Read Zou EZEKIEL 12 Bible Online

EZEKIEL 12 - Zou bible

EZEKIEL 12

¹TOPA’ thu ka kungah ang tung hi:

²Mihing aw, mu nading mit nei napi khuo a mu lo, nang pen zah nading bil nei napi khuo a za lo, a ledo innkuon lahah a teng na hi hi;

³bangzieh ahei cile amate pen a ledo innkuon ahi uhi. Tua ahi ziehin, mihing aw, galtai dingin puonlom ziel inlen suntangpi-in amate muna-ah galtai dingin pei in; na opna mun panin mundang khatah galtai ding bangin amau’ muna-ah na pei ding hi. A ledo innkuon ahi vangun a thu thei kha sam ding uhi.

⁴Galtai dingte bangin sunlai-in amate muna-ah na puonlom na puo ding hi; galtai dingte bangin nitahin zong amate muna-ah na puo ding hi.

⁵Amate muna-ah kul tovang inlen khum panin na puonlomte puo in.

⁶Amate mitmu-in tua puonlomte na liengko-ah na khang ding a, miel lahah na puo ding hi; leitang na mu lo nadingin na maitang na tuom ding hi; azieh pen Israel innkuonte adingin lim khatin nang kang bawlzo hi.

⁷Kei zong thu ei kipieh bangin ka bawl hi. Galtai dingte bangin sun lai-in ka puonlom guongin nitahin ka khut tawh kul ka tovang hi; khuomiel ciengin ka vante ka la a, a mitmu-un tuate ka liengko-ah ka puo hi.

⁸Zingmawng ciengin TOPA’ thu ka kungah ang tung hi:

⁹Mihing aw, a ledo innkuon ahi Israel innkuon in na kungah, “Bang bawl na hei,” ang ci sih uh amah?

¹⁰Amate kungah, “TOPA Pasien in tam bangin a gen hi: Tami thuphuon pen Jerusalem khuo-a ulienpa le tua sunga om Israel innkuon vannuoi tawh kisai ahi hi,” ci in.

¹¹“Note adingin kei lim khat ka hi hi: keima in ka bawlsa bangin amate tungah kibawl ding hi; amate galtai le saltangin a pei ding uhi,” ci in.

¹²Tuale amate lahah ulienpa khat, miel lahah a puonlom a liengko tungah khangin a peikhie ding hi; ama[27] in kul tovangin khum panin a puo ding hi; ama in a mit tawh leitang a mu lo nadingin a mai tuom ding hi.

¹³Ama tungah ka ngenthang ka zah ding a, ka thangah ama a awh ding hi; tuale Chaldea gam Babylon ah ama ka zawpi ding a, hinanle tua khuopi a mu sih ding hi; tuale ama tua munah a si ding hi.

¹⁴Keima in ama panpi dinga ama’ kimvela om zosie, a galkap zosie, muncin tengah ka thezah ding hi; tuale keima in namsau dawsa-in amate ka nuadel ding hi.

¹⁵Tuale minamte lahah amate thethangin gam tuomtuom ah ka thezah ciengin amate in keima TOPA ka hi lam ei thei ding uhi.

¹⁶Ahi vangin minamte lahah a pei peina vuah a mudahuoi a gamtatna zosie uh a gen thei nadingun namsau, kielpi le natpi panin amate tawmno khat ka suohtasah ding hi; tua ciengin amate in keima TOPA ka hi lam ei thei ding uhi.

¹⁷TOPA’ thu ka kungah ang tung hi:

¹⁸Mihing aw, a citun pumin na an ne inlen, zauna le linna tawh na tui dawn in;

¹⁹tuale gam sung mite kungah thu gen inlen, Israel gam sunga om Jerusalem-a tengte tawh kisai-in TOPA in tam bangin gen hi: Amate in zauna tawh an a ne ding vua, lungkham kawmin tui a dawn ding uhi, bangzieh ahei cile khum sunga tengte zosie’ tatsietna ziehin a gam sunga om mi zosie kitomgam ding hi.

²⁰Mi tenna khuopite hawmsuohin a gam uh gamkhing a suoh ding hi; tuale amate in kei pen TOPA ka hi lam ei thei ta ding uhi.

²¹TOPA’ thu ka tungah ang tung hi:

²²Mihing aw, “Hun le nite kisawtsah-sah, mangmuna zosie lah bangma hi sih,” ci-a Israel gam sunga na zah uh paunah pen bang hi mawh ahei?

²³Tua ahi ziehin amate kungah, “TOPA in tam bangin gen hi: Tam paunah ka tawpsah ta ding a, amate in Israel gam sungah paunahin a zang nawn sih ding uhi,” ci-in gen in. Ahi vangin amate kungah, “Hun le nite ang nai ta a, mangmuna zosie a tangtun nading zong ang nai ta hi.

²⁴Azieh pen Israel innkuon sungah mangmuna zuou ahi sihle aisanna zuou om nawn lo ding hi.

²⁵Ahi vangin keima TOPA in ka thugen ding ka gen ding a, kiheh nawn loin ang tangtung ding hi; ahi vangin no a ledo innkuonte aw, keima in ka thugente na hin sungun kang tangtungsah ding hi, TOPA in ci hi.

²⁶TOPA’ thu ka tungah ang tung hi:

²⁷Mihing aw, Israel innkuonte in, “A mangmuna uh mailam kum tampi ading hi a, a thu genkholte uzong hun sawtpi ading ahi hi,” ci uhi.

²⁸Tua ahi ziehin amate kungah, “TOPA in tam bangin gen hi: Ka thugen khat zong a kihehsah nawn sih ding a, ka thugente a tangtung ding hi, TOPA Pasien in ei ci hi.