Read Zou EZEKIEL 2 Bible Online

EZEKIEL 2 - Zou bible

EZEKIEL 2

¹Ama in keima kungah, “Mihing aw,[5] na keng tawh dingto inlen, na kungah thu kang gen ding hi,” ei ci hi.

²Tuale ama in keima kungah thu ang gen ciengin ka sungah hlagau khat ang lutin ka keng tawh ei dingtosah hi; tuale ama’ ei hopina ka za hi.

³Ama in ka kungah, “Mihing aw, keima in a ledo minam,[6] kei ei langpangin ei ledo Israel mite kunga pei dingin nang kang sawl hi; amate le a pu a pate un tuni cieng dongin keima ei langpangin a gamta khiel uhi.

⁴A suonlehlahte uh zum mel thei loin a lung khau uhi. Amate kungah kang sawl a, nangma in amate kungah, “TOPA in tam bangin gen hi,” na ci ding hi.

⁵Amate in a ngai vua a ngai sih zongun, (azieh pen amate mi ledo innkuon ahi uhi) amate in note lahah kamsang khat a op zo lamtah a thei ding uhi.

⁶Tuale nang, mihing aw, ling le khau in hing kimkotin mom-ai lahah teng nan lacin amate giing sinlen a thugente ziehun zau malmal sin; amau’ thugente ziehin zau sinlen, ang dugaw-et vangun zong lungkie beh sin, azieh pen amate pen a ledo innkuon ahi uhi.

⁷Amate in a ngai vua, a ngai sih zongun ka thugente amate tungah na gen ding hi, azieh pen amate pen a ledo innkuon ahi uhi.

⁸Ahi vangin nang, mihing aw, nang tunga kang gen thu khu ngai in; tua a ledo innkuonte bangin ledo sin; na kam kah inlen kang pieh khu ne in.

⁹Tuaci’n ka en leh, ka kungah khut ang zamphei khat ka mu a, tua khut sungah laiziel khat a om hi.

¹⁰Ka mai-ah ama in ang zah a, kaa le mau, thum le tau thu vive a nua le a mai-ah kigiel hi.