Read Zou JEREMIAH 9 Bible Online

JEREMIAH 9 - Zou bible

JEREMIAH 9

¹[31] Aw, a kithat ka mite ziehin a sun a zana ka kaa thei nadingin ka lu khu ciatui hi hinlen, ka mitte khu hlitui’ nah hi le izaw!

²[32] Aw, ka mite nuasie-in amate kung panin ka taimang thei nadingin, senel gamah zintun buh ding mun khat nei leng izaw! Azieh pen amate angkawm le mi leheh honte ahi uhi.

³Amate in zuouthu gen nadingin a lei uh thalpi bangin a kuoi uhi; amate in thutah ahi lo zuouthu beh tawh gam sungah thunei-in a pang uhi; bangzieh ahei cile amate in sietna khatzaw khat a manaw tehteh vua, keima ei thei ta sih uhi, TOPA in ci hi.

⁴Na innvengte uh kidawm unlen, na sanggamte[33] khatpo zong muong sih un; azieh pen na sanggamte zosie[34] zuou phuoh ahi bo vua, innvengte zosie zong mi daisahte bangin a kawiva uhi.

⁵Amate zosie in a innvengte a sol ciet vua, thuman gen koima a om sih hi; amate in zuouthu gen dingin a lei uh a cil uhi; amate in khielna a bawl ziehun kisia ding gimhuoi a sa uhi.[35]

⁶Bawlsietna khat zaw gawtna khat, zuouna[36] khat zaw zuouna khat a bawl bebe vua, kei ei thei nuom sih uhi, TOPA in ci hi.

⁷Tua ziehin Vanglien TOPA in tam bangin ci hi: Tu-in amate siengthosahin ka encien ding a, mawnei ka mite adingin[37] bang dang bawl thei ding ka hei?

⁸A lei uh si theina thaltang ahi hi; a kam panun zuouthu a gen uhi. Amate a unpi-un a vengte tungah a thusiem hiuhiau vangun, a lungsim tawng vuah a si nading uh a dap gel veve uhi.

⁹Tam teng ziehin keima in amate dan pie lo ding ka mah? TOPA in ci hi. Tam bang minam khat tungah phu la lo ding ka mah?

¹⁰Muolte adingin kapin tau unlen, senel gam lonona munte adingin kaala awi un, bangzieh ahei cile tuate katum sieng a, koima in nawh kha nawn loin, bawnghon ham zong a kiza nawn sih a, vana a leng vate le gamsate a taimang sieng ta uhi.

¹¹Jerusalem buathah kholna le si-alte’ tenna ka suohsah ding a, Judah gam khuopite zong mi ten lona gamkhing ka suohsah ding hi.

¹²Tam thu a theisiem ding mipil koi om ahei? Amate in tam thu a pulah thei nadingun koi kungah TOPA in thu gen ahei? Koima in a nawh thei lo nadingin bang ziehin tam gam kisie-in senel gam bangin katum ta ahei?

¹³TOPA in tam bangin ci hi: Azieh pen amate in a mai vua ka koi ka thukham nuasie-in ka thu ngai loin tua thukham bangin a gamta sih vua,

¹⁴tuale mahin a lungsim deina uh zui tentunin a pu a pate uh hilna bangin Baal pasien-te’ nua a zui sieng ta uhi.

¹⁵Tua ahi ziehin Vanglien TOPA, Israel’ Pasien in tam bangin ci hi: Tam mite gamsai tawh ka va ding a, a dawn dingun gutui ka pie ding hi.

¹⁶Amate le a pu a pate’ thei khah lo minamte lahah ka thezah ding a, amate ka tha sieng dongin namsau in ka nuadelsah ding hi.

¹⁷Vanglien TOPA in tam bangin ci hi: Ngaisun un, numei a kapte ang pei nadingin hlan unlen, kaa a siem numeite ang pei nadingin va ciel ta un.

¹⁸Ka mit vuah hlitui luongin ka mitkhu vuah tui banga a pul nadingin amate in kote adingin kaala khat mallang tahin sa uheh.

¹⁹Bangzieh ahei cile Zion panin tauna aw khat kiza hi: “Eite bangci kisiet i ta diei! Zum citahin i zum uhi, bangzieh ahei cile amate in i tenna ei suhsietpiehin eite in zong i gam i nuasie zieh uh ahi hi,” a ci uhi.

²⁰Numeite aw, TOPA’ kammal za unlen, a kam pana ang ging thu na bil vuah lutsah un. Na tanute kaala hil unlen, na vengte ciet uh kaa dan ding hil un.

²¹“I tawlet vangah sina ang kato a, gawldung-a naupangte le mipi tuol-awngte om tangvalte a sumaimang dingin kumpi’ inn sungah ang lut zo ta hi,” a ci hi.

²²Gen in! TOPA in tam bangin ci hi: “Gamlahah misi luongte eh bangin kinuasie ding a, bu-at pa in bulom a nuasie bangin koima in khawmkia nawn lo ding hi,” a ci hi.

²³TOPA in tam bangin ci hi: Mipilte in a pilna uh kisahtheipi sih uh hinlen, mi hatte in a hatna uh kisahtheipi loin mihaute in zong a hauna uh kisahtheipi sih uheh;

²⁴a kisatheite in keima, TOPA leitungah itna kip, thutang, le thuman a zang ka hina ei theitelna vuah kisathei zaw uheh, azieh pen tamte ah kipahin ka lung a kim hi, TOPA in ci hi.

²⁵TOPA in a vuntep beha kitante zosie ka gawt ni ang tung valon ding hi, a ci hi:

²⁶Egypt, Judah, Edom, Ammon, Moab, le a sam a heukieu senel gama tengte zosie ka gawt ding hi. Azieh pen tam minam zosie in tep tan loin, Israel innkuonte zosie zong lungsim tep kitan lo ahi uhi.