Read Zou EZEKIEL 18 Bible Online

EZEKIEL 18 - Zou bible

EZEKIEL 18

¹TOPA’ thu ka kungah ang tung hi:

²“Nu le pate lengga thua neh, a tate ha a za hi,” ci-in Israel gam tawh kisai-in tami paunah na gengen pen uh bang na cinopna uh ahei?”

³Keima a nungta ka hi ma bangin, Israel gamah tami paunah na zang ngai nawn poma sih ding uhi, TOPA Pasien in ci hi.

⁴Hinna zosie keima-’a hi, ci thei in; a pa’ hinna bangma in a ta’ hinna zong keima-a’ ahi hi: a maw mipa beh si ding hi.

⁵Mi khat a dih a, thuman le thutang tawh a gamtat a,

⁶muol tung tengah an ne loin ahi sihle Israel innkuonte’ milimte enin a khuoda sih a, a vengpa’ zi suthang loin ahi sihle numei khat a nin nei laitahin a va luppi sih a,

⁷mi koima khat zong gawt loin leibate kungah a vankhapte uh a piehkia a, mi suom loin a gilkielte an a pieh a, puon nei lote puon se-in

⁸khamkholna sum a lah sih a, ahi sihle a met dingin sum leitawi pie loin khielna bawlna panin a khut a tuhzo a, thu kitu mite kikalah thumanin vaihawmin

⁹ka thukhamte a zui a, ka ngaina kipte limtahin tangin muonhuoi tahin a gamtat leh, tua bang mi pen midih ahi hi; ama pen a hing valon ding hi, TOPA Pasien in ci hi.

¹⁰Ama in a ngongtat, sisansuo tapa khat nei-in

¹¹tam teng khat penpen a bawl a, (a pa[45] in tuate khat beh a sep lo vangin) muoltung tengah an ne-in a vengpa’ zi a suhthang a,

¹²mizawng le mi tasamte gawtin mi suom a, vankhapte piekia loin milimte enin a khuoda a, mudahuoi-in gamta-in,

¹³khamkholna sum a lah a, a met dingin sum a leitawisah leh, ama a hing ding amah? A hing sih ding hi. Ama in tam sil mudahuoi zosie a bawl zo ta hi; ama pen si valon ding a, a sisan ama luzang ma-ah tu ding hi.

¹⁴Ahi vangin tam mipa in a pa bawl khielna zosie a mu tapa khat nei-in, ang lungngai-in tua bang ma-in ang bawl sih a,

¹⁵muoltung tengah an ne loin ahi sihle Israel innkuon’ milimte enin a khuoda sih a, a vengpa’ zi zong suthang loin

¹⁶koima tungah khielna a bawl sih a, vankhap la loin mi suom lo a, ahi vangin gilkielte an pie-in puon nei lote puon tawh a hui a,

¹⁷khielna[46] panin a khut tuzo-in khamkholna van a lah sih a, ahi sihle a met dingin sum leitawi pie loin ka thuciem kipte a tan a, ka thukhamte a zui leh, a pa’ mawna ziehin ama si lo ding a, a hing valon ding hi.

¹⁸A pa ahile mi neisa paulah piehin, a sanggampa suom a, a mite lahah sil hoi lo a bawl ziehin ama in a khielna a silaw ahi hi.

¹⁹Hinanle nang in, “A pa khielna ziehin bang dingin a tapa in gimna thuoh lo ahei?” na ci hi. Thuman le thutahin a tapa gamta-in, ka thukham zosie pilvang tahin a zui ciengin ama pen a hing valon ding hi.

²⁰A maw mipa a si ding hi. Nu le pa’ khielna a tapa in silaw lo ding a, a tapa’ khielna zong nu le pa in silaw lo ding hi; midih pa’ dihtatna pen ama-a’ hi ding a, migilo pa’ gitlona zong ama-a’ ma hi ding hi.

²¹Ahi vangin migilote in a mawna bawl zosie uh panin ang kihei-in, ka thukhamte ang zui vua, thuman thutangin ang gamtat uleh, amate a hing valon ding uhi; amate a si vawt sih ding uhi.

²²Amau’ suhkhiel teng khat mama zong kiciemte nawn lo ding hi; amau’ bawl dihtatna ziehin amate a hing ding uhi.

²³Migilote sina ziehin ka lungdam sangin a gamtat hoi lona panun ang kihei-in hinna a nei na vuah lungdamzaw lo ding ka mah? TOPA Pasien in ci hi.

²⁴Ahi vangin mi dihte in a dihtatna panun ang piel vua, khielna bawlin migilote bang ma-in sil mudahuoite ang bawl uh ciengin, amate a hing thei ding uh amah? Amau’ dihtatna zosie khat zong a kiphawpieh sih ding hi; azieh pen a thuman lo ziehun maw a tanna ule a bawlsa uh mawnate ziehin amate a si ding uhi.

²⁵Hinanle note in, “TOPA silbawl zie a dih sih hi,” na ci uhi. Israel innkuonte aw, za un: Ka sil bawlzie a dih sih amah? A dih lo pen noma’ silbawl hizaw lo amah?

²⁶Midihte in a amau’ dihtatna pan kihei-in khielna a bawl ciengin tua ziehin amate a si ding uhi.

²⁷Migilote a gitlona panun kihei-in thuman thutangin a gamtat ciengun, amate in amau’ hinna a hundam ding uhi.

²⁸Amate ang lungngai-in a bawlsa uh khielnate panin ang kiheikia ziehun amate a hing valon ding vua, a si sih ding uhi.

²⁹Hinanle Israel innkuonte in, “TOPA silbawl zie a dih sih hi,” a ci uhi. Israel innkuonte aw, ka silbawl zie a dih lo ma amah? A dih lo pen noma’ silbawlte hizaw lo amah?

³⁰Tua ahi ziehin, Israel innkuonte aw, na unpi-un na gamtatna utawh kizui-in na tung vuah thu kang khen ding hi, TOPA Pasien in ci hi. Kisia unlen na khielna zosie uh panin hing kinuale un; tua ahi sihle khielna ziehin na kisietlaw[47] ding uhi.

³¹Keima nei dona vua sil suhkhiel na nei zosie uh a unpi-in paimang unlen, lungsim tha le lungtang tha puo un! No Israel innkuonte aw, bang zieha si ding na hi uh ahei?

³²Azieh pen koima a si ding ka nuom sih hi, hing kilekia unlen hing un, TOPA Pasien in ci hi.