Read Zou KAA LA 3 Bible Online

KAA LA 3 - Zou bible

KAA LA 3

¹Pasien’[6] lungthahna ciengpum nei-ah gentheina a thei pa ka hi hi;

²ama in ei delmangin khuovah a op lona khuomiel lahah ei peipi hi;

³sun tawntungin kei tung behah a khut a hlang den mielmuol hi.

⁴Ama in ka tel ka vo a vuoigawpsah a, ka gu ka tang a tawngsansah hi;

⁵ama in hin genthei le lunggimna tawh ei imtawmin ei tuomcip hi;

⁶sawtpi lai-a a sisa mite bangin khuomiel lahah ei tosah hi.

⁷Ka suotah thei lo nadingin kul tawh ei imtawm hi; ama in a gih siakhau tawh ei khi hi;

⁸panpina ngenin ka kiko vangin ka thumna ei khahtanpieh hi;

⁹ama in a kikhengsa suongtumte tawh ka lampi ei khahtan a, ka lampite a kawisah hi.

¹⁰Ama pen kei ei buhdap vompi le a kiphuol humpi tawh kibang hi;

¹¹ama in lam ei pielpi a, ei ehtelin ei nuasie hi;

¹²ama in a thalpi kuoi-in a thaltang tuh nading dawimunin ei nei hi.

¹³A thalbawm sunga thaltangte tawh ei kap a, ama in ka sin ka lungah tumsah hi;

¹⁴amate in sun tungtawnin ehnehna la ei awi awi vua, ka mipite’ nuizat ka hi ta hi.

¹⁵Ama in zatui kha ei dawnsah a, du lopi-in gamsai kha ei nesah hi.

¹⁶Ama in ka hate suongtang hlaisah a, vutvam ei buoh hi;

¹⁷Ka hla in lungmuonna nei lo a, lungdamna kici bang ahei ka mangngil ta hi;

¹⁸tuaci’n keima in, “Ka vang bei zo a, TOPA kung panin ka kinepna zosie tawp sieng zo hi,” ka ci hi.

¹⁹Ka gentheina le ka inn nei lonate ka lungngaina khu gamsai le tuikha ahi hi!

²⁰Keima in tuate ka sielsiel a, ka lungsim a genthei giap hi.

²¹Ahi vangin tam thu ka phawh a, tua ziehin kinepna ka nei hi:

²²TOPA’ itna thawn[7] ngai loin, ama’ hepinate tawp ngai lo hi;

²³tuate zingmawng sielin ang thasuo zing hi; nangma’ thumanna lien hi.

²⁴Ka hlagau in, “TOPA pen keima’ tanh ahi a, “Tua ahi ziehin ama sungah ka kinem ding hi,” a ci hi.

²⁵Ama a ngah mite ading le ama a sui hlagau adingin TOPA hoi hi.

²⁶TOPA’ hutdamna khu daitaha nga khinkhian ding hoi hi.

²⁷Mi khat in a khangno lai-in hahkol a puoh ding hoi hi.

²⁸TOPA in ama tungah hahkol a ngah ciengin ama guohin sip dide-a a to ding hoi hi.

²⁹Leivui lahah a kam koi leh hoi hi. (tua hile kinepna om kha thei lai ding hi),

³⁰a beng pa lamah a pheta daw-in, gensietna tawh a kidim ding hoi hi.

³¹Bang ding ahei cile TOPA in ei nuol den lo ding hi.

³²Ama in ei lungkhamsah nanle ama’ ei itna kip dung zui-in lainatna ei nei ding hi;

³³bangzieh ahei cile ama in koima gentheisah nuom loin, zong lungkhamsah nuom lo hi.

³⁴Gam sunga thongkie zosie keng tawh a kitotcil cieng,

³⁵Sangpen Pa’ masangah mihing’ hamphatna a kileheipieh cieng,

³⁶mi khat’ thu a manin a kikhen lo cieng, TOPA in mu lo ahi amah?

³⁷TOPA in a gelkhol sih leh koi thupieh tawh pieng ding ahei?

³⁸A sie a pha pen Sangpen Pa’ kam pana ang pusuoh hi lo amah?

³⁹A mawna dan uh a thuoh ciengun bang dingin phunphun ding uh ahei?

⁴⁰I gamtatnate kisittelin TOPA kungah kinuale va vui.

⁴¹Vantunga Pasien kungah i lungsimte ule i khutte uh lamto va vui.

⁴²Kote tawnkhielin kang ledo ta vua, nang in ka mawna uh nei maisah sih hi.

⁴³Nang le nang lungthahna tawh kituomin nei nuadel a, khuotuona nei loin nei that hi;

⁴⁴kote’ thungetna na kung ang tun thei lo nadingin nangma le nangma meiilum na kikhu hi.

⁴⁵Nang in mite lahah kote buathah le ninthem bangin nei bawl hi.

⁴⁶Ka galte zosie a kam kah vua, kei langpanna thu a gengen uhi;

⁴⁷kote tungah patauna le dumthuhpi ang tung a, a hawmkieu ding le a mangthai ding ka hi ta uhi.

⁴⁸Ka mite a kisiet ziehin ka hlitui guntui luong bang hi.

⁴⁹Ka hlitui kang thei lo ding a, mit sing man loin ka om ding hi.

⁵⁰TOPA in van pan ang etsuh a, a mu masangsie-in,

⁵¹ka khuopi ngahnu zosie ziehin ka mit in ei lungkhamsah hi.

⁵²Ka galte in thu om lopi-in va bangin keima ei vei uhi.

⁵³Leihawm sungah ka hingtangin ei paimang vua, suongtum tawh ei sincip uhi.

⁵⁴Tui in ka lu ei hlum a, “A mangthai hi tang,” ka ci hi.

⁵⁵TOPA aw, kuokhuh tawdop panin na min kang hlan hi;

⁵⁶“Panpi dinga ka tauna na bil na hu sinlen, ei lungnuomsah in,” ci-in kang ngetna nei za hi.

⁵⁷Kang hlat ciengin keima nei neh a, “Zau sin,” nei ci hi.

⁵⁸TOPA aw ka vai nei genpieh zo ta a, ka hinkhuo nei tankhie zo hi.

⁵⁹Aw TOPA, ka tunga na hoi kibawlte na mu zo ta hi, ka vai ei hawmpieh in.

⁶⁰Ka galte ei huotna le ei lebawlnate uh na mu zo ta hi.

⁶¹TOPA aw, amau’ ei tawhnate le ei lebawlnate na za zo ta hi.

⁶²Sun tungtawnin kei ei langpangte in kei do nading kihodap-in ei gensiesie uhi.

⁶³A to ule a din uh en vawi, ehnehna la ei sahlu uhi.

⁶⁴TOPA aw, a gamtatna bang ule amau’ khuta a sepna utawh kituohin amate thuhkia in!

⁶⁵Amate lungkhamna lungtang pie inlen, amate tungah na samsietna tusah in!

⁶⁶Na thangpaina ziehin TOPA’ vante nei panin amate delmang inlen, thatgam sieng in.