Read Zou KAA LA 4 Bible Online

KAA LA 4 - Zou bible

KAA LA 4

¹Bang dingin kham muol dawh ta a, bang dingin kham citah a mel kilamdang ta adiei! Gawldung lamsuom tengah mun siengtho suongte kithezah sieng zo hi.

²Kham hoipen banga a manpha, Zion’ tapate khu bang dinga belkhengte khuta kikheng leibeelte tawh kibang dawh ta adiei!

³Si-alte nangawn in zong a note nawi pie-in a tawpsah buong sam vua, hinanle zong ka mite pen a note tunga a gilo, gamlahah a om kalaoh vate tawh kibang uhi.

⁴A dangta ziehin a dangtawngah nausen’ lei a beh hi; naupangte in neh ding an a ngen vua, hinanle koima in bangma pie lo hi.

⁵An tuipen a ne ngaite zong lampi tengah a kielsi sieng vua, a nuomsa-a khangkhiete zong leivui lahah a lum ta uhi.

⁶Azieh pen Sodom danthuohna[8] sangin ka mite kigawtna[9] nasie zaw a, tua[10] tungah khut kinga kha loin mitphet kala kisusie ahi hi.

⁷A milien milalte uh vua sangin sieng zaw a, bawngnawi sangin kangzaw uhi; suongsan mantam sangin amau’ pumpi sanzaw a, amau’ samte[11] zong sapphire[12] suongte tawh kibang hi.

⁸Amau’ mai innking sangin vomzaw a, tu-in gawldung lahah amate a kithei kha sih hi. A gute uh tungah a vunte uh behcip a, singkung gawta tawh a kibang uhi.

⁹Lo sungah galete a pien lo ziehin neh ding nei loin gawngtamin a kielsi mite sangin, namsau-a a si mite hamphazaw hi.

¹⁰Ka mite kisuhsiet hun sungin mi lainat thei nupite’ khut in a tate’ sa huonin an-in a ne uhi.

¹¹TOPA in a lungthahna husuo zosie a hlakhie zo ta hi; ama in a lunghanna buosuhin Zion ah mei taw a, a khuombulte katum hi.

¹²Leitung kumpite le leitung mi zosie in Jerusalem tunkotte ah gal le sa a lut zo dingin a um sih uhi.

¹³Jerusalem khuo lai-ah mi thumante’ sisan a luongsah kamsangte’ mawna le siempute’ khielna zieha tam thu ang pieng ahi hi.

¹⁴Mittaw bangin amate gawldung lahah a vahvai vua, a puonte uh koima’ tham ngam lo dingin sisan a bang netnut hi.

¹⁵“Pei dawh ta un! Mi sieng lote aw!” “Pei dawh ta un! Pei dawh ta un! Ei tham kha sih un!” ci-in mite a kiko uhi. Tuaci’n amate mi galtai le mi vahvaite a suoh ta uhi. Minamte lahah mite in, “Amate tanah om thei sih va uh,” ci san lel uhi.

¹⁶TOPA in amate thezah zo a, amate a awlmaw nawn sih ding hi; siempute tungah zatahna a kilah ta sih a, makaite tungah zong deisahna a om ta sih hi.

¹⁷Panpi ngenin i khuo dahdah vua, matlap om loin i mit uh a kham bep lel hi; ei hundam zo ngap lo ding minam khat tungah lawptahin eite in i ngahngah uhi.

¹⁸I khuolai vuah i va thei lo nadingin amate in ei sulzui uhi; i si nading uh ang nai ta a, i nite uh ang cing ta hi; Bangzieh ahei cile i si hun uh ang tung ta hi.

¹⁹Eihaw ei delte ahi ule van lai-a leng mukel sangin a gangzaw uhi; amate in muol tungah ei del vua, gamlahah zong ei buhdap uhi.

²⁰“Minamte lahah ama’ hlim belin i nungta ding uhi,” ci-in ka gen uh, ka nasuh ka natona uh ahi, TOPA sathau nusa mipa, amate in a dum sung vuah ei matpieh ta uhi.

²¹Uz gama teng Edom’ tanu aw, lungdamin kipah in; ahi vangin nang tungah zong tua hai ang tung ding hi; tua hai khamin na puon hawh dawhin na guohtangin na om ding hi.

²²Zion’ tanu aw, na mawna zieha dan ang kipiehna manzo ta a, ama in nang saltang dingin ang kaisah nawn sih ding hi; hinanle Edom’ tanu aw, ama in na mawna dan hing pie-in, na khielna zosie ang pholah ding hi.