Read Zou EZEKIEL 20 Bible Online

EZEKIEL 20 - Zou bible

EZEKIEL 20

¹Kum sagi a cinna, a hla ngana, a ni sawm ni-in TOPA thu dong dingin Israel makai pawlkhat hing pei-in ka mai-ah ang to uhi.

²Tuale keima kungah TOPA’ thu ang tung hi:

³Mihing aw, Israel upate hopi inlen amate kungah, “TOPA Pasien in tam bangin ci hi, ci-in gen in: Bang dinga hing pei na hi uh ahei? Thu ei dong ding na hi uh amah? Keima a hing ka hi ma bangin, note thudawhin ka om sih ding hi, TOPA Pasien in ci hi.

⁴Amate tungah thu khen ding na mah? Mihing aw, amate tungah thu khen ding na mah? Tua ciengin a pu a pate uh’ na bawlsa sil mudahuoite amate theisah inlen,

⁵amate tungah tam bangin gen in: Israel ka teel ni-in, Jacob innkuon’ suonlehlahte tungah kiciemin Egypt gam sunga a om amate ka kitheisah a, amate tungah keima TOPA na Pasien uh ka hi hi, ci-in ka kiciem hi.

⁶Khum ni-in Egypt gam panin amate peipi-in, amate dinga ka suipiehsa khuoizu le bawngnawi luonna gam, gam zosie lahah a hoipen munah amate tunpi dingin ka kiciem hi.

⁷Tuale amate kungah ka genna-ah, mit hla vawt loin na et uh sil kidahhuoite paidawh unlen, Egypt milimte tawh noma le noma kibuasah sih un; keima TOPA na Pasien uh ka hi hi, ka ci hi.

⁸Ahi vangin amate in kei ei ledo-in ka thu a ngai sih uhi; mit tuhna a nei uh sil kidahhuoite amate in paai tuon loin Egypt milimte zong a nuasie sih uhi. Tua ciengin ka thangpaina amate tungah buosuhin, amate dona-in ka lungthahna teng Egypt gamah tungsah vang, ci-in ka ngaisun hi.

⁹Ahi vangin amau’ tenpi minamte mai-ah ka min a kigensiet lo nadingin ka min ka khuolna tawh na ka sem a, amate muna-ah kei mama kipholahin Egypt gam panin amate ka peipi hi.

¹⁰Tuaci’n Egypt panin amate ka pui a, gamlah ka tunpi hi.

¹¹Ka thukhamte amate pie-in, ka ngaina kipte ka lah a, tua teng a zui poma a hing ding uhi.

¹²Tua banah keima le amate kikalah lim khat ahi dingin ka sabbath-te zong amate ka pie hi.

¹³Ahi vangin Israel innkuonte in gamlahah kei ei ledo uhi; a zui tapo a hin nading uh ahi ka thukhamte amate in zui loin ka ngaina kipte a nuol uhi; amate in ka sabbath-te a buasah gawp uhi. Tua ciengin gamlahah amate ka thagam nadingin a tung vuah ka lungthahna tungsah vang, ci-in ka ngaisun hi.

¹⁴Ahi vangin amate ka peikhietpi ei mu minamte mai-ah ka min a kigensiet lo nadingin ka min ka khuolna tawh amate bangma ka law sih hi.

¹⁵Tua banah amate ka piehsa gam, khuoizu le bawngnawi luonna gam, gam zosie lahah a hoipen munah peipi nawn sih vang ci-in gamlah amate tungah ka kiciem hi.

¹⁶Bangzieh ahei cile amate in ka ngaina kipte nuolin ka thukhamte a zui sih vua, ka sabbath-te zong a buasah uhi.

¹⁷Hizongle amate ka hepi a, keima in gamlahah amate susie loin, zong ka thatgam sih hi.

¹⁸Keima in gamlahah a tate uh kung ah, “Na pu na pate uh’ thukhamte zui loin a ngaina kipte uh zong zui sih unlen, a milimte utawh noma le noma kibuasah sih un,” ka ci hi.

¹⁹Keima TOPA na Pasien uh ka hi hi; keima’ thukhamte zui unlen, ka ngaina kipte limtahin tang un.

²⁰tuale keima le note kikalah lim dingin ka sabbath-te siengthosah un, tuaci’n note in keima TOPA na Pasien uh ka hi lam nei thei ding uhi.

²¹Ahi vangin a tate un keima ei ledo uhi; amate in ka thukhamte a zui sih vua, a zui tapo hinlaw nading ahi ka ngaina kipte limtahin tang loin ka sabbath-te a buasah uhi. Tua ciengin keima in amate tungah ka thangpaina sungsuhin, amate dona-in ka lungthahna teng gamlahah tungsah vang, ci-in ka ngaisun hi.

²²Ahi vangin amate ka peikhietpi ei mu minamte mai-ah ka min a kigensiet lo nadingin, ka min ka khuolna tawh ka khut ka nualahkia hi.

²³Tua banah gamcin teng le minam cinteng tungah amate ka thezah ding hi, ci-in gamlah amate tungah ka kiciem hi,

²⁴azieh pen amate in ka ngaina kipte a zui sih vua, ka thukhamte nuolin ka sabbath-te a buasah vua, tuale a pu a pate uh’ milimte a mitsuon lenlon uhi.

²⁵Tua tham loin keima in amate tungah thukham hoi lote le a hin zawh lo nading uh ngaina kipte ka pie hi.

²⁶Amate in keima TOPA ka hi lam ei thei nading ule a cimul thaw thei nadingun a tapa tapen zosie utawh a pieh uh amau’ letsongte tungtawnin amate ka buasah hi.

²⁷Tua ahi ziehin mihing aw, Israel innkuonte hopi inlen amate kungah, TOPA Pasien in tam bangin ci hi, ci-in gen in: Tam sungah na pu na pate un kei tungah muonhuoi lo tahin a gam ta vua, ei gensiesie uhi.

²⁸Azieh pen pieh dinga ka ciemsa gam sungah amate ka lutpi ciengin muolsang khatpo ahi sihle singna pha khatpo a mu uleh tua munah biehpiehnate a bawl vua, ei lungthahsah thei biehna a pie uhi; amate in khum munah gim namtuite a the vua, dawn thei biehnate zong a sung uhi.

²⁹(Keima in amate kungah, “Khum munsang na peina uh khu bang ahiei? ka ci hi. Tuaci’n tuni dongin khumi mun Bamah[51] kici hi.)

³⁰Tua ahi ziehin Israel innkuonte kungah, TOPA Pasien in tam bangin ci hi, ci-in gen in:

³¹Note in na letsongte uh pie-in na tapate uh mei-ah na hal uh ciengin, tuni dongin na milim zosie utawh no le no a kibuasah na hi uhi. Tuale Israel innkuonte aw, kei note’ thudawhin ka om ding amah? Keima a hing ka hi ma bangin, note’ thudawhin ka om sih ding hi, TOPA in ci hi.

³²Na lungsim sung vua na ngaisutnate uh tung ngai lo ding hi. Na ngaisutna vuah, “Minamte le gamtuom mite bangin eite in zong sing le suong bie vai,” na ci uhi.

³³Keima a hing ka hi ma bangin, note tungah a hat ka khut, a kizah ka banhat le a kisungsuh ka thangpaina tawh pel loin kumpi ka sem ding hi, TOPA Pasien in ci hi.

³⁴Keima in a hat khut, a kizah banhat, le a kisungsuh thangpaina tawh minamte le na kithethangna uh gamte panin note kang khawmtuo ding hi;

³⁵tuale keima in gamlah mite kungah kang puoh ding a, tuale khum munah note tawh keima kimaituo-in thu kang khen ding hi.

³⁶Keima in Egypt gam sung senel gamah na pu na pate uh tungah thu ka khen bangin, note tungah zong thu kang khen ding hi, TOPA Pasien in ci hi.

³⁷Ka ciengkhut nei-ah kang peisah ding a, thuciemna khaukhina sungah kang peipi ding hi.

³⁸Note lahah a ledo mite le ka tunga a khiel mite ka hemkhie ding hi; keima in pemta a hina uh gam panin amate ka peipi ding a, ahi vangin Israel gam sungah a lut sih ding uhi. Tua ciengin note in keima TOPA ka hi lam nei thei ding uhi.

³⁹Israel innkuonte aw, TOPA Pasien in tam bangin ci hi: Note a koimapo in tu leh mailamah ka thu na ngai sih ding vua ahile pei-in na milimte’ na sem un; ahi vangin na letsongte ule na milimte utawh note in ka min siengtho na buasah nawn sih ding uhi.

⁴⁰Azieh pen khum gam sunga ka muol siengtho tung, Israel muolsang dawnah Israel innkuon zosie in a unpi-un keima’ na a sem ding uhi, TOPA Pasien in ci hi; keima in khum sungah amate ka sang ding a, tuale na biehnate uh, na letsong hoi pente ule noma’ a siengtho nate zosie, khum munah kang ngen ding hi.

⁴¹Na kithezahna uh gam tuomtuom panin hing kaikhawmin minamte lah panin kang lahdawh ciengin gimnamtui bangin kang sang ding a, note lahah minamte mai-ah ka sienthona kang kilangsah ding hi.

⁴²Na pu na pate uh tungah pieh dinga ka ciemsa gam ahi Israel gamah note kang tunpi ciengin note in keima TOPA ka hi lam nei thei ding uhi.

⁴³Khum sungah ang buasah na om dante ule na gamtatna uh zosie na phawh ding vua, sil hoi lo na bawl zosie ziehun no le no na kikidah ding uhi.

⁴⁴Israel innkuonte aw, na gitlona ule na gamtatnate uh dung zui-in ka min ka khuolna tawh note tungah kang bawl ciengin note in keima TOPA ka hi lam nei thei ding uhi, TOPA Pasien in ci hi.

⁴⁵[52] TOPA’ thu ka kungah ang tung hi:

⁴⁶Mihing aw, leitaw lam mai ngat inlen, leitaw lam le Negeb gama gammang lah langkhatah thu gen in.

⁴⁷Negeb gammang kungah, “TOPA’ thu ngai in: Na sungah mei ka hal ding a, na sunga sing hing zosie le sing gaw zosie a unpi-in katum ding hi; tua meikuong kiphel zo lo ding a, leilu le leitaw maitang zosie tua mei in a hulvam ding hi.

⁴⁸Mihing zosie in keima TOPA’ hal ahi lam a mu ding vua, koima in a phel zo sih ding hi.

⁴⁹Tua ciengin keima in, “Ah TOPA Pasien! Amate in, ‘Ama thu gentena bawlpa hi lo amah,’ ei ci uhi,” ka ci hi.