Read Zou JEREMIAH 8 Bible Online

JEREMIAH 8 - Zou bible

JEREMIAH 8

¹Khum hun ciengin Judah kumpite’ gu le tangte, uliente’ gu le tangte, siempute’ gu le tangte, kamsangte’ gu le tangte, le Jerusalem-a a teng mite’ gu le tangte a hankhuh uh panin kiladawh ding hi;

²tuale amate in a it uh, a na a seppieh uh, a nua a zui uh, a sui ule a bieh uh nipi le hlapi le vana om na zosie’ mai-ah a kithezah ding hi; tua gu le tangte kikhawm loin zong kivui lo ding hi; amate pen lei lahah a kinuasie eh tawh a kibang lel ding uhi.

³Amate ka delmangna mun zosie-ah tam a gilo innkuonte zosie sung panin a omlai teng in nuntatna sangin sina a teelzaw ding uhi, Vanglien TOPA in ci hi.

⁴TOPA in tam bangin a gen hi, ci-in amate kungah va gen ta’n: Mite a pua ciengin thokia sam uh hi lo amah? Mite lam a piel uleh kinualekia sam hi lo amah?

⁵Tua ahile bang dinga tam mite[29] kiheimangin, nuatol zing ta uh ahei? Amate in solna a tudet vua, a kinuale nuom ta sih uhi.

⁶Keima in hoi tahin ka ngaipieh a, ahi vangin dihtahin a gen sih uhi; a gitlona uh panin koima kisia lo a, “Bang ahei ka bawl?” ci lel uhi. Galsim dinga a tai sakol bangin a unpi-un a lampi ciet a zui uhi.

⁷Vana a leng gun vapi nangawn in a lal hun ding thei buong sam hi; vakhu, sielpaleng, le tui vatawtte[30] in zong a tun hun ding uh thei sam uhi; ahi vangin ka mite in TOPA’ thupiehte a thei sih uhi.

⁸Bangci bangin note in, “Ko ka pil vua, kote tawh TOPA’ thukham a om hi,” ci thei na hi uh ahei? A zuouthei laitheite’ laikung in bang hunin tua thukham khu zuouthu suohsah ta uh ahei?

⁹Mipilte kizumsah ding a, amate lungkie-in kiman ding hi. Amate in TOPA’ thu a nuol ta uhi. Amate in bang pilna nei uh ahei?

¹⁰Tua ahi ziehin a zite uh midangte ka pie ding a, a logamte uzong galzote ka pie ding hi. Azieh pen mi zosie a neupen pan a lienpen dongin thuman lo-a sum ngana lamah a duhop ciet uhi. Kamsangte a kipan siempute dongin mi zosie zuouthu-in a gamta uhi.

¹¹Amate in ka mite’ liemma a thop bawlpieh vua, kilemna om vawt lopi, “Kilemna, kilemna,” a mawh ci uhi.

¹²Amate zumhuoi tahin gamta-in a kidahhuoi nate a bawl vua, hizongle maizum vawt loin kisuonna dan zong a thei sih uhi. Tua ahi ziehin a puate lahah amate zong a pua ding vua, amate dan ka pieh hun ciengin a kilawnkhie ding uhi, TOPA in ci hi.

¹³Tuate ka khop nuom ciengin, lenggui-ah lengga a om sih a, thei kungah zong a ga om loin a nate nasan vul sieng a, amate ka piehte amate kung panin peimang ta hi, TOPA in ci hi.

¹⁴Bang dinga toto lai i hi uh ahei? Kikhawm vai-in, kulpi tawh a ki-im khuopi sungah lutin, tua munah va si ta beh vai. Azieh pen TOPA’ tunga i khiel ziehin TOPA i Pasien un a mangthai dingin ei na se zo a, eite’ dawn dingin gutui ei pie zo ta hi.

¹⁵Kilemna i sui vangun sil hoi i mu sih uhi. Cidamna ding hun i sui vangun zauna i tuoh zawsop uhi.

¹⁶Dan khuo panin a sakolte uh’ nahging kiza a, a sakol lante uh’ ham ging in gam buppi kilingsah hi. Amate pei-in tua gam le a sunga om zosie, khuopi le a sunga teng zosie, a valtum sieng uhi.

¹⁷En un, na lah vuah gulte le a kihlimzo lo gulsiete kang hla ding a, tuate in note ang tu ding uhi, TOPA in ci hi.

¹⁸Ka kipahna tawpin ka tungah dana om a, ka lungsim a na hi.

¹⁹Ngai vawi, gam sung cin tenga ka mite kikona awging khu: “Zion ah TOPA om lo ahi amah? A sungah a kumpipa om lo ahi amah?” a ci uhi. ( “Bang dinga a milimte ule a gamdang milimte utawh kei ei thangpaisah uh ahei?” a ci hi.)

²⁰“An lah hun in ei hleng ta a, khuokhal hun zong tawp zo ta hi, eite lah ei kihundam nai lo hi,” a ci uhi.

²¹Ka mite’ liemma khu keima liemma zong ahi a, ka kapkap a, lunggimna in ei kanbawm hi.

²²Gilead ah zatui om lo amah? Tua munah zato siem om lo amah? Bang dinga ka mite dam thei lo uh ahei?