Read Zou EZEKIEL 11 Bible Online

EZEKIEL 11 - Zou bible

EZEKIEL 11

¹Hlagau in keima ei domto a, nisuona lam a kinga TOPA’ biehinn nisuona lam tunkot ah ei peipi hi. Khum mun tunkot lutna ah mihing sawmni le nga a om hi; khumte lahah mipi makai Azzur’ tapa Jaazaniah, Benaiah’ tapa Petlatiah-te na om uhi.

²Ama in ka kungah, “Mihing aw, tam pasal teng pen khuopi sunga sietna a bawlsawmte le thu gilo a mopte ahi uhi;

³amate in, ‘Inn lam nading hun nai lo hi; tam khuopi pen beel ahi a, eite pen sa i hi uhi,’ a ci uhi.

⁴Tua ahi ziehin amate langkhatah thu va gen ta’n; mihing aw, thu va gen ta’n,” ei ci hi.

⁵Tua ciengin ka tungah TOPA’ hlagau ang tu a, ama in keima kungah, “TOPA in tam bangin gen hi, ci-in gen in: Israel innkuonte aw, na ngaisutna uh tami ahi hi; na lungsim sung vua na ngaisutnate uh ka thei hi.

⁶Tami khuopi sungah mi tampi na that zo ta vua, na mithasate utawh a lampi teng na dimsah uhi.

⁷Tua ahi ziehin TOPA in tam bangin gen hi: khuopi sunga na thasa uh misite pen sa ahi vua, tami khuopi pen a huonna beel ahi hi; ahi vangin tua khuopi sung panin note ang kiladawh ding hi.

⁸Note pen namsau giingte na hi uhi; na tung vuah namsau kang tusah ding hi, TOPA Pasien in ci hi.

⁹Keima in tua sung panin note hing ladawhin gamdang mite’ khut sungah kang pie ding a, note tungah thu kang khen ding hi.

¹⁰Namsau tawh na si ding uhi; keima in Israel gamgi-ah thu kang khen ding hi. Tuale note in keima TOPA ka hi lam nei thei ding uhi.

¹¹Tami khuopi pen na beel uh hi loin no zong a sunga sa na hi sih ding uhi; keima in Israel gamgi-ah note thu kang khen ding hi.

¹²Tua ciengin ama’ thukhamte le a ngaina kipte zui loin, na kimvel vua minamte’ ngaina dan banga a gamta note in keima TOPA ka hi lam nei thei ding uhi,” ei ci hi.

¹³Tua bangin thuphuon ka gen laitahin Benaiah’ tapa Pelatiah a si hi. Tua ciengin khupbawhin ka kap vapo a, “Kadei TOPA! Israel a omlai teng a that sieng ding na hi ta amah?” ka ci hi.

¹⁴Tua ciengin TOPA’ thu keima kungah ang tung hi:

¹⁵Mihing aw, Jerusalem-a teng mite in na tanaute, na sanggamte, na saltanpite,[23] Israel innkuon buppi’ thu a gen vua, “TOPA kung panin amate a gamla pei zo ta uhi; eite’ luo dingin tami gam ei kipie zo hi,” ci-a a na gente khu a unpi-un tam mite ahi uhi.

¹⁶Tua ahi ziehin, “TOPA in tam bangin ci hi: minamte lahah amate gamlapi-ah hemdawhin, gam tuomtuomte lahah amate ka thezah vangin, gam tuomtuom a tunna mun zosie vuah bakhat sung[24] amau’ mun siengtho-in ka om hi.

¹⁷Tua ahi ziehin gen in: TOPA in tam bangin gen in, a ci hi: mite sung panin note kang khawmtuo ding a, na kithezahna uh gam tuomtuomte panin hing sutuo-in Israel gam kang pie ding hi.

¹⁸Khumnah amate a tun ciengun, a kidahhuoi na zosie le a mudahuoi na zosie a paikhie ding uhi.

¹⁹Keima in amate lungtang khat[25] pie-in, amate sungah hlagau tha khat ka guong ding hi; keima in a satah panun suong lungtang lahpiehin satah lungtang ka guon ding a,

²⁰tuaci’n amate in ka thukhamte a zui ding vua, ka ngaina kipte kemcingin a mang ding uhi. Tua ciengin amate keima’ mi hi ding a, kei amau’ Pasien ka hi ding hi.

²¹Ahi vangin amau’ lungtang in amau’ sil kidahhuoite le amau’ sil mudahuoite[26] a lunggul vua ahile, keima in amau’ lu tungah a gamtatnate uh ka tusah ding hi, TOPA Pasien in ci hi.

²²Tua ciengin cherub-te in a kung vua om lengkangte tawh a hla a zahto vua, a tung vuah Israel Pasien’ minthanna vang a om hi.

²³Tuale khuopi laikim panin TOPA’ minthanna vang kato a, khuopi nisuona lam muol tungah a khawl hi.

²⁴Hlagau in Pasien’ mangmunate sungah keima ei domto-in Chaldea gam saltangte kungah ei peipi hi. Tua ciengin ka mangmuna in keima ei nuasie ta hi.

²⁵Tuale TOPA in ei musah zosie saltangte kungah ka gen hi.