawh kang tengton ding hi.

⁸En un, kimanna a nei lo zuouthu kigente na tahsang talawm uhi.

⁹Note guta-in tuol thatin, ang kawmin, a manlopi-in kiciemin, Baal kungah biehna pie-in na thei ngai lo uh pasien dangte nuazui-in,

¹⁰tua ciengin hing pei-in ka min tawh kilo tami biehinn sunga ka mai-ah dingin, “Kote suohta ta ung!” na cizaw ciengun a kidahhuoi tami nate zosie pi ma bawlkia zel ding na hi uh amah?

¹¹Ka min tawh a kilo tami biehinn nohaw’ muna-ah misuomte’ kibuhna mun a suoh ta amah?

¹²Tu-in a cila ka min ka tensahna Shiloh-a keima’ munah va pei ta unlen, ka mi Israel-te gitlona zieha ka silbawl va en ta un.

¹³Tu-in zong tam silte zosie na bawl vua, na kung vuah kang gengen vangin ngai tuon loin kang hlat hlat vangin ei dawng lo na hi ziehun

¹⁴ka mina a kilo, na muon uh tami biehinn le note tung le na pu na pate uh tunga kang pieh tami mun khu Shiloh-a ka bawl bangin ka bawl ding hi.

¹⁵Keima in na sanggamte uh Ephraim’ suonlehlah zosie ka nawmang bangin keima’ mun panin note zong kang notmang ding hi.

¹⁶Tam mite adingin thu ngetpieh sin, amate adingin kap sinlen, zong thumpieh sin. Bangzieh ahei cile keima in na thungetna kang ngaipieh sih ding hi.

¹⁷Judah gam sunga khuopite sung le Jerusalem gawlzingte lahah a silbawl uh mu lo na hi uh amah?

¹⁸Naupangte in sing tomin pate in mei a taw vua, nupite in vantung kumpinu’ moh bawl nadingin annel pawi-in ka thangpai thei nadingin pasien dangte kungah dawn thei biehnate a sung uhi.

¹⁹Amau’ thangpaisah pen kei ka hi amah?” TOPA in ci hi.

²⁰Tua ahi ziehin TOPA in tam bangin gen hi: Tam mun, mihingte le ganhingte tung, lolai-a singkungte le lei lah singgate tungah ka lungthahna le ka thangpaina ka sung ding a, tua khu kuongin kiphel zo lo ding hi.

²¹Vanglien TOPA, Israel’ Pasien in tam bangin ci hi: Na biehpiehnate vuah na meihal biehnate uh gawmin a sa ne un.

²²Bangzieh ahei cile Egypt gam panin na pu na pate uh ka peipi lai-in meihal biehnate le biehpiehnate tawh kisai-in amate ka hopi sih a, thu zong ka pie sih hi.

²³Hizongle amate tungah, “Ka thu mang un, tua hile keima note’ Pasien ka hi ding a, note zong keima’ mite na hi ding uhi; note na nopsah thei nadingun kang thupieh lampi beh zui un,” ci-in thu ka pie hi.

²⁴Ahi vangin amate in ka thu ei mang loin a bil uh ei ngat sih uhi. Amate in a lungtang gitlona uh khausahin amau’ deina lam zui-in a gamta zawsop vua, mainawt loin a nuatawn uhi.

²⁵Egypt gam panin na pu na pate uh a pei ni-a kipanin tuni cieng dong, amate kungah ka nasem kamsangte ni khat zaw ni khat ka sawl zing hi;

²⁶hizongle amate in ka thu ei ngai loin zong ei thuse sih vua, a ngawng uh a khausah zawsop uhi. A pu a pate uh sangin a siezaw-in a gamta uhi.

²⁷Tuaci’n tam thute zosie amate kungah na gen ding a, ahi vangin amate in na thu a ngai sih ding uhi. Amate na hlan ding a, ahi vangin ang dawng sih ding uhi.

²⁸Nangma in amate kungah tam bangin na gen ding hi: Tam minamte pen TOPA a Pasien uh’ thu a mang lo minam ahi vua, thuhilna a sang nuom sih uhi; thuman thutah kisie zo hi; amau’ kam panin zong a kisattan ta hi.

²⁹Na sam uh met unlen paimang un; muolpawn sangte[27] tungah kaala awi in, bangzieh ahei cile TOPA in ama a thangpaisah khang mite nuolin nuasie zo hi.

³⁰Bangzieh ahei cile Judah mite in ka muna-ah sil hoi lo bawl zo uhi, ci-in TOPA in a gen hi. Amate in ka min tawh a kilo ka inn sungah a kidahhuoi nate koi-in a buasah uhi.

³¹Ka lungsim sunga ka gel ngai lo, zong thu ka pieh ngai lopi-in amate in a tapate ule a tanute uh mei-a a haltum nadingin Hinom tapa’ Kuom sungah Topheth a kici munsang[28] a lam uhi.

³²Tua ahi ziehin TOPA in kang ci-in, tua mun pen Topheth a kici nawn lo ni le Hinnom tapa’ Kuom a kici nawn lo ding ni ang tung valon ding a, Kigawna kuom kicizaw ta ding hi; azieh pen Topheth ah misi vui nading mun a op nawn lo dongin a vui ding uhi.

³³Tam misi luongte vana leng vate le lei-a om gamsate’ an suoh ding a, koima in tuate a heumang zo sih ding hi.

³⁴Tuale Judah khuopite le Jerusalem gawlzingte-ah kipah thanop awging le motha nu le zi neipa’ awging ka tawpsah ding hi; azieh pen tua gam kinuasie ta ding hi.