Read Zou EZEKIEL 10 Bible Online

EZEKIEL 10 - Zou bible

EZEKIEL 10

¹Tua ciengin ka en leh, cherub-te lu tungson a kuoh kimkiam tungah sapphire[21] tawh a kibawl kumpi topha bang pien khat ang kilang hi.

²Ama in puonkang silpa kungah, “Cherub-te nei-a a om lengkang kipeite kawmah lut in; cherub-te lahah mei-am na khutdim ham inlen khuopi tungah thezah in,” a ci hi. Keima in ka en leh a sungah ama a lut hi.

³Tu-in mipa ang lut ciengin cherub-te biehinn leitaw lam pangah na ding uhi; tuale meiilum khat in biehinn tuol sungnung teng ang khu hi.

⁴Tua ciengin cherub tung panin TOPA’ minthanna vang ang kato-in biehinn sangkil ah ang om hi. Biehinnpi meiilum tawh kidimin a tuol teng TOPA’ minthanna vang in a tanvah hi.

⁵Vanglienpa[22] a ham ciengin a awging bangin biehinn inntuol pulam dongah Cherub-te’ hlazap ging kiza hi.

⁶Ama in puonkang silpa kungah, “Cherub-te lahah a om lengkang kipeite lah panin mei la in,” ci-in a sawl ciengin ama lutin lengkang gei khatah a ding hi.

⁷Tuale cherub khat in cherub-te lah panin cherub-te lahah a om mei-am lamah a khut zahin mei-am pawlkhat la a, puonkang silpa’ khut sungah tua mei-am a koi hi. Tua pa in zong mei la-in a pei hi.

⁸Tua cherub-te in a hla nei vuah mihing khut tawh a kibang a nei ciet uhi.

⁹Keima in ka en leh, cherub-te gei-ah lengkang li om a, cherub khat’ pangah lengkang khat ciet om hi; tuale lengkangte beryl suong bangin a tee dimdiem hi.

¹⁰Tuate’ melpuoh dan ahile a li-un a kibang ciet vua, lengkang khat sunga lengkang dang khat a om a bang uhi.

¹¹Amate a pei cieng ule kihei tawm loin amau’ ngatna lite khat popo ah a pei thei uhi; a pei masa pen kingatna lam lamah a zui vua, a kihei vateh sih uhi.

¹²Tua lengkang lite in-a vielkuolte le a kamnate, a hlate le a lengkangte ah- amau’ pumpi zosie teng dimin mit a nei uhi.

¹³A lengkangte pen ka zahna-ah “lengkang kipeite” kici hi.

¹⁴Amate in maitang li ciet nei uhi: a masa pen cherub maitang, a nina mihing maitang, a thumna humpi maitang, le a lina muvanlai maitang ahi hi.

¹⁵Cherub-te ang kato uhi. Tamte pen Chebar gun gei-a ka mu ganhing lite ma ahi hi.

¹⁶Cherub-te a kin ciengun a lengkangte zong amate tawh a kinton hi; tuale cherub-te in lei panin a lengto dinga a hla uh a zah ciengin amate lampang pana a om lengkangte a piel sih hi.

¹⁷A khawl uh ciengin adangte zong khawl a, a kato uh ciengin a dangte zong amate tawh kato hi; azieh pen amate sungah ganhingte’ hlagau a om hi.

¹⁸Tua ciengin biehinn sangkil panin TOPA ang pusuohin cherub-te tungson ah ang khawl hi.

¹⁹Cherub-te in ka muna-ah a hla uh ang zahto vua, lei panin a kung vua om lengkangte tawh a kato uhi. TOPA’ biehinn lutna nisuona lam tunkot ah amate a khawl uhi; tuale amate tungah Israel Pasien’ minthanna vang a om hi.

²⁰Tam teng pen keima in Chebar gun gei-a Israel Pasien nei sontahah ka na musa ganhingte ahi uhi; amate pen cherub-te ahi lam zong ka thei hi.

²¹Amate in maitang li ciet, hla li ciet le a hla nei vuah mihing khut bang a nei ciet uhi.

²²Amau’ maitang pen Chebar gun gei-a ka musa maitangte ma bang a, a pei ciengun a mailam ciet ma-ah tangtahin a pei uhi.