Read Zou EZEKIEL 14 Bible Online

EZEKIEL 14 - Zou bible

EZEKIEL 14

¹Keima kungah Israel upa pawlkhat ang pei-in ka mai-ah ang to uhi.

²Tuale TOPA’ thu ka kungah ang tung hi:

³Mihing aw, tam mite in a lungsim sung vuah a milimte a bie ta vua, a kipal nadingun a masang vuah amau’ khielna a koi uhi; amate thu ka kimopsah talawm ding amah?

⁴Tua ahi ziehin nang in amate hopi inlen, TOPA Pasien in tam bangin gen hi, ci-in amate kungah gen in: A lungsim vuah milimte bie-in a mai vuah a kipalpua nadingun amau’ khielna a koi vua, ahi vangin a milim honpite utawh kamsangpa kunga ang pei Israel innkuonte lahah a koimapo keima TOPA in ka dawng ding a,

⁵a milimte uh ziehin kei tawh a kigamla Israel innkuonte’ lungsim a unpi-in ka mat zawh nadingin ka bawl ding hi.

⁶Tua ahi ziehin TOPA Pasien in tam bangin gen hi, ci-in Israel innkuonte tungah gen in: Kisia unlen, na milimte ule na sil kidahhuoi zosie uh hing nua ngat unlen hing kihei un.

⁷Bangzieh ahei cile Israel-te ahi sihle Israel-te lahah a teng pemta khatpo kei tawh a kikhenkhiet nop a, a lungtang ah a milimte bie-in a mai-ah kipal nading gitlona a koi a, tuaci’n kei thu dong dinga kamsangpa kunga a pei leh, TOPA ahi kei mama in amate ka dawng ding hi.

⁸Amate ka lang-et ding a, lim le thu gentena-in bawlin ka mite lah panin amate ka hemkhie ding hi; tuale keima TOPA ka hi lam note in nei thei ding uhi.

⁹Kamsang khat kisolin zuouthu kamteng khat a gen leh keima TOPA in tua kamsangpa ka na solsa ahi a, keima in ama langkhatah ka khut zahin ka mi Israel-te lah panin ama ka susie ding hi.

¹⁰Tuale amate tunga dan kipiehna amate ma in a thuoh ding vua, thudong pa’ dan thuohna le kamsangpa’ dan thuohna kibang ding hi.

¹¹Tuaci’n ka kung panin Israel innkuonte a vahmang nawn sih ding vua, a khielna vannuoi utawh amau le amau a kibuasah nawn sih ding uhi. Tua ciengin amate keima’ mi ahi ding vua, keima amau’ Pasien ka hi ding hi, TOPA Pasien in ci hi.

¹²TOPA’ thu ka kungah ang tung hi:

¹³Mihing aw, gam khat in keima langkhatah thuman lo tahin ka tungah mawna ang bawl ciengin keima in ama langkhatah ka khut ka zah a, tuale a an pienna uh sutanin a tung vuah kielpi tungsahin tua gam panin mihing le ganhing ka thatgam a,

¹⁴amate sungah Noah, Daniel,[31] le Jacob tam mihing thumte nangawn om nan uleh amau’ dihna tawh amau’ hinna beh a hu zo ding uhi, TOPA Pasien in ci hi.

¹⁵Gamkhing a suo nadingin gamsung tengah a susie ding gamsate hla leng, gamsate ziehin tua gam nawhin koima a pei sih ding hi;

¹⁶keima a nungta ka hi ma bangin, tam mihing thumte nangawn tua gamah a om bang uh hileh zong, amate in a tanute ule a tapate uh a hundam zo tuon sih ding uhi; amate beh a kihundam zo ding vua, ahi vangin khum gam pen koima ten lona gamkhing suoh veve ding hi, ci-in a hing zing TOPA Pasien ka kiciem hi.

¹⁷Ahi sihle keima in tua gam sungah namsau sawlin, “Gam sung tengah namsau pei kawikawi heh,” ci-in tua gam sung panin mihingte le ganhingte ka suhmang leh;

¹⁸keima a nungta ka hi ma bangin tam mihing thumte tua gam sungah om zong nan uleh amate in a tanute le a tapate uh a hun zo tuom sih ding vua, hizongle amate beh ma a kihundam zo ding uhi, TOPA Pasien in ci hi.

¹⁹Ahi sihle tua gam sungah pul natna tungsahin ka thangpai ziehin amate tungah sisan luongsahin, tua gam sung panin mihing le ganhingte sumaimangin,

²⁰keima a nungta ka hi ma bangin Noah, Daniel[32] le Job-te a sungah a om uh hinan lezong, a tanute le a tapate uh a hundam zo tuom sih ding vua, amau’ dihna tawh amau’ hinna beh ma a hundam zo beh ding uhi, ci-in a hing zing TOPA Pasien ka kiciem hi.

²¹Tua ahi ziehin TOPA Pasien in tam bangin gen hi: Keima in mihing te le ganhingte a sumaimang dingin Jerusalem tungah a zauhuoi thukhen nasepna nam lite ahi namsau, kielpi, gamsate, le pulnatna ka tunsah ciengin tua sangin hamsa zaw lai ding hi!

²²Hizongle tanute le tapate peipi dingin a suohta pawlkhat tua khuo sungah kinuasie ding hi; na kung vuah amate ang pei ding uhi. Amau’ gamtat luheh na mu ciengin Jerusalem tunga a sie ka tunsah zosie ziehin na lung a dam mai ding hi.

²³Amau’ gamtat luheh na mu ciengin amate in nang ang henem ding uhi; tuale nangma in khuopi sunga ka sil bawl zosie a mawhna ka bawl ahi lo lam na thei ding hi, TOPA Pasien in ei ci hi.