Read Zou KAA LA 2 Bible Online

KAA LA 2 - Zou bible

KAA LA 2

¹Bangci dan a TOPA a lungthah zieha Zion’ tanu khu hici kisimmaw[4] adiei! Ama in vantung panin Israel’ thupina leitungah paisuh zo hi; a lungthah ni-in ama in a keng ngahna phawh kha nawn lo hi.

²TOPA in hepina nei loin, Jacob’ tenna mun zosie susie zo hi; a lungthah ziehin ama in Judah tanu’ mun muonhuoi phelmang hi; ama in kumpi gam le a vaihawmte tuol sena-in nei-in muolphosah hi.

³A lungthah seng ziehin Israel’ thahatna zosie suguoi a, ama in galte mai-ah a khut zietlam dawh hi; ama in Jacob sungah meikuong bangin hal a, a kimvel zosie katum hi.

⁴Ama in gal bangin a thalpi kuoi a, alang pa bangin a zietlam khut tawh pang hi; ama in Zion tanu’ puonbuh sunga i kisahtheipi zosie that sieng hi; ama in meikuong bangin a lungsona a buosuh hi.

⁵TOPA pen gal bangin om a, Israel a susie hi; ama in a kumpi’ innte susie-in a kulpite zong a susie a, Judah tanute lai-ah kaa le mau a khangsah hi.

⁶Ama in um bangin a buh guoicimsah a, a biehbuh a susie hi; ama in Zion ah pawi le sabbath nite tawpsah a, a lungthah seng ziehin kumpi le siempute a ginase sih hi.

⁷TOPA in a maitam thuse loin a mun siengtho a nuasie hi; ama in a galte’ khut sungah kumpi inn kulbangte a pie zo hi; pawi ni-in a kiko bangun TOPA’ inn sungah amate a kiko valuoi uhi.

⁸Zion tanu’ kulpi cipzan ding pen TOPA in a sesa ahi hi; ama in ciemtena gamgi hawt a, a suhmang nadingin zong a khut a nuakai sih hi; ama in a kap a mau dingin leicien le kulpite siem a, amate khuisa-in a om uhi.

⁹Lei-ah a tunkotte tum sieng hi; ama in tunkotgol sattanin susie hi; a kumpipa le a miliente uh salin a om vua, lamlahna om nawn loin, a kamsangte in zong TOPA kung panin mangmuna a nga nawn sih uhi.

¹⁰Zion tanu’ putehte ham loin tuol ah a to uhi; a lu zang vuah leivui a kibuoh vua, la-ip puon sil uhi; Jerusalem ngahnute zong a tuolkun sieng ta uhi.

¹¹Ka kaa na lamin ka mit khamgawp a, ka gilsung a kikhuleh hi; ka mite a kisuhgam ziehin ka sinkha lei-ah a kibuohla ta hi, bangzieh ahei cile khuolai gawldung tengah naupangte le nausente husamin a balia uhi.

¹²A nute kungah, “An le tui hei-a om ahei?” ci-in a kapkap uhi. a liem a baite bangin khuopi gawldung lahah basamin a om vua, a nute uh’ kang sungah a hinna uh sunghla-in a si uhi.

¹³Jerusalem tanu aw, nang adingin bang ka gen thei ding a, koi pen tawh kang tekah ding ahei? Zion tanu ngahnu siengtho aw, kang henem thei nadingin koi pen tawh hing te ding ka hei? Na sietna tuipi za-in a gol ziehin koi in hing damsah zo ding ahei?

¹⁴Nang adingin na kamsangte in a man lo, zuou mangmunate mu zo uhi; na hamphatna na ngakia thei nadingin amate in na khielna hing pholah loin, a man lo le ang puikhiel thei thuphuonte nangma adingin mu zawsop uhi.

¹⁵Lampi dunga a peisunte in a khut uh a behsan hi; Jerusalem tanu ehneh ho-in a lu a peisan lel uhi; “Hoina bukim nei khuopi, leitung vannuoi’ kipahna khuopi kici tami amah?” a ci uhi.

¹⁶Na galte in nang langkhatah a kam uh kahin ang hawhsan uhi; amate in hing ehneh ho-in a ha a gawi vua, “Tam khuopi i susie ta ukhu! Kadei, i nganga uh tam ni a khula, a tawpna-ah i mu ta ukhu!” a ci uhi.

¹⁷TOPA in a lungtup bawl zo a, a galgihna sem zo ta hi; sawtveipi lai-a a gelsa bangin ama in khuotuo loin a susie hi; ama in na tungah na galpa a kipahsah a, na galpa’ thahatna a tawisang hi.

¹⁸Zion tanu’ kulpi aw, TOPA tungah nahpi-in[5] kiko in! Sun le zanin na hlituite luitui luongsuh bang taheh! Nang le nang tawlnga sinlen, na mit zong sing da in!

¹⁹Khuocingte a kipat ciengin tho inlen kizanko ven! TOPA mai-ah na lungsim tui bangin sungsuh in. Gawldung mong cintengah kielsi-in a basam na tate a hin thei nadingun ama lamah na khutte lamto in.

²⁰TOPA aw, en inlen ngaisun in! Koi tungah tam bangin na bawl ngel ahei? Nupite in a hinsa uh a tate’ sa a ne talawm ding uh amah? TOPA’ mun siengtho ah siempute le kamsangte a kithat ding amah?

²¹Khangdawngte le khanghamte gawldung leilahah si-in a lum den uhi; ka ngahnute ule ka tangvalte uh, namsau tawh a puamat sieng uhi; na lungthah ni-in amate na that a, hepina om loin na that sieng hi.

²²Pawi ni-in mi a kihlat bangin nang in ka kimvela om ka galte na hlan hi; TOPA’ lungthah ni-in koima suohta loin, a hing zong om lo hi; ka galpa in kakawi kapom lai le kava kata laite ei thapieh sieng zo hi.