Read Zou EZEKIEL 16 Bible Online

EZEKIEL 16 - Zou bible

EZEKIEL 16

²Mihing aw, Jerusalem tungah a mudahuoi a gamtatna teng theisah inlen,

³tuale TOPA Pasien in Jerusalem tungah tam bangin gen hi, ci-in: Na kipatna le na pienna Canaan-te’ gam ahi hi; na pa Amor-te ahi a, na nu Hit-te ahi hi.

⁴Na piendan ahile na suo ni-in na laigui ki-attan loin tui tawh ang kisil sieng sih a, ci tawh zong ang kizut loin puon tawh zong ang kitun sih hi.

⁵Koima’ mit in ang khuotuo sih a, lainatna tam teng ang bawlpieh ding koima a om sih hi; ahi vangin gamlaha ang kipaithang hi, azieh pen na suo ni panin mite in ang nang ang kidah hi.

⁶Na kungah kang suoh kha a, sisan naisan lahah na kipehpeh kang mu hi. Sisan naisan lahah na kipawi kang mu ziehin na kungah, “Hing in!

⁷Lozau-a sing bangin khang in[33],” kang ci leh nangma nang khanglien a, na tun ang sangin ngahnu picing[34] khat nang hi ta hi; na nawite ang baw a, na mul zong ang po ta hi; hinanle puon sil loin na guoh tangin na om hi.

⁸Na kungah hing suohkia-in nang ma kang en hi; zawl dei-in lawm ngai na cing ta hi. Keima in ka puon mong zahin na zumsel teng kang khupieh hi. Keima in nangma kang kamciem a, nangma tawh thuciemna khat bawlin, tuale nang pen keima-a’ na hi ta hi, TOPA Pasien in ci hi.

⁹Tua ciengin kang pumsil a, na tunga a baang site sawp siengin sathau kang nu hi.

¹⁰A kiphan puon hoite kang silsah a, savun hoi tawh a kibawl kedap kang bunsah hi; pat puon hoite tawh kang khu a, puon kigan hoite[35] tawh kang tuom hi.

¹¹Keima in kizepna manphate tawh nang kang zem hi: na banah tau hing bunsah a, na ngawngah khi kang awsah hi,

¹²na nahkuo-ah nahba kang vawpieh a, na bil ah bilbate hing basahin na lu ah a etlawm kumpi lukhu kang khusah hi.

¹³Ngun le kham tawh ang kizem a, na puonsilte pat puon hoite, puon kigan hoite[36] le puon kiphan hoite vive ahi hi. Na neh ding zong annel tuipen, khuoizu le sathau ahi hi. Na mel ang hoi mama a, kumpinu dingin zong nang kilawm ta hi.

¹⁴Na mel hoina ziehin minam cinteng lahah na minthanna a kizel hi, azieh pen nangma tunga kang pieh keima’ thupina in na mel hoina a bukimsah hi, TOPA Pasien in ci hi.

¹⁵Ahi vangin nang in na mel hoina na muong a, na minthanna ziehin numei pahtat bangin na om ta hi. Na kunga ang vahle khat popo[37] tawh kiphaltahin na lumton hi.

¹⁶Na puon pawlkhat na ladawh a, nangma adingin a hoi mama biehbuhnote bawlin tuate tungah khatvei zong a pieng ngai nai lo mai lamah zong a pieng ngai nawn lo ding ahi[38] pahtatna na gamta hi.

¹⁷Nangma kang piehsa ka ngun le ka kham tawh a kibawl kizepnate la-in, nangma adingin pasal limin na bawl a, tuate tawh na lumton hi;

¹⁸tuate khu nadingin a kiphan na puonte na la a, a mai vuah ka sathau le ka gimnamtuite na koi hi.

¹⁹Na an dinga kang pieh- annel tuipen, sathau le khuoizute zong - tuate mai-ah gimnamtui biehna-in na lui hi; tua bang dan teng ahi hi, TOPA Pasien in ci hi.

²⁰Keima tawh na hinsa na tanute le na tapate na ladawh a, tua milimte nehtum dingin kithoina-in tuate na nei hi. Na pahtatnate kicing sa nai lo bangin na om hi!

²¹Ka tate na that a, amate tungah biehna dingin na pie hi.

