Read Zou KAA LA 1 Bible Online

KAA LA 1 - Zou bible

KAA LA 1

¹Hun khat lai-a mi a dimna khuopi daidam talawm sam e izaw! Minamte lahah a liensa kimlai, bang dinga meigong bang ta adiei! Gamkhente lahah kumpinu hi sa kimlai, tu-in mi sila a suoh ta hi.

²Zan khuovahin kap a, a hlitui a bieng gelah a luong hi; a guolngai zosie lahah ama henem ding khat beh om lo hi; ama tungah a guolte zosie muonhuoi loin a gamta vua, amate pen ama’ gal le sa a suoh sieng ta uhi.

³Judah mite, bawlsietna le na hamsa a sem sawltahpi dingin salin kikai mang zo hi; tu-in ama’ minamte lahah ama teng a, khawl nading mun a mu sih hi; a lungdon hun laitahin a delte in ama a nuaphah uhi.

⁴Zion zotna lampite a mau vangut uhi, azieh pen pawi sim dingin koima a pei ta sih hi; A kotpi zosie kitawn nawn loin a siempute uh tau vangut uhi; a ngahnute a lunggim[1] vua, ama’ tanh khu mudana ahi hi.

⁵A galte pen a pute suohin, a galte a dau uh a pei hi. Azieh pen a suhkhiel a tam seng ziehin TOPA in ama gimna thuohsah hi; galte mai-ah a tate galmatin kikaimang sieng hi.

⁶Zion’ tanu thupina zosie maimang sieng zo ta hi. A makaite, neh ding lohing a mu zo lo sazuh tawh kibang hi; a delte mai-ah amate thazawmin a taimang sieng uhi.

⁷Jerusalem in a genthei ni le a vaiva ni-in tanglai-in ama-a’ ahi sil manpha zosie a phawhkia hi. Galte khut sungah a mite a pua lai-in, koima in ama panpi lo a, a galte in ama’ kiehsuhna enin a nuisan lel uhi.

⁸Jerusalem, nahpitahin maw a, tuaci’n mite’ simmaw a thuoh hi. Ama zahtah zosie in a guohtanga a op a mu ziehun ama a thuse ta sih uhi; ama le ama a tau vangut a, ama in a mai a lehei hi.

⁹A nih ah ama’ sientho lona a baang hi; ama in a mailam ding ngaisun lo hi; a kiehsuhna nasie mama a, a henem ding khat zong nei lo hi. “TOPA aw, ka gentheina ei en in, azieh pen galte in ei zo gawp hi!” a ci hi.

¹⁰Amau’ van manphate tungah galte in a khut a zah uhi; kikhopna sunga lut dinga na kham lawkite nangawn a biehinn sungah a lut uh ama in a mu hi.

¹¹Neh ding a sui kawmun ama’ mi zosie tau vangut uhi; amate a thahatkia nadingun a goute uh an tawh a khel uhi. TOPA aw, bangma ka mat lona ei en inlen ei mu in.

¹²Ei nawhkha zosie aw, no[2] dingin bangma ahi sih amah? Ei en unlen ei mu un. TOPA a thangpai mama ni-in ka tunga a tunsah gimna tawh a kibang gimna a om amah?

¹³Tunglam panin meikuong ang sawl a, ka gu ka tang teng ei zen hi; ka tot ding lenthang ei sie a, ama in ei kinualesah hi; sun nitumin khuo phawh lo, thazawngkhalin ei nuasie hi.

¹⁴Hahkol ah ka khielnate kikanbawm a,[3] tuate ama’ khut tawh ei khitha hi; ka ngawngah tuate ei khaipieh uhi; katha kazung teng a hup sieng hi; ka nan zawh lo galte’ khut sungah TOPA in keima ei pie ta hi.

¹⁵TOPA in keima kunga om ka galhang zosie ei nuolpieh ta hi; ama in kei ei sim nading, ka tangvalte a suhguoi nading hun khat phuongzah hi. TOPA in lengga cil bangin Judah’ tanu ngahnu siengtho a tuoncil ta hi.

¹⁶Kei ei henem ding le ei hanthawn ding mi tawh ka kigamla hi; tam teng ziehin ka kapkap a, ka hlitui in ei hlummang hi; galte in a zawgawp ziehun ka tate a cimaw uhi.

¹⁷Zion in a khutte a zah vangin a henem ding koima om lo hi; a innvengte a gal a suo thei nadingin TOPA in Jacob sim dingin thu a pie zo hi; amate lahah Jerusalem a sieng lo na a suoh hi.

¹⁸A thugen langpangin ka ledo vangin TOPA pen a man ahi bo hi; ahi vangin no mi zosie in ngai unlen ka thuohna en un; ka tangvalte le ka ngahnute salin kikaimang ta hi.

¹⁹Ka guolngaite ka hlan a, hinanle amate in kei ei sol uhi; ka siempute ule ka upate in a thahatkia nadingun an a sui kawmun khuopi sungah a si uhi.

²⁰TOPA aw, ka genthei dan ei en ven; kang nah langpan ziehin ka gil sung a kihotnawi a, ka sungah ka lungtang a kipingpei hi. Gawldungah namtem in tuol luong lumsah hi; inn sungah zong sina ma a om hi.

²¹Ei henem ding koima om loin amate in ka tauna a za uhi. Ka galte in ka gimna a za uhi; tam banga nei bawl a thangpha uhi. Na gensa ni hing tungsah inlen, amate keima tawh kibangsah in.

²²Na mai-ah a gitlona zosie uh hing tung taheh; ka bawlkhielnate ziehin kei tungah na bawl bangin amate tungah zong bawl in; azieh pen ka khuisahna a tam seng ziehin, ka lungsim a gim hi.