²²Tuale a mudahuoi na gamtatna zosie le na pahtatnate ziehin, na neu lai-a na sisan lahah na kipawina le puon sil loin na guohtanga na op lai na phawh kha nawn sih hi.

²³Na gitlona zosie teng zaw ciengin (gimna, gimna na thuoh ding hi! TOPA Pasien in ci a,)

²⁴nangma adingin dawsang khat na lam a, mun-awng cintengah nangma adingin bosang khat na bawl hi;

²⁵lamkabawm cintengah munsang lamin na mel hoina pahtatna-in na nei a, mi vahle zosie tungah na pumpi pie-in na pahtatna na khangsah semsem hi.

²⁶A huasan na innveng Egypt-te tawh na pahtat a, na pahtatna na khansah semsem ziehin kei nei lungthahsah hi.

²⁷Tua ahi ziehin nangma langkhatah ka khut zahin na an satanh ka khiem ding a, na thanghuoi gamtatna ang zumpi Philistia-te’ tanute ahi na galte’ dei bang bangin kang piedawh ta hi.

²⁸Na lungkim zo nai lo ziehin Assyria-te tawh zong na pahtat hi; amate tawh na pahtat a, na lungkim nai tuom sih hi.

²⁹Sumbawl Chaldea-te tawh tamveipi na pahtat a, tuate nangawn tawh zong na lungkim nai vaset sih hi.

³⁰Zum zie thei lo-a na pahtatnate ziehin tam teng zosiepi na bawl khu na lungsim gina maw sam e izaw, TOPA Pasien in ci hi;

³¹lamkabawm cintengah na dawsang na lam a, mun-awng cintengah na bosang ding na bawl hi! Hinanle numei pahtat tawh na kibang sih hi, azieh pen nang in pahtat man sum na sang sih hi.

³²A pasal tanga khuolmite lamdawn numei angkawm nu!

³³Numei pahtatte zosie tungah letsongte kipie hi; hinanle na kingaipi mi zosie tungah na letsongte na pie a, na luppi dingin mun cinteng panin amate ang pei nadingun guhgol na pie zawsop hi.

³⁴Tuaci’n na pahtat dante numei dangte tawh na kibang sih hi: Koima in a pahtat dingin ang zawl sih a, sum tawh zong ang kiguoi loin nangma in sum na lepieh hi; nang pen mi tuompi khat na hi hi.

³⁵Tua ahi ziehin mi pahtat nu aw, TOPA’ thugen ngai in:

³⁶TOPA Pasien in tam bangin gen hi: Na huasan seng ziehin na kingaipite tawh lumtonin guohtanga na opna puon na khu lo zieh le, a mudahuoi na milim zosie le amate tunga na pieh na tate’ sisan ziehin,

³⁷keima in na kingai-a na nopsahpi zosie, na itte le na mudate zosie a unpi-in ka kaikhawm ding hi; nangma ang do dingin na kimvel panin amate kaikhawmin, a mai vuah na puonte kang suopieh ding a, tuaci’n na guohtanga na opna amate in ang mu ding uhi.

³⁸Keima in numei angkawmte le tuol thatte bangin thu kang khen ding a, nangma tungah thangpaina le thangsietna sisan ka tungsah ding hi.

³⁹Amau’ khut sungah kang pie ding a, amate in dawsang phelkhe-in na bosangte a susie ding uhi; amate in na puonsil hing sutpiehin na van hoite ang lahpieh ding vua, puon sil loin na guohtangin ang nuasie ding uhi.

⁴⁰Amate in note do dingin mi honpi hing zawpi-in suong tawh ang sep ding vua, namsau tawh ang semnen ding uhi.

⁴¹Na innte mei tawh halin numei tampi’ mitmu-in na tungah thu a khen ding uhi; keima in na pahtatna kang tawpsah ding a, sum tawh mi na guoi nawn sih ding hi.

⁴²Tuaci’n keima in na tungah ka sinsona ka damsah ding a, ka thangsietna na kung panin a kihei ding hi; ham loin ka om ta ding a, ka lungthah nawn sih ding hi.

⁴³Na neu lai hunte na phaw nawn lo ziehin tam bang zosie teng tawh kei nei lungthahsah hi; tua ahi ziehin na gamtatna teng kang lukhuhsahkia hi, TOPA Pasien in ci hi. A mudahuoi na gamtatnate banah a thanghuoi-in gamta hi lo na mah?

⁴⁴En in, paunah zang mi zosie in nang tungtang ah “A tanu in a nu sun,” ci paunah a zang ding uhi.

⁴⁵A pasal le a tate a muda nu’ tanu na hi a, a pasalte ule a tate a muda sanggam numeite’ sanggam nu na hi hi; na nu Hit-te ahi a, na pa Amor-te ahi hi.

⁴⁶Na unu pen Samaria ahi a, na opna leilu lamah a tanute tawh a teng hi; tuale na naunu pen Sodom ahi a, na opna leitaw lamah a tanute tawh a teng hi.

⁴⁷Amau’ opdan bang beh na zui sih a, amau’ gamtat mudahuoite bangin na gamta hi; bakhat sungin na opdan zosie vuah amate sangin na gamtat siezaw hi.

⁴⁸Nang le na tanute bawl bangin na sanggam nu Sodom le a tanute in a bawl sih uhi, keima a nungta ka hi ma bangin, TOPA Pasien in ci hi.

⁴⁹Na sanggam nu Sodom’ khielna tami ahi hi: Ama le a tanute a kiphasah vua, amate in an khamval nei-in nuomsa tahin a om uhi, ahi vangin mizawng le mi cimawte a panpi sih uhi.

⁵⁰Amate a kihisah mama vua, ka mai-ah a mudahuoi nate a bawl uhi; tua ahi ziehin amate ka mu ciengin ka hemkhie hi.

⁵¹Samaria in nang mawna alang zong a bawl sih hi; nang in amate sangin sil mudahuoite na bawlzaw a, tua na sil mudahuoi bawl teng zosie in na sanggam numeite midih danin kimusah hi.

⁵²Nang in zong na sanggam numeite a dih bangsah na hi ziehin mindaina kithuoh ta’n; amate sangin a mudahuoi zaw-in na gamtat ziehin nang sangin amate a dih tazaw uhi. Tuaci’n nang zong maizum inlen, na mindaina kipuoh in, azieh pen nangma in na sanggam numeite a dih danin na kimusah hi.

⁵³Zakona na thuohzawh nading le na sepsa zosie tungah maizumin amate adingin henepna na hi nadingin keima in Sodom le a tanute, Samaria le a tanute vangphatna ka piekia ding a, amau-a’ bangin nang zong vangphatna kang piekia ding hi.

⁵⁴

⁵⁵Na sanggam numeite, Sodom le a tanute ahi ule a op ngai bangun a omkia ding vua, nangma le na tanute zong na op ngai bangun na omkia ding uhi.

⁵⁶Na gitlona ang kipholah masang, na kiphatsah hun lai-in na sanggam nu Sodom na kam tawh thusie gentena-in nei hi lo na mah? Tu-in nang pen Aram’[39] tanute le a innveng zosie ule Philistia-te’ tanute, le na kimvela a om ang muda mi zosie’ simmaw ehnehin na om ta hi.

⁵⁷

⁵⁸Na thangtatna le na mudahuoi gamtatna teng ziehin gawtna na thuoh kul hi, TOPA in ci hi.

⁵⁹Ahi hi, TOPA Pasien in tam bangin gen hi: Kiciemna thuse loin thuciemna palsat zo na hi ziehin na gamtat bangin na tungah ka gamta ding hi;

⁶⁰hinanle na neu lai-a nang tawh i thuciemna ka ciemte ding a, nang tawh kumtawn adingin thuciemna ka bawl ding hi.

⁶¹Tua ciengin na gamtat dante nang phawhkia ding a, nangma tawh ka bawl keima’[40] thuciem zieh hi loin, keima[41] in na sanggam numeite, na unu le na nau nu a nipi-in ladawhin na tanute ahi dingin na kungah kang pieh hun ciengin na mai a zum ding hi.

⁶²Nangma tawh thuciemna ka bawl ding a, nangma in keima TOPA ka hi lam nei thei ding hi.

⁶³Na sil bawl zosie kang ngaidam ciengin na gamtatnasate na phawh ding a, ci nading mel thei loin omin na mai a zum sengin na kam na kehkia ngai nawn sih ding hi, TOPA Pasien in ci hi